Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և փաստաբան Էլզա Զաքարյանի գործով այսօր կայացավ առաջին դատական նիստը:

Դատական նիստին ներկայացել էին դատավարության բոլոր մասնակիցները, դատավոր Իշխան Բարսեղյանի 5 փաստաբանները՝ նախկին դատավոր Վլադիմիր Գրիգորյանը, Վարդուհի Էլբակյանը, Լիաննա Գրիգորյանը, Կարեն Հովհաննիսյանը և Կարեն Ղազարյանը:

Իշխան Բարսեղյանի շահերը ներկայացնելու համար ևս մեկ փաստաբան կներգրավվի հաջորդ դատական նիստում:

Ներկա էին նաև ամբաստանվող փաստաբան Էլզա Զաքարյանը և վերջինիս պաշտպան Գևորգ Շիրինյանը, սակայն ամբաստանվող փաստաբանը հրաժարվեց իր պաշտպանից և դատարանին խնդրեց իրեն հանրային պաշտպանով ապահովել, այդ հիմքով դատական նիստը հետաձգվեց:

Հիշեցնենք, որ փաստաբան Էլզա Զաքարյանը նախաքննության ընթացքում մեկ անգամ արդեն հրաժարվել է իր նախորդ պաշտպանից՝ հանրային պաշտպանի գրասենյակի փաստաբան Լյուդվիգ Ավետիսյանից, որից հետո գործին ներգրավվեց փաստաբան Գևորգ Շիրինյանը:

Իսկ մինչ այդ՝ ամբաստանվողների անձնական տվյալները ճշտելու ժամանակ հայտնի դարձավ, որ դատավոր Իշխան Բարսեղյանի խնամքին են վատառողջ ծնողները և երեք երեխաները, որոնցից մեկն անչափահաս է՝ 17 տարեկան:

Իսկ փաստաբան Էլզա Զաքարյանի խնամքին են երկու մանկահասակ երեխաները, որոնցից մեկը՝ 1 տարեկան է, մյուսը՝ 7:

Նշենք, որ նիստը նախագահում է դատավոր Կարեն Մարդանյանը, իսկ մեղադրանքը պաշտպանում է դատախազ Կարեն Բիշարյանը:

Լրագրողների հետ զրույցում էլ դատավոր Իշխան Բարսեղյանի մորեղբայրը՝ Ժորա Սարբազյանը, կարծիք հայտնեց, որ այս ամենը պատվեր է և որ Բարսեղյանը չէր կարող կաշառք վերցնել, եթե նման գործով զբաղվեր, ապա այսօր վարձով չէր ապրի: Նրա գնահատմամբ՝ այս ամենի հետևում կանգնած է վճռաբեկ դատարանի նախագահ Արման Մկրտումյանը:

Դատական նիստի մանրամասները կներկայացնենք քիչ ուշ:

Աղբյուր` Փաստինֆո