Փաստ ինֆո

Շենգավիթ վարչական շրջանում, դատավոր Կարեն Մարդանյանի նախագահությամբ, այսօր կայացավ կաշառք ստանալու մեջ մեղադրվող նույն դատարանի դատավոր Իշխան Բարսեղյանի և փաստաբան Էլզա Զաքարյանի գործով առաջին դատական նիստը:

Ինչպես արդեն տեղեկացրել էինք, մեղադրանքը պաշտպանում է Գլխավոր դատախազության Հատկապես կարևոր գործերով քննության վարչության պետի տեղակալ Կարեն Բիշարյանը, ում վերաբերյալ պաշտպանական կողմը կարծիք հայտնեց, որ նա պատշաճ մեղադրող չէ:

Այսպիսով, դատարանը պաշտպանական կողմին տեղեկացրեց, որ Գլխավոր դատախազ Արթուր Դավթյանից գրություն է ստացել, որ իր լիազորությունները դրվում են դատախազ Կարեն Բիշարյանի վրա:

Այս գրությանը ծանոթանալուց հետո պաշտպան Վարդուհի Էլբակյանը հայտարարեց, որ նախ գրությունն ուղարկվել է Շենգավիթ վարչական շրջանի ընդհանուր իրավասության դատարանի նախագահին՝ Դավթի Բալայանին, այնինչ պաշտպանական կողմը գտնում է, որ գրությունը պետք է ուղարկվեր գործը նախագահող դատավորին:

Ինչ վերաբերում է գրության բովանդակությանը, պաշտպանը նշեց, որ Կարեն Բիշարյանը ներգրավվել է սույն գործով մեղադրանքը պաշտպանող դատախազ այն դեպքում, երբ դատավորի նկատմամբ քրեական հետապնդման նկատմամբ հսկողությունը բացառապես դրված է Գլխավոր դատախազի վրա, և ՀՀ գլխավոր դատախազը հաստատում է մեղադրական եզրակացությունը և նա պարտավոր է դատարան ներկայանալ և իր լիազորությունների շրջանակներում պաշտպանել մեղադրանքը:

Մասնավորապես, պաշտպանը, հղում կատարելով ՀՀ դատախազության մասին օրենքի 26-րդ հոդվածի1-ին մասին, համաձայն որի՝ մեղադրանքի պաշտպանությունը դատարանում, որպես կանոն, իրականացնում է տվյալ քրեական գործով հետաքննության և նախաքննության օրինականության նկատմամբ հսկողություն իրականացրած դատախազը՝ բացառությամբ, երբ նրան օրենքով նախատեսված դեպքերում փոխարինում է վերադաս դատախազը:

Բացառիկ դեպքերում մեղադրանքը պաշտպանող դատախազի դատավարական լիազորությունների իրականացմանը վերադաս դատախազն իրավունք ունի ներգրավելու նաև այլ մեղադրողների:

Ըստ պաշտպանի՝ տվյալ գրության բովանդակությունից երևում է, որ Գլխավոր դատախազը ոչ թե որպես երկրոդ մեղադրողի է ներգրավել Կարեն Բիշարյանին, այլև Գլխավոր դատախազի դատավարական լիազորությունների իրականացումը վերալիազորել է Բիշարյանին:

Պաշտպան Վարդուհի Էլբակյանը դատարանի ուշադրությունն հրավիրեց այն հանգամանքի վրա, որ քրեական դատավարության օրենսգրքով և որևէ այլ նորմով լիազորություն և վերալիազորում ընդհանրապես նախատեսված չէ:

Ուստիև՝ պաշտպանական կողմը գտնում է, որ Կարեն Բիշարյանը սույն գործով որպես պատշաճ մեղադրող չէ և, հետևաբար, նրան բացարկ հայտնելու հարցը կողմը չի կարող քննարկել այս պահին, երբ կներգրավվի պատշաճ մեղադրող, այն ժամանակ պաշտպանական կողմը բացարկի վերաբերյալ դիրքորոշումը կհայտնի:

Դատարանն այս ամենն ընկալեց այնպես, որ պաշտպանական կողմը բացարկի միջնորդություն չունի, ինչի վերաբերյալ պաշտպան Վարդուհի Էլբակյանը կրկին պարզաբանեց, որ «երբ պատշաճ դատախազ կլինի՝ իրենք կքննարկեն բացարկի միջնորդությունը, իսկ ստեղված իրավիճակը օրենքի պահանջից դուրս է, և մեղադրողը պատշաճ չէ»:

Սակայն նիստը նախագահող դատավորը Գլխավոր դատախազի գրության ձևակերպման հետ կապված որևէ խնդիր չտեսավ և արձանագրեց, որ մեղադրողին բացարկ չի հայտնվել և մեղադրողի լիազորությունները պատշաճ են:

Դատական նիստի դահլիճի՝ մասնավորապես, դատավարության կողմերի հավասար հարթության վրա չգտնվելու մասին էլ հայտարարությամբ հանդես եկավ նախկին դատավոր, ներկայիս փաստաբան Վլադիմիր Գրիգորյանը, ով նկատեց, որ ըստ քրեական դատավարության օրենսգրքի համապատասխան հոդվածի՝ դատավարության մասնակիցները հավասար մրցակցության մեջ են, և դատարանը պարտավոր է ապահովել իրավունքի շահը, այն, որ նախագահողը գտնվում է բարձ դիրքում, հենց խոսում է այն մասին, որ նա դատարանն է, սակայն կողմի համար անընկալելի էր, թե ինչու պետք է պաշտպանական կողմը այլ հարթության վրա լինի, իսկ հարգելի մեղադրողը՝ բարձր դիրքում:

Պաշտպան Վլադիմիր Գրիգորյանը սա օրենքի խախտում համարեց և խնդրեց ընդմիջել ու դիրքի փոփոխություն կատարել, ապա շարունակել դատական նիստը, սակայն նախագահողը հայտարարեց, որ դատական նիստի դահլիճի կառուցվածքը չի փոխվելու այս պահին:

Աղբյուր` Փաստինֆո