Փաստ ինֆո

Նուբարաշենի խճուղում 58-ամյա Եղիշե Խաչատրյանի սպանության մեջ մեղադրվող Յուրի Հակոբյանն առաջադրված մեղադրանքը չի ընդունում: «Փաստինֆո»-ի հետ զրույցում այդ մասին ասաց Յուրի Հակոբյանի պաշտպան Արմեն Նադիրյանը՝ հավելելով, որ իր պաշտպանյալը շուրջ կես տարի անհիմն գտնվում է անազատության մեջ:

Ըստ պաշտպանի՝ նախաքննության ընթացքում Հակոբյանի մեղավորությունը հիմնավորող որևէ ապացույցներ ձեռք չի բերվել, հակառակը՝ գործի քննությամբ ձեռք բերված նյութերով ապացուցվել է Հակոբյանի անմեղությունը:

Յուրի Հակոբյանի նկատմամբ քրեական հետապնդման հիմք է հանդիսացել սպանված Եղիշե Խաչատրյանի մոր՝ Էմմա Աբրահամյանի կողմից Յուրիին ճանաչելու հանգամանքը, սակայն սպանվածի մայրը ի սկզբանե միանշանակ չի պնդել, որ որդուն ծեծի ենթարկողների մեջ եղել է նաև Յուրին՝ նա հաստատապես չի կարողացել նշել այդ փաստը:

Պաշտպանի գնահատմամբ՝ ճանաչման քննչական գործողությունը կատարվել է օրենքով սահմանված կարգի խախտմամբ ուստիև այն չի կարող համարվել թույլատրելի ապացույց:

Բացի այդ, սպանվածի մայրը որպես վկա հարցաքննվելու ժամանակ հայտնել է, որ իր որդուն ծեծի ենթարկողներից իր մոտ տպավորվել է միայն մեկը, ով եղել է կարմիր վերնաշապիկով, իսկ այդ օրը Յուրի Հակոբյանը ոչ թե կարմիր, այլ մանուշակագույն վերնաշապիկով է եղել: Այդ ամենից հետո, երբ Հակոբյանը ձերբակալվել է վերջինս հստակ ներկայացրել է իր այլուրեքությունը, այն, որ դեպքի հետ որևէ կապ չի կարող ունենալ քանի որ այդ օրը երեկոյան իր ընկերոջ՝ Ռաֆայել Պետորսյանի հետ գտնվել է «Լիդո» ռեստորանային համալիրում, իսկ այնտեղ գտնվելու նպատակը եղել է իր հարսանյաց հանդեսի վերաբերյալ ադմինիստրացիայի հետ որոշակի հարցերի քննարկումը:

Պաշտպանը նաև նշեց, որ ցուցմունքում իր պաշտպանյալը հայտնել է, որ ռեստորանային համալիրում գտնվելու ժամանակ հանդիպել է դասընկերոջը՝ Արտաշես Չիչոյանին, Արարատ Նիկողոսյանին, ովքեր ևս Եղիշե Խաչատրյանի սպանության գործով մեղադրյալներից են և Մարիամ Գրիգորյանին:

Այս ամենից հետո Յուրի Հակոբյանի դասընկերը՝ Արտաշես Չիչոյանը խնդրել է Հակոբյանին իր ավտոմեքենայի բանալիները տալ՝ կարճ ժամանակով ինչ-որ տեղ գնալու համար, Հակոբյանն էլ չի մերժել և տվել է, որից հետո Արտաշես Չիչոյանը, Արարատ Նիկողոսյանը և Մարիամ Գրիգորյանը լքել են ռեստորանային համալիրը:

Արմեն Նադիրյանը նաև նշեց, որ իր պաշտպանյալն այդ ամենից հետո շուրջ 30-40 րոպե մնացել է ռեստորանում իր ընկերոջ՝ Ռաֆայել Պետրոսյանի հետ, որից հետո վերջիններս «Լիդո»  ռեստորանի մոտ հանդիպել են իրենց մեկ այլ ընկերոջը՝ Գևորգ Սարգսյանին և նրա մեքենայով գնացել են «Էրեբունի» ԲԿ-ի հարևանությամբ գտնվող Վիվառո գրասենյակի մոտ:

Հակոբյանը շուրջ երկու ժամ սպասելուց հետո զանգահարել է Արարատ Նիկողոսյանին ճշտելու, թե վերջինս մեքենան ինչու չի վերադարձնում, սակայն նրան գտնելու փորձերն ապարդյուն են եղել և միայն հաջորդ օրը Յուրի Հակոբյանը լրատվամիջոցներից տեղեկացել է տեղի ունեցած սպանության մասին:

Ինչ վերաբերում է տուժողի իրավահաջորդի ներկայացուցիչ փաստաբան Ինեսսա Պետրոսյանի հայտարարությանը, որ դատատոքսիկաքիմիական փորձաքննության եզրակացության համաձայն՝ գործով անցնող մեղադրյալները դեպքի ժամանակ գտնվել են թմրանյութի ազդեցության տակ և գտնվելով կալանավայրում նրանք շարունակում են օգտագործել թմրանյութեր, ապա պաշտպան Նադիրյանը կարծիք հայտնեց, որ տվյալ դեպքում անմեղության կանխավարկածի կոպիտ խախտում է տեղի ունեցել, ինչն անընդունելի է և հավելեց, որ իր պաշտպանյալը երբևիցե թմրամիջոց չի օգտագործել, ինչի վերաբերյալ առարկությամբ է հանդես եկել փորձաքննության եզրակացությանը ծանոթանալուց հետո:

Ըստ պաշտպանի՝ փորձագետի եզրակացությամբ տրվել է, որ քննության արդյունքում թմրամիջոցի առկայություն կա, որի օգտագործման վաղեմությունը կարող է 4-6 ամիս լինել:

Փորձաքննությունը սկսել է կատարվել  2016թ. հուլիսին և ավարտվել՝ հոկտեմբերին նշում է պաշտպանն ու հավելում, որ անհասկանալի է փորձաքննության տևողության այդքան ձգձգվելը, բացի այդ չի ներկայացվել եզրակացության մեջ, թե փորձագետը կոնկրետ երբ է հետազոտել իրեն ներկայացրած մազի նմուշները ուստի հնարավոր չէ գալ եզրահանգման դեպքի օրվա դրությամբ նրա օրգանիզմում թմրանյութի առկայության վերաբերյալ: Ինչ վերաբերում է իր պաշտպանյալի կողմից ոգելից խմիչք օգտագործելուն, ապա այստեղ էլ պաշտպան Նադիրյանն ասաց, որ ապացույց չկա, որ Հակոբյանը դեպքի օրը ոգելից խմիչք է օգտագործել:

Պաշտպան Նադիրյանը տարակուսանք հայտնեց, որ իր պաշտպանյալի անմեղությունը հաստատող բազմաթիվ ապացույցների առկայության պայմաններում մինչդատական վարույթն իրականացնող մարմինը քրեական հետապնդումը դադարեցնելու փոխարեն մտադրվել է առանց բավարար ապացույցների առկայության քրեական գործն ուղարկել դատարան։

Միաժամանակ հավելեց նաև, որ պաշտպանության կողմը դեմ չէ, որ Յուրի Հակոբյանի մեղավորության կամ անմեղության հարցը որոշվի դատարանում,  սակայն անընդունելի է, որ Յուրի Հակոբյանն առանց որևէ հիմքի վեց ամիս շարունակ գտնվում է կալանքի տակ ինչի հետևանքները կարող են անդառնալի լինել վերջինիս համար։

Հիշեցնենք, որ քրեական գործով մեղադրանք է առաջադրվել ԴԱՀԿ ծառայության աշխատակից Խաչիկ Կոսյանին, Արտաշես Չիչոյանին, Արարատ Նիկողոսյանին, Յուրի Հակոբյանին և Արթուր Զաքարյանին՝ ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով: Գործով նախաքննության ավարտ է հայտարարվել:

Աղբյուր` Փաստինֆո