Փաստ ինֆո

HELLP սինդրոմի դեպքում պետք է ծննդալուծել հղիին. դա հղիության բարդությունն է և լուծումը՝ ծննդալուծումն է: Այսօր Շենգավիթ դատարանում այդ մասին հայտարարեց «էրեբունի» ԲԿ մանկաբարձ-գինեկոլոգ Էդիտա Ղարիբյանը, ով Մերի Մարգարյանի կեսարյան հատմամբ ծննդալուծելիս եղել վիրահատող բժիշկներից մեկը:

Վկան հայտնեց նաև, որ Մերին ընդունվել է «Էրեբունի» ԲԿ ծանր վիճակում և քանի որ նրա մոտ ախտորոշվել էր երկկողմանի թոքաբորբ, պտղի սրտի զարկերակի դանդաղում, սակավաջրություն և HELP սինդրոմ հարցականով, ուստի` կոնսիլիումի արդյունքում որոշում է կայացվել անհապաղ կեսարյան հատումով հղիին ծննդալուծել:

Ի տարբերություն «Շենգավիթ» ԲԿ-ի բժիշկների, ովքեր HEԼLP սինդրոմի մասին ընդամենը գրականությունից էին տեղյակ «Էրեբունի» ԲԿ-ի մանկաբարձ գինեկոլոգ Էդիտա Ղարիբյանն ասաց, որ շատ անգամներ է տեսել իր աշխատանքային գործունեության ընթացքում այս հիվանդությունը, այն վաղ հայտնաբերելու դեպքում հնարավոր է եղել դժբախտ ելքը կանխել:

Իսկ թե ինչո՞ւ Մերի Մարգարյանին համակարգչային տոմոգրաֆիա չեն կատարել այն պայմաններում, երբ նա «Շենգավիթ» ԲԿ-ից «Էրեբունի» ԲԿ է տեղափոխվել սուբարախնոիդալ արյունազեղման կասկածանքով վկան դժվարացավ պատասխանել, սակայն նշեց, որ գնահատվել է Մերիի վիճակը և անհապաղ որոշել կեսարյան հատում կատարել:

Հաջորդիվ հարցաքննվեց վկա Գոհարիկ Ահարոնյանը, ով «Էրեբունի» ԲԿ-ի նորածնային բաժանմունքի նեոնոտոլոգն է:

Վկայի խոսքով՝ երբ նորածնին դուրս են բերել մոր որովայնից, նա եղել է գունատ, կենդանության նշաներ չեն եղել, առանց սրտի բաբախի և մկանային տոնուսի. «կարելի է ասել մեռելածին է եղել» և բժշկուհին վերակենդանացում է կատարել:

Նորածնին 10 րոպե վերակենդանացում կատարելուց հետո գրանցվել է սրտի բաբախ, որից հետո նորածնին միացրել են արհեստական շնչառական ապարատին, սակայն փոքրիկի վիճակը շարունակել է ծայրահեղ ծանր մնալ, երրորդ օրը կրկնակի անգամ նորածնին վերակենդանացում է կատարվել, ինչը որևէ դրական արդյունք չի տվել, և գրանցվել է երեխայի մահ:

Հարցին, թե ինչու է նա վերակենդանացում կատարել երեխային այն դեպքում, երբ նա մեռելածին է եղել, վկան պատասխանեց, որ ինքն ունի այդ իրավունքը վերակենդանացում կատարելու, քանի որ երեխայի մոտ եզակի բաբախ է եղել:

«Էրեբունի» ԲԿ-ի մանկաբարձ-գինեկոլոգ Նորայր Ղուկասյանն էլ նշեց, որ ինքը ևս մասնակցել է Մերիի վիրահատությանը, եղել է բժշկի երկրորդ օգնականը:

Վերջինս նշեց, HEԼLP սինդրոմն ախտորոշվել է կլինիկոլաբորատոր հետազոտությունների արդյունքում, և դրա միակ լուծումը Մերիին անհապաղ ծննդալուծելն էր:

Վկան նշեց, որ Մերին իրենց ԲԿ է տեղափոխվել ծայրահեղ ծանր վիճակում՝ սուբարախնոիդալ արյունազեղման կասկածանքով. ըստ վկայի՝ դա իրենց մոտ հերքվել է, սակայն պաշտպանական կողմը պնդեց, որ այդ մասին որևէ գրառում չկա «էրեբունի» ԲԿ-ի փաստաթղթերում:

Վկան հայտնեց, որ HEԼLP-ը քիչ հանդիպող հիվանդություն է, սակայն Մերիի մոտ մինչև վիրահատարան տանելն ախտորոշվել է այն հարցականով, իսկ մինչև վիրահատության սկսվելը կատարված անալիզների պատասխանները ստացվել են և հաստատվել, որ նրա մոտ HELԼP է եղել:

Ինչ վերաբերում է նրան, որ երբ Մերիին տեղափոխվել է «Էրեբունի» ԲԿ, նրա մոտ ախտորոշվել է երկկողման թոքաբորբ, ինչը մինչ այդ չի ախտորոշվել «Շենգավիթ» ԲԿ-ում, վկան ասաց, որ 2-3 ժամում չէր կարող նրա մոտ երկկողմանի թոքաբորբ զարգանալ:

Նա նաև հավելեց, որ երեխայի մոտ պտղի սրտի զարկերակի դանդաղումն արդեն իսկ ցուցում է՝ կեսարյան հատում կատարելու և յուրաքանչյուր պարագայում, եթե առկա է նման իրավիճակ, որքան շուտ կատարվի կեսարյան հատում, այդքան լավ:

Իրենց կողմից կեսարյան հատում կատարելը միտված է եղել ինչպես մոր կյանքը փրկելուն, այնպես էլ՝ երեխայի:

Հաջորդ դատական նիստում վկաների հարցաքննությունը կշարունակվի:

Աղբյուր` Փաստինֆո