Փաստ ինֆո

Նուբարաշենի խճուղում 58-ամյա Եղիշե Խաչատրյանի սպանության գործով նյութերում առկա չէ որևէ ապացույց այն մասին, որ դեպքի ժամանակ Արարատ Նիկողոսյանը կամ որևէ մեկը եղել է թմրանյութի կամ ալկոհոլի ազդեցության տակ: Այդ մասին «Փաստինֆո»-ի թղթակցին ասաց Արարատ Նիկողոսյանի պաշտպան Լիպարիտ Սիմոնյանը:

Հիշեցնենք, որ դեկտեմբերի 7-ին լրատվամիջոցների հետ հանդիպմանը տուժողի իրավահաջորդ Փառանձեմ Մեյթիխանյանը և նրա ներկայացուցիչ՝ փաստաբան Ինեսսա Պետրոսյանը հայտարարել էին, որ դատատոքսիկաքիմիական փորձաքննության եզրակացության համաձայն՝ գործով անցնող մեղադրյալները եղել են թմրանյութի ազդեցության տակ, ավելին, գտնվելով կալանավայրում նրանք շարունակում են օգտագործել թմրանյութեր:

Այդ մասին, ըստ փաստաբան Ինեսսա Պետրոսյանի, վկայում են դատարանի որոշմամբ մեղադրյալների հեռախոսային խոսակցությունների գաղտնալսումները, ինչն էլ պատճառ է հանդիսացել ՀՀ քրեական օրենսգրքի 266-րդ հոդվածի 1-ին մասով գործ հարուցելու:

Արարատ Նիկողոսյանի պաշտպան Լիպարիտ Սիմոնյանի պնդմամբ՝ քրեական գործում առկա գաղտնալսման ձայնագրություններում առկա չէ Արարատ Նիկողոսյանի կողմից խոսակցություն, զրույց, որը կվերաբերվի դեպքի հանգամանքներին:

Բացի այդ, տուժողի իրավահաջորդի կողմից մամլո ասուլիսի ժամանակ հայտնած այն տվյալը, թե գաղտնալսման ձայնագրության մեջ առկա է «մեղադրյալ Արարատ Նիկողոսյանի խոսակցությունն ընկերուհու հետ, երբ նա ասում է` բա խփել եմ, ինչ պիտի անեի, իսկ մեկ այլ խոսակցությամբ՝ Արարատ Նիկողոսյանը խոսելով գործով վկա Մարիամ Գրիգորյանի հետ ասում է` դատաքննությամբ դեռ կապացուցվի, թե ով է հիմնական հարվածողը, միգուցե՞ Յուրին է» այս կապակցությամբ Լիպարիտ Սիմոնյանը անհրաժեշտ համարեց, որ կողմը լավ ծանոթանալ քրեական գործի նյութերին:

Ըստ պաշտպանի՝ Արարատ Նիկողոսյանին վերագրվող ձայնագրություններում նման բովանդակությամբ խոսակցություն առկա չէ, Ա. Նիկողոսյանը ձայնագրության մեջ դեպքի վերաբերյալ որևէ հանգամանք չի նշել, «Յուրի» անունը երբևէ չի հիշատակել:

Նշենք, որ Յուրի ասելով՝ նկատի ունեն քրեական գործով մեղադրյալ Յուրի Հակոբյանին:

Լիպարիտ Սիմոնյանի խոսքով՝ նման խոսակցություն կա դեպքի հետ առնչություն չունեցող մեկ այլ անձի վերագրվող ձայնագրության մեջ, ով չունի մեղադրյալի և վկայի կարգավիճակ, գտնվում է ազատության մեջ, իսկ նրա ասածներից պարզ չէ, թե «միգուցե՞ Յուրին է» արտահայտությունը ում է վերաբերում:

Մեզ հետ զրույցում Լիպարիտ Սիմոնյանը նշեց, որ իր պաշտպանյալ Արարատ Նիկողոսյանը դեպքի հետ կապված ցուցմունքներ է տվել՝ մանրամասն նկարագրել է դեպքը և բացառել է այդ թվում Յուրա Հակոբյանի մասնակցությունը դեպքին և ընդհանրապես դեպքի վայրում գտնվելու հանգամանքը:

Ավելին, ըստ պաշտպանի՝ քրեական գործում առկա չէ որևէ ապացույց առ այն, որ Արարատ Նիկողոսյանը պարբերաբար կամ գեթ մեկ անգամ կալանավայրում կամ ազատության մեջ գտնվելու ժամանակ թմրամիջոց է օգտագործել:

Ինչ վերաբերում է պաշտպանի կողմից լրագրողին հայտնած մտքին, որ իր պաշտպանյալը գուցե կանեփ է կերել, ապա Լիպարիտ Սիմոնյանն ասաց, որ Նիկողոսյանը կարող էր դեպքից ամիսներ առաջ կանեփ կերած լիներ, իսկ փորձագետի կողմից դրա պարունակությունը նրա մեզի փորձանմուշում հայտնաբերելու վերաբերյալ, վերջինս նշել է, որ դեպքից 2 ամսվա վաղեմության մասին է խոսքը գնում:

Ուստիև, ըստ պաշտպանի՝ այն որևէ կապ չունի ոչ դեպքի օրերի և ոչ էլ կալանավայրում գտնված ժամանակահատվածի հետ:

Հիշեցնենք, որ քրեական գործով մեղադրանք է առաջադրվել ԴԱՀԿ ծառայության աշխատակից Խաչիկ Կոսյանին, Արտաշես Չիչոյանին, Արարատ Նիկողոսյանին, Յուրի Հակոբյանին և Արթուր Զաքարյանին՝ ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով:

Գործով նախաքննության ավարտ է հայտարարվել:

Աղբյուր` Փաստինֆո