Փաստ ինֆո

Ազատությունից ապօրինի զրկելու հետևանքով պատճառված բարոյական վնասի պահանջով քաղաքացի Լուսինե Հովսեփյանն ընդդեմ Հայաստանի Հանրապետության գործով դատարանի որոշումը կհրապարակվի դեկտեմբերի 21-ին:

Թեև նախորդ դատական նիստում «հաշտության ցանկություն կա՞» դատարանի հարցին ի պատասխան հայցվորի ներկայացուցիչ Արամազդ Կիվիրյանը նշել էր «ինչո՞ւ ոչ», իսկ պատասխանողի ներկայացուցիչ Արմեն Վարոսյանը պատասխանել էր՝ «այո, իհարկե», սակայն այսօրվա նիստում կողմերը ցանկություն չհայտնեցին հաշտության համաձայնություն կնքել:

Հայցվորի ներկայացուցիչ, փաստաբան Արամազդ Կիվիրյանը պնդեց իրենց պահանջը՝ «200 հազար ՀՀ դրամի չափով ողջամիտ հատուցում»:

Հայցվորը 2013թ. մասնակցել է Մաքսային միությանը Հայաստանի անդամակցության առնչությամբ նախագահական նստավայրի մոտ տեղի ունեցած բողոքի ակցիային և բերման ենթարկել ոստիկանություն, որտեղ պահվել է օրենքով նախատեսված երեք ժամից ավելի, այն է՝ երեք ժամ քսան րոպե:

Հայցվորն ու իր ներկայացուցիչն ավելի վաղ, մինչև Երևանի Կենտրոն և Նորք-Մարաշ վարչական շրջանների դատարան դիմելը հակընդդեմ հայց էին ներկայացրել Վարչական դատարան, երբ ոստիկանությունը հայց էր ներկայացրել Լուսինե Հովսեփյանի դեմ: Հակընդդեմ հայցում իրենք պահանջում էին ամբողջությամբ ոչ իրավաչափ ճանաչել ոստիկանության գործողությունները՝ սկսած ձերբակալությունից, բերման ենթարկելուց և վերջացրած՝ թույլատրելի ժամկետից ավելի պահելով և այլն՝ հիմք ընդունելով նաև այն, որ տվյալ դեպքում անձը զրկվել էր խոսքի ազատ արտահայտման իրավունքից:

Վարչական դատարանում հակընդդեմ հայցը բավարարվել էր մասնակի, ոչ իրավաչափ էին ճանաչվել միայն Լուսինե Հովսեփյանին անօրինական կերպով՝ երեք ժամից ավելի ոստիկանությունում պահվելու հետ կապված ոստիկանության գործողությունները:

Պատասխանող ՀՀ-ի, մասնավորապես, ոստիկանության ներկայացուցիչ Արմեն Վարոսյանը նշեց, որ իրենք ընդունում են չբողոքարկված ու օրինական ուժի մեջ մտած Վարչական դատարանի վճիռը՝ «ընդունում ենք փաստերը»: Ուղղակի, նշեց պատասխանողի ներկայացուցիչը, հայցվորը մինչև դատարան դիմելը վնասի հատուցման պահանջով չի դիմել վարչական մարմնին՝ ոստիկանությանը, որի վարչարարության հետևանքով հայցվորին վնաս է պատճառվել: Ըստ պատասխանողի ներկայացուցչի, այդ պատճառով գործը ենթակա է կարճման:
«Փաստինֆո»-ի լրագրողի հետ զրույցում հայցվորի ներկայացուցիչ Արամազդ Կիվիրյանը նշեց, որ համաձայն չէ պատասխանողի առարկությունների հետ. եթե պատասխանող կողմն ի սկզբանե պատրաստ չէ հայցվորի խախտված իրավունքը վերականգնելու, «կներեք, դիմել ուղղակի ձևական նկատառումներով, ես այդտեղ, ճիշտն ասած, իրավաչափություն չեմ տեսնում»: Բացի այդ, նշեց Արամազդ Կիվիրյանը, այն հանգամանքը, որ իրենք վարչական մարմնին չեն դիմել, դեռևս չի նշանակում, որ իրենք զրկված են դատարան դիմելու իրավունքից ու հնարավորությունից՝ Քաղաքացիական օրենսգիրքն այդ հնարավորությունը տալիս է, և իրենք էլ դիմել են դատարան:

«Եվ եթե նույնիսկ ցանկություն կար որևէ ձևով, ինչ-որ առումով, գոնե ինչ-որ չափով մեր խախտված իրավունքը վերականգնելու, միգուցե ոչ այն ծավալով, ինչքանով որ մենք ենք ներկայացրել, թեկուզ իրենց մտածած չափով փոխհատուցել, իրենք զրկված չէին այդ հնարավորությունից, մանավանդ իրենք էին միջնորդել, որպեսզի նախորդ դատական նիստը հետաձգվի՝ հաշտության համաձայնագիր կնքելու համար: Այսինքն՝ եթե մարդը ցանկություն ունի խախտված իրավունքը վերականգնելու, հավատացնում եմ, ինքը դա կանի»,- ասաց Արամազդ Կիվիրյանը: Ըստ փաստաբանի, ինքը տեսնում է, որ այդ ցանկությունը չկա, եթե ցանկություն լիներ, դատարան դիմելու անհրաժեշտություն էլ չէր առաջանա կամ նույնիսկ դիմելուց հետո, թեկուզ պրոցեսի ընթացքում կարելի էր գործողություններ անել այդ ուղղությամբ: «Իրենք անգործություն են դրսևորել, և ես տեսա մի բան՝ իրենք նույնիսկ այս փուլում պատրաստակամ չեն որևէ ձևով ոչ նյութական վնասի հատուցումը վերականգնելու ուղղությամբ գործողություններ կատարել»:

Ի՞նչ են ակնկալում դատարանից մեր հարցին ի պատասխան Արամազդ Կիվիրյանը նշեց. «Դատարանից, ինչպես միշտ, ակնկալում ենք արդար դատական ակտ, խախտված իրավունքների վերականգնում »:

Փաստաբանն ընդգծեց, որ ինքը չի ուզում ասել, որ դատարանը չի բավարարի իրենց պահանջը, հնարավոր է, որ բավարարի, որովհետև իրավական զենքերն ունի՝ «հուսով եմ, որ դատարանը կկայացնի արդար դատական ակտ»:

Արամազդ Կիվիրյանն ընդգծեց, որ ինքն ավելի մեծ ակնկալիքներ ուներ Վարչական դատարանից, սակայն վերջինս չկարողացավ վեր գտնվել այդ իրավիճակներից ու կայացնել արդարացի դատական ակտ՝ Վարչական դատարանը մասնակի է ոչ իրավաչափ ճանաչել ոստիկանության գործողությունները՝ միայն օրենքով նախատեսված երեք ժամից ավելի, այն է՝ երեք ժամ քսան րոպե պահելու հետ կապված և ամբողջությամբ բավարարել է ոստիկանության պահանջը:

Աղբյուր` Փաստինֆո