Փաստ ինֆո

Գյումրիում դեկտեմբերի 7-ին հարգանքի տուրք են մատուցել 1988 թվականի ավերիչ երկրաշարժի անմեղ զոհերի հիշատակին: Առավոտյան հոգեհանգստի պատարագ է մատուցվել Շիրակի թեմի բոլոր եկեղեցիներում, սակայն օրվա ընթացքում ևս մարդաշատ են ինչպես Գյումրիում գործող եկեղեցիները, այնպես էլ գերեզմանատները:

Երկրաշարժից 28 տարի անց, մարդիկ կրկին այցելում են աղետին զոհ գնացած հարազատերի շիրիմներին՝ սգալու ու խնկարկելու կորուստը: «Արմենպրես»-ի հաղորդմամբ` մարդկանց հոսքը չի դադարում նաև դեպի անմեղ զոհերի եղբայրական գերեզման: Իսկ առավոտյան 11:41 րոպեին՝ հենց այն նույն ժաﬕն, երբ տեղի ունեցավ սարսափելի աղետը, ՀՀ վարչապետ Կարեն Կարապետյանը, նախարարները, ԱԺ պատգամավորները, մարզային և քաղաքային իշխանությունների ներկայացուցիչները, քաղաք այցելած հյուրերը ծաղիկներ դրեցին երկրաշարժի անﬔղ զոհերի հիշատակը հավերժացնող հուշակոթողին, 1 րոպե լռությամբ հարգեցին նրանց հիշատակը:

Շիրակի թեմի առաջնորդ գերաշնորհ Միքայել եպիսկոպոսի ձեռամբ կատարվեց հոգեհանգստի կարգ: Գերաշնորհ Միքայել եպիսկոպոս Աջապահյանը խորհուրդ տվեց բոլորին արժևորել կյանքը, դասեր քաղել այդ օրերից:

«Պետք է քննենք՝ տեսնելու համար երկրաշարժից 28 տարի անց լուսո որդինե՞ր ենք, պատրա՞ստ ենք անակնկալներին, թե՞ դարձյալ պետք է մնանք անպատրաստ: Լինե՛նք պատրաստ մեր աշխատանքով, մեր քրիտինքով, լավատեսությամբ ու բարոյական սկզբունքերով, որ մեր նահատակներն հանգիստ ննջեն: Թող շեն մնա մեր Հայաստանը, Գյումրին, բայց ոչ թե ուրիշի, այլ մեր քրիտինքով, մեր նվիրումով ու մեր աշխատանքով»,-իր առաջնոդրական խոսքում նշեց Միքայել եպիսկոպոս Աջապահյանը:

Արմենուհի Մխոյան

Աղբյուր` Փաստինֆո