Փաստ ինֆո

Ազգային ժողովի ՀՅԴ խմբակցության ղեկավար Արմեն Ռուստամյանը հերքում է շրջանառվող լուրերը, թե կուսակցության սփյուռքի կառույցները չեն կիսում հայաստանյան կառույցի քաղաքականությունը և չեն պատրաստվում ֆինանսավորել: Ազգային ժողովում լրագրողների հետ զրույցում Արմեն Ռուստամյանը վստահեցրեց, որ նման խնդիր բացարձակ չկա:

«Բացարձակ որևէ հիմք չկա այդ լուրերի մեջ: Մեր կառույցի մեջ ինչ-որ բաներ գտնելու փորձեր միշտ արվում են, և տեսնում են, որ նման բան չկա, որևէ պառակտում չկա, սակայն շարունակում են շարժվել նույն տրամաբանությամբ»,- «Արմենպրես»-ի հաղորդմամբ՝ նշեց պատգամավորը:

Նա հավելեց, որ բոլորովին վերջերս վերադարձել է Ավստրալիայի ՀՅԴ կառույցից, որտեղ ամբողջությամբ հավանություն է ստանում իրենց վարած քաղաքականությունը:

«Մասնակցել եմ նրանց ժողովին, բոլոր խնդիրները քննարկվել են, հանդիպուﬓեր եմ ունեցել համայնքի հետ: Որևէ նման հարց գոյություն չունի»,- ասաց Ռուստամյանը:

Հարցին` շարունակելո՞ւ են սփյուռքի կառույցները ֆինանսավորել ՀՅԴ հայաստանյան կառույցը, Արմեն Ռուստամյանը պատասխանեց. «Դաշնակցությունը ֆինանսավորվում է այն օրինական ճանապարհներով, որ միշտ եղել է: Մենք հատուկ ջանքեր չենք գործադրում զարտուղի ճանապարհներով ֆինանսական միջոցներ գտնելու համար: Ֆինանսավորման եղանակը լավացնում կամ փչացնում է քո տեսակը, դրա համար մենք ամեն տեսակի ֆինանսավորում չենք վերցնում, որովհետև պետք է նկատի ունենալ, որ դա էլ կարող է ազդել քո որակի վրա»,- նշեց ԱԺ ՀՅԴ խմբակցության ղեկավարը:

Արմեն Ռուստամյանը ևս մեկ անգամ հստակեցրեց, որ իրենք պատրաստ են ամենալայն համագործակցության, սակայն իրենց որդեգրած գաղափարների շուրջ:

Լուսանկարը՝ Ֆոտոլուրի

Աղբյուր` Փաստինֆո