Փաստ ինֆո

Մերի Մարգարյանի և նրա նորածնի մահվան գործով դատական նիստում այսօր շարունակվեց վկաների հարցաքննությունը և հարցաքննվեցին «Շենգավիթ» ԲԿ-ի երկու բուժքույր՝ Արփինե Մուրադյանը և մանկաբարձ գինեկոլոգ՝ Լիլիթ Գրիգորյանը:

Վկա բուժքույրն իր ցուցմունքում նշեց, որ բժշկուհի Շուշանիկ Բախշյանի ցուցումով հղի Մերի Մարգարյանին մանկաբարձության բաժանմունքից տեղափոխել է ինտենսիվ թերապիայի բաժանմունք:

Ըստ վկայի՝ իր գործառույթներն այդքանով է սահմանափակվել:

Թե հղին կոնկրետ ի՞նչ խնդիր է ունեցել, բուժքրոջ խոսքով, ինքը տեղյակ չի եղել, տեղափոխման որոշումը կայացրել է բժշկուհի Բախշյանը, ինքն էլ կատարել է:

Դատարանում վկան հայտնեց, որ միայն տեղափոխման ժամանակ է Մերի Մարգարյանի հիվանդասենյակ մտել:

Վկայի նախաքննական և դատաքննական ցուցմունքներում առակ էական հակասությամբ պայմանավորված՝ դատարանը հրապարակեց նրա նախաքննական ցուցմունքը, որտեղ վկան հայտնել էր, որ Մերի Մարգարյանի հիվանդասենյակ է մտել և նրա ինքնազգացողության մասին հետաքրքրվել:

Սակայն տուժող կողմի պնդմամբ բուժքույրը Մերի Մարգարյանի մոտ չի մտել և նրա ինքնազգացողությամբ չի հետաքրքրվել:

Հաջորդիվ հարցաքննվեց վկա Լիլիթ Գրիգորյանը, վերջինիս պնդմամբ՝ ինքը 2015թ ողջ հուլիս ամսին եղել է «Շենգավիթ» ԲԿ-ի ծնարանի պատասխանատու հերթապահը, սակայն վկան Մերի Մարգարյանի հետ առնչություն չի ունեցել, քանի որ նա ծնարան չի մտել:

Միևնույն ժամանակ վկան նշեց, որ ինքը տեղեկացել է, որ կա նման հղի, ով սուր շնչառական հիվանդությամբ ընդունվել է ԲԿ և որ գտնվում է հետազոտման փուլում. արյան բիոքիմիական և այլ անալիզներ է հանձնել, սակայն արդյունքների մասին ինքը տեղյակ չի եղել, քանի որ հղիի հսկող բժշկուհին Շուշանիկ Բախշյանն է եղել:

Նրա ցուցմունքում ևս կար հակասություն. նախաքննության ընթացքում վկան հայտնել էր, որ այդ անալիզների արդյունքների մասին հետագայում տեղեկացել է, որ նորմայից շեղումներ են հայտնաբերվել:

Հաջորդ՝ դեկտեմբերի 13-ին կայանալիք նիստում դատակոչված վկաների հարցաքննությունը կշարունակվի:

Աղբյուր` Փաստինֆո