Փաստ ինֆո

Վերաքննիչ քրեական դատարանը մերժել է արդարացման դատավճռի դեմ մեղադրող դատախազի կողմից բերված բողոքը՝ օրինակ ուժի մեջ թողնելով առաջին ատյանի դատարանի դատավճիռը:

Մասնավորապես, առաջին ատյանի դատարանի՝ 19.07.2016թ.դատավճռով ճամբարակի առողջության կենտրոնի քիթ-կոկորդ ականջաբան Ոոզա Ավալյանը, ով մեղադրվում էր ՀՀ քրեական օրենսգրքի 315-րդ հոդվածի 1-ին մասով անպարտ է ճանաչվել և արդարացվել արարքում հանցակազմի բացակայության հիմքով:

Ավելի վաղ տեղեկացրել էինք, որ մեղադրող դատախազը միջնորդել էր բեկանել Ռոզա Ավալյանի վերաբերյալ արդարացման դատավճիռը, կայացնել մեղադրական դատավճիռ՝ Ավալյանին մեղավոր ճանաչել առաջադրված մեղադրանքում՝ նրան դատապարտելով տուգանքի 300.000 ՀՀ դրամի չափով կամ քրեական գործն ուղարկել նոր կազմով նոր քննության` սահմանելով նոր քննության ծավալը:

Ըստ մեղադրանքի՝ Ճամբարակի առողջության կենտրոնի քիթ-կոկորդ ականջաբան Ռոզա Ավալյանը ընդգրկված է եղել Ճամբարակի զինկոմիսարիատի զորակոչային հանձնաժողովի կազմում, և օժտված լինելով ժամկետային պարտադիր զինվորական ծառայության զորակոչի ընթացքում զորակոչային տարիքի արական սեռի ՀՀ քաղաքացիների անվճար ատամնաբուժական հետազոտություն կատարելու իրավասությամբ, Գեղարքունիքի մարզի Այգուտ գյուղի բնակիչ Նվեր Հովհաննիսյանի ատամնաշարի հետազոտություն կատարելիս, ծառայության նկատմամբ անփույթ վերաբերմունք է դրսևորել, որի հետևանքով պատշաճ կերպով չի կատարել իր պարտականությունները:

Մասնավորապես, չի հայտնաբերել Ն. Հովհաննիսյանի մոտ առկա զինվորական ծառայության համար ոչ պիտանի ճանաչվելու համար հիմք հանդիսացող «Վերին և ստորին ծնոտների մասնակի երկրորդային ադենտիա» 7 ծամիչ՝ ստորին, 3 ծամիչ՝ վերին ծնոտների վրա, ծամողական ֆունկցիայի չափավոր խանգարումով» հիվանդությունը:

Քիթ-կոկորդ ականջաբանը, ով ատամնաբույժի պարտականություններ է ստանձնել՝ Նվեր Հովհաննիսյանի անձնական գործում կատարել է նրա ատամնաշարի որևէ պաթոլոգիա չունենալու վերաբերյալ, իրավաբանական փաստի ուժ ունեցող գրառում, ինչի հիման վրա Ճամբարակի զինկոմիսարիատում հաստատվել է, որ նա զինծառայության համար պիտանի է 14-07-2015թ. զորակոչվել է ՀՀ զինված ուժեր:

Սակայն ՀՀ ՊՆ կենտրոնական ռազմաբժշկական հանձնաժողովի որոշմամբ Նվեր Հովհաննիսյանը վաղաժամկետ զորացրվել է ՀՀ ԶՈՒ պահեստազոր, իսկ մինչ այդ նա շուրջ 2 ամիս տևողությամբ ծառայել է ՀՀ զինված ուժերում, որով անզգուշությամբ ոտնահարվել են նրա սահմանադրական իրավունքները, իսկ պետության և հասարակության շահերին պատճառվել է էական վնաս:

Ծառայության համար ոչ պիտանի, Գեղարքունիքի մարզի Այգուտ գյուղի բնակչին տրվել է սխալ ախտորոշում, որի հետևանքով վերջինս զորակոչվել է բանակ և շուրջ 2 ամիս ծառայել Զինված ուժերում:

Աղբյուր` Փաստինֆո