Փաստ ինֆո

Իտալիայի բնակիչները հանրաքվեում հանդես են եկել սահմանադրական բարեփոխման դեմ: Կառավարության օրինագծի տապալումից հետո վարչապետ Մատտեո Ռենցին հայտարարել է իր հրաժարականի մասին:

Ըստ «ՌԻԱ Նովոստի»-ի, քվեարկությունն անց է կացվել նախօրեին: Երկրի ՆԳՆ տվյալներով, իտալացիների մեծամասնությունը՝ 59,11%-ը դեմ են արտահայտվել երկրի հիմնական օրենքում ուղղումներ մտցնելուն:

Հանրաքվեին միայն մեկ հարց էր քննարկվում՝ սահմանադրության մեջ ուղղումներ կատարելու հարցը: Մատտեո Ռենցիի կառավարության մշակած նախագիծը ենթադրում էր Սենատի աշխատանքի էական փոփոխություններ:

Այսպես, նախատեսվում էր, որ խորհրդարանը կազմավորելու են շրջանային խորհուրդները, որոնցից Սենատ պետք է մտնեին 74 խորհրդականներ և իտալական քաղաքների 21 քաղաքապետեր: Եվս հինգ պառլամենտականների պետք է նշանակեր երկրի նախագահը:

Եթե ուղղումներն ընդունվեին, ապա Սենատը կկրճատվեր երեք անգամից ավելի՝ 315-ից մինչև հայուրի: Ընդ որում, սպառնալիքի տակ կհայտնվեին նաև պառլամենտի լիազորությունները՝ Ռենցին առաջարկում էր սենատորներին թողնել միայն մի շարք հարցեր՝ կապված բարեփոխումների անցկացման և սահմանադրության փոփոխության հետ:

Բացի այդ, սահմանադրական բարեփոխումները ենթադրում էին լիազորությունների վերաբաշխում շրջանային և կենտրոնական իշխանությունների միջև:

Մատտեո Ռենցին մեծ հույսեր էր կապում իր օրինագծի հետ: Մինչև քվեարկությունը նա բազմիցս ակնարկում էր, որ հրաժարական կտա հանրաքվեի տապալման դեպքում:

«Եթե ես հանրաքվեում պարտվեմ, դա կնշանակի իմ քաղաքականության տապալում»,- հայտարարել է Ռենցին քվեարկությունից մի քանի օր առաջ:

«Վաղը ցերեկը ես կհրավիրեմ նախարարների խորհրդի նիստ, իսկ հետո կգնամ Քվիրինալյան պալատ և Հանրապետության նախագահին հրաժարական կներկայացնեմ»,- ասել է Ռենցին հանրաքվեի արդյունքների վերաբերյալ ասուլիսում:

Ընդ որում, վարչապետը նշել է, որ քվեարկությունը դարձել է «ժողովրդավարության մեծ տոն»: Ըստ նրա, ինքը երջանիկ ու հպարտ է Իտալիայի համար:

Աղբյուր` Փաստինֆո