Փաստ ինֆո

«Բարգավաճ Հայաստան» կուսակցության նախկին առաջնորդ Գագիկ Ծառուկյանը վերադառնում է ակտիվ քաղաքականություն: Այս մասին այսօր հայտարարեց ԱԺ ԲՀԿ խմբակցության ղեկավար Նաիրա Զոհրաբյանը:

«Կարող եմ ասել, որ Գագիկ Ծառուկյանն առաջիկա քաղաքական գործընթացներին մասնակցելու է»,- ասաց Ն.Զոհրաբյանը` հավելելով, որ նա վերադառնում է քաղաքականություն՝ «մեր երկրում լրջագույն փոփոխություններ իրականացնելու համար»:

Ըստ Ն.Զոհրաբյանի` Գագիկ Ծառուկյանը միանշանակ լինելու է ընդդիմադիր դաշտում, իսկ ինչ վերաբերում է ձեւաչափին, ապա այդ մասին առաջիկայում կհաստարարի Գագիկ Ծառուկյանը։ Նա չի բացառել, որ Ծառուկյանը կրկին գլխավորի ԲՀԿ-ն. «Դա մեր ցանկությունն է, դա եղել է մեր առաջակը, որ պարոն Ծառուկյանը կրկին գլխավորի Բարգավաճ Հայաստան կուսակցությունը, բայց առաջիկայում նա հանդես կգա հրապարակային հայտարարությամբ, և բոլոր հարցերի պատասխանը կտա»:

«Ես հասկանում եմ, որ շաբաթ օրվանից հայաստանյան դեղատներում վալերիանկայի, կարվալոլի, ինսուլինի բոլոր պաշարները սպառվել են: Հասկանում եմ, որ ոչ իշխանական դաշտում շատ քաղաքական ուժերի բոլոր սցենարները խառնվել են, որովհետև մարդիկ նստել ուիրենց համար խորհրդարանը լեյտենանտ Շմիդտի որդիների նման բաժանել են և Ծառուկյանի վերադարձն ակտիվ քաղաքականություն բոլորի սցենարները խառնել է։ Քաղաքական շաքարախտը շատերի մոտ բարձրացել է և դրա համար ինսուլին արդեն չկա խանութներում, բայց մեկ բան կարող եմ ասել` ես նայում եմ այդ անորակ գրառումները սոցցցանցերում… գիտեք, չարությունը, կեղտը, ատելությունը բումերանգի նման վերադառնալու է բոլոր նրանց: Փոքր է քաղաքական դաշտը, բոլորս էլ գիտենք, թե այդ ֆեյքերը որ քաղաքական ուժի տիրույթում են գործում »,- ասաց խմբակցության ղեկավարը:

Ն.Զոհրաբյանը բացարձակ ապատեղեկատվություն որակեց այն, որ Գ.Ծառուկյանն իր վերադարձը համաձայնեցրել է Սերժ Սարգսյանի հետ:

Աղբյուր` Փաստինֆո