Փաստ ինֆո

Քաղաքաշինության պետական կոմիտեի մամուլի քարտուղարը մեկնաբանությամբ է հանդես եկել՝ Նարեկ Սարգսյանի՝ վիճակախաղով միլիոնից ավելի գումար շահելու վերաբերյալ:

Այս կապակցությամբ Կոմիտեի մամուլի քարտուղար Անահիտ Եսայանը գրառում է կատարել ֆեյսբուքյան իր էջում, որում մասնավորապես ասվում է.

«Փաստ» նորահայտ օրաթերթը ՀՀ ԿԱ քաղաքաշինության պետական կոմիտեի նախագահ Նարեկ Սարգսյանի եկամուտների հայտարարագիրը խոշորացույցով ուսումնասիրելով ՝ գումարել-հանելով, բազմապատկել-բաժանելով, վիճակագրություն և համեմատություն անցկացնելով, իր խելքին շերլոկհոլմսյան հայտնագործություն է արել՝ թերթի 4-րդ էջում դեկտեմբերի 2-ին տպագրված «Նարեկ Սարգսյանը վիճակախաղով միլիոնից ավելի գումար է շահել» վերնագրով հրապարակման մեջ «պարզելով», որ Նարեկ Սարգսյանի եկամուտները հունվարի 1–ից մինչև հոկտեմբերի 17–ն ընկած ժամանակահատվածում կազմել են 10 միլիոն 210 հազար դրամ, որից 8 միլիոն 540 հազարը աշխատավարձն է, իսկ 1 միլիոն 670 հազար դրամը մրցույթների կամ մրցությունների, ինչպես նաև վիճակախաղերի իրային կամ դրամական շահումներից ստացված գումարն է:

Եթե տվյալ թերթի նպատակը Նարեկ Սարգսյանի անվան հաշվին ինքնահաստատվելը չէր, տարրական էթիկան պահանջում էր հերթական հիմարությունը շրջանառելուց առաջ իրազեկ աղբյուրից ճշտել հանրությանը փոխանցվող տեղեկատվությունը:

Ի տեղեկություն փաստերը խեղաթյութելու կամ ծուռ ներկայացնելու, հատկապես հրապարակման վերնագրում չճշտված տեղեկատվություն տրամադրելու հնարքին դիմող «Փաստ» օրաթերթի, հայտնեմ իրականությունը. Ձեր թվաբանական հաշվարկի արդյունքում հայտնաբերված 1 մլն 667 հազար դրամը 2015 թվականին ճարտարապետության և քաղաքաշինության բնագավառում Երևանի Վազգեն Սարգսյան 3 հասցեում կառուցված կառավարական վարչական նոր համալիրի համար պետական մրցանակի արժանացած ՀՀ վաստակավոր ճարտարապետ Նարեկ Սարգսյանի պետմրցանակով սահմանված գումարն է, որը 2016 թվականի սկզբին ստանալով /անդորրագիրը պահպանվում է/՝ նույն օրն էլ նա ամբողջությամբ որպես նվիրատվություն փոխանցել է Գյումրիի «Շիրակ» կենտրոն Հ/Կ-ին՝ որպես աջակցություն հասարակական կազմակերպության կողմից Գյումրիի անապահով ընտանիքների համար իրականացվող ծրագրերի»:

Աղբյուր` Փաստինֆո