Փաստ ինֆո

Երևանի բնակիչը որդուն 2016թ-ի ամառային զորակոչին տարեկետում տրամադրելու նպատակով 7000 ԱՄՆ դոլար է տվել քաղաքացուն, ով խոստացել է գործարքը կատարել, սակայն տղան բանակ է գնացել, իսկ գումարը ետ չի վերադարձվել:

Այդ մասին իր ֆեյսբուքյան էջում գրառում է կատարել ՀՀ ՊՆ մամլո խոսնակ Արծրուն Հովհաննիսյանը:

Գրառման մեջ մասնավորապես ասվում է.

ՀՀ ՊՆ ռազմական ոստիկանության քրեական հետախուզության բաժնում ստացված օպերատիվ տեղեկությունները իրացնելիս, Երևան քաղաքի բնակիչ Լ. Մ. Հ-ն /ծնված 10.08.1969թ., 01.12.2016թ-ին ՀՀ ՊՆ ռազմական ոստիկանության քրեական հետախուզության բաժնում հաղորդում և բացատրություն է տվել այն մասին, որ 2016թ-ի փետրվար ամսին քաղաքացի Ն. Է. Ե. /ծնված 04.04.1974թ. միջնորդությամբ և երաշխավորությամբ 7000 ԱՄՆ դոլար հետագայում ևս 250.000 ՀՀ դրամ գումար է տվել ոմն Ե. Մ.-ին՝ որդուն՝ Տ. Լ. Հ.-ին 2016թ-ի ամառային զորակոչին տարեկետում տրամադրելու նպատակով:

Սակայն Տ. Լ. Հ.-ն 2016թ-ի հուլիսի 7-ին զորակոչվել է ՀՀ ԶՈՒ պարտադիր ժամկետային զինվորական ծառայության: Ե. Մ.-ն վերը նշվածը չի կատարել, Լ.Մ.Հ.-ն գումար չի վերադարձրել:

Փաստի առթիվ ՀՀ ՊՆ ռազմական ոստիկանության քրեական հետախուզության բաժնում նախապատրաստվում են նյութեր:

ՀՀ ՊՆ ռազմական ոստիկանությունը հորդորում է զորակոչիկների և զինծառայողների ծնողներին զերծ մնալ խարդախներից, որոնք զինծառայությունից ազատելու պատրվակով ծնողներից խոշոր չափի գումարներ են կորզում:

Վստահեցնում ենք, որ ռազմական ոստիկանության աշխատակիցների օպերատիվ-հետախուզական միջոցառումների արդյունքում նմանատիպ գործողությունները կկասեցվեն, իսկ կատարող անձինք կպատժվեն օրենքի ամբողջ խստությամբ:

Աղբյուր` Փաստինֆո