Փաստ ինֆո

Սույն թվականի նոյեմբերի 30-ին տեղի ունեցավ ԵԱՀԿ երևանյան գրասենյակի աջակցությամբ ՀՀ մարդու իրավունքների պաշտպանի աշխատակազմի կողմից կազմակերպված՝ ՀՀ կառավարության կողմից մշակված «Հաշմանդամություն ունեցող անձանց իրավունքերի պաշտպանության և սոցիալական ներառման մասին» ՀՀ օրենքի նախագծի հանրային քննարկում: Այս մասին հայտնում է ՄԻՊ  աշխատակազմը: 

Քննարկմանը հրավիրված էին մասնակցելու ինչպես շահագրգիռ պետական մարմինների, այնպես էլ միջազգային և հասարակական կազմակերպությունների ներկայացուցիչներ:

Քննարկման ընթացքում բացման խոսքով հանդես եկան ՀՀ մարդու իրավունքների պաշտպան Արման Թաթոյանը, ՀՀ աշխատանքի և սոցիալական հարցերի նախարար Արտեմ Ասատրյանը և ՀՀ սպորտի և երիտասարդության հարցերի նախարար Հրաչյա Ռոստոմյանը:

Հանրային քննարկման ընթացքում Նախագիծը ներկայացվեց ՀՀ աշխատանքի և սոցիալական հարցերի նախարարության ներկայացուցչի կողմից, որից հետո Նախագծի վերաբերյալ իրենց նկատառումները ներկայացրեցին ՀՀ մարդու իրավունքների պաշտպանի աշխատակազմի ներկայացուցիչը, «Ունիսոն» հասարակական կազմակերպության նախագահ Արմեն Ալավերդյանը և «Հաշմանդամություն ունեցող  անձանց շահերի պաշտպանության ազգային դաշինք» ԻԱՄ-ի գործադիր տնօրեն Զարուհի Բաթոյանը:

Բանախոսները մասնավորապես նկատառումներ ներկայացրեցին ՄԱԿ-ի Հաշմանդամություն ունեցող անձանց իրավունքների մասին կոնվենցիայի (Կոնվենցիա) դրույթներին Նախագծի համապատասխանության վերաբերյալ, հատկապես «հաշմանդամություն» հասկացության ձևակերպման, հաշմանդամության կանխարգելումը՝ որպես հաշմանդամություն ունեցող անձանց իրավունքների պաշտպանության և սոցիալական ներառման պետական քաղաքականության հիմնական նպատակներիցմեկը սահմանելու, Նախագծում հաշմանդամություն ունեցող երեխաների և կանանց իրավունքների տեսանկյունից կարգավորումների նախատեսման, Կոնվենցիայով սահմանված ազգային մշտադիտարկման գործառույթի իրականացման համար անկախ մեխանիզմի նախատեսման և այլ հարցերի վերաբերյալ:  

Նկատառումների ներկայացումից հետո տեղի ունեցավ քննարկում և հարց ու պատասխան, որի ընթացքում հասարակական և միջազգային կազմակերպությունների ներկայացուցիչները ներկայացրեցին իրենց դիտարկումներն ու մտահոգությունները Նախագծի վերաբերյալ: Հասարակական կազմակերպությունները ներկայացրեցին նաև գործնականում իրենց կողմից արձանագրված և հաշմանդամություն ունեցող անձանց իրավունքների և ազատությունների  վերաբերյալ խնդիրները:

Հաշվի առնելով այն, որ Նախագիծը հավանության է արժանացել ՀՀ կառավարության 2016 թվականի նոյեմբերի 3-ին տեղի ունեցած նիստում և ներկայացվել է ՀՀ Ազգային Ժողով՝ միջոցառման ընթացքում ներկայացված կարծիքներն ու առաջարկները կամփոփվեն և կներկայացվեն ՀՀ Ազգային ժողով:

Աղբյուր` Փաստինֆո