Փաստ ինֆո

Թուրքիայի նախագահ Ռեջեփ Թաիբ Էրդողանի խոսքերը Սիրիսյի նախագահ Բաշար Ասադին տապալելու վերաբերյալ չեն համընկնում Սիրիայի իրավիճակի կարգավորման՝ Մոսկվայի դիրքորոշման հետ:

Կրեմլում հույս ունեն, որ Անկարան կտա պարզաբանումներն այդ առթիվ, ըստ «ՌԻԱ Նովոստի»-ի, լրագրողներին հայտնել է ռուսաստանյան նախագահի մամուլի քարտուղար Դմիտրի Պեսկովը:

Նախօրեին Էրդողանը պատմել է, որ Անկարան Սիրիայում սկսել է ռազմական գործողություն՝ վերջ դնելու համար Բաշար Ասադի կառավարմանը:

«(Էրդողանի) հայտարարությունը իսկապես նորություն է դարձել: Դա շատ լուրջ հայտարարություն է: Հայտարարությունը, որն ընդհանուր առմամբ նախկինների հետ աններդաշնակություն է մտցնում, և աններդաշնակ է մեր՝ որպես պետություն, իրավիճակի ընկալման հետ, պետություն, որի զինված ուժերը միակն են, որոնք լեգիտիմ կերպով գտնվում են Սիրիական Արաբական Հանրապետության տարածքում՝ համապատասխան լեգիտիմ իշխանությունների դիմումի հիման վրա, դա շատ կարևոր է հիշել»,- լրագրողներին հայտարարել է Պեսկովը՝ մեկնաբանելով Էրդողանի արտահայտությունը:

Կրեմլի ներկայացուցիչը նաև նշել է, որ դեռ վաղ է խոսել ռուս-թուրքական հարաբերությունների վրա Էրդողանի խոսքերի ազդեցության մասին:

«Այդ հայտարարությունը նոր է: Այդ պատճառով ինչ-ինչ դատողություններ անելուց առաջ, մենք ակնկալում ենք այդ դիրքորոշման հետ կապված պարզաբանում»,- հավելել է Պեսկովը:

Ռուսաստանի ԱԳՆ ներկայացուցիչ Մարիա Զախարովան ավելի վաղ նշել է, որ սիրիական հարցում Մոսկվան ելնում է Թուրքիայի հետ պայմանավորվածություններից:

«Մենք հենվում ենք այն հայտարարությունների վրա, որ Անկարայի, մասնավորապես, Թուրքիայի ղեկավարի կողմից հրապարակավ արվել են, և որոնք ընկած են պայմանավորվածությունների հիմքում, որոնց Թուրքիան մասնակցում է», - ընդգծել է դիվանագետը՝ հավելելով, որ խոսքը ոչ միայն երկկողմ փաստաթղթերի, այլև միջազգային համաձայնագրերի մասին է, որոնց Թուրքիան միացել է:

Աղբյուր` Փաստինֆո