Փաստ ինֆո

Ստամբուլի ծանր հանցագործությունները քննող 14-րդ դատարանում շարունակվել է հայկական «Ակոս» պարբերականի նախկին գլխավոր խմբագիր Հրանտ Դինքի սպանության հարցով պետական պաշտոնյաների դեմ հարուցված դատական գործը։ Դատական լսումները շարունակվելու են մինչև դեկտեմբերի 2-ը։ Ինչպես հաղորդում է «Արմենպրես»-ը, այս մասին տեղեկացնում է «Ակոս»-ը:

Նիստին մասնակցել են կալանավորված մեղադրյալներ Ռամազան Աքյուրեքն ու Օգյուն Սամասթը։ Դատական նիստին ներկա էին նաև Դինքի սպանության ժամանակահատվածում Ոստիկանության հետախուզության բաժնի աշխատակիցներ Թամեր Բյուլենթ Դեմիրելը, Օսման Գյուլբելը և Ալի Փոյրազը, ովքեր ձերբակալվել են գյուլենականների դեմ հետաքննության շրջանակում։

Յասին Հայալը, Շուքրու Յըլդըզը, Մեհմեդ Ալի Օզքըլընչը, Օզքան Մումջուն և Համդի Էգբաթանը բանտախցերից տեսակապի միջոցով են մասնակցել դատական նիստին։ Ազատության ﬔջ գտնվող մեղադրյալներից միայն Ահմեդ Իլհան Գյուլերն է ներկա եղել դատական նիստին։

Ցուցմունք է տվել Թամեր Բյուլենթ Դեմիրելը, ով Դինքի սպանության ժամանակ ոստիկանության հետախուզության «C» բաժնի պետի տեղակալի պաշտոնն էր զբաղեցնում։ Նա նշել է, որ իրեն առաջադրված մեղադրանքներն անհիմն են։ Նա հայտնել է նաև, որ չի հիշում, թե 2006թ․ հետախուզության «C» ստորաբաժանումն իր լիազորության տակ է եղել, թե ոչ, սակայն Հրանտ Դինքի հետ կապված փաստաթղթին ինքն է նայել։

Դեմիրելը նշել է, որ Յասին Հայալին ավելի վաղ իրականացրած պայթյունի պատճառով գիտեին։ Նա հերքել է այն մեղադրանքը, թե իրենք փաստաթուղթ են թաքցրել՝ նշելով, որ փաստաթուղթը արխիվացվել է, և ցանկացողները կարող էին տեսնել այն։ Դեմիրելը փաստել է, որ անվտանգությունն ապահովելու պատասխանատվությունը Ստամբուլին է պատկանում, և ինքը չի հիշում մի դեպք, երբ «Հետախուզությունը ապահովի որևէ մեկի անվտանգությունը»։

Պատասխանելով հարցին, թե զեկույցի մասին իր ղեկավարներին տեղյակ պահե՞լ է, թե՞ ոչ՝ Դեմիրելը նշել է․ «Չեմ հիշում՝ տեղյակ պահել եմ, թե ոչ։ Սակայն փաստաթղթի վրա անհրաժեշտ հրահանգները գրել եմ։ Ամեն դեպքի հետևում կան նման բաներ։ Անկարայում 100 մարդ զոհվեց, Ստամբուլում զբոսաշրջիկներ զոհվեցին․ եթե այս դեպքերին էլ նայեք, նման բաներ կտեսնեք»։

Դինք ընտանիքի փաստաբաններից Հաքան Բաքըրջըօղլուն Դեմիրելին հարցրել է, թե «աղմկահարույց գործողություն» գրությունը Ստամբուլ ուղարկելուց հետո Ստամբուլի և Տրապիզոնի հետ կապը պահել են, թե ոչ։ Դեմիրելն ի պատասխան նշել է, որ նահանգային ստորաբաժանումն աշխատում և տեղեկություն է փոխանցում, սակայն դրանից բացի ուրիշ կապ չի եղել։

Դինքի սպանության գործով դատական նիստում ցուցմունք է տվել նաև սպանության ժամանակաշրջանում Հետախուզության բաժնի աշխատակից Ալի Փոյրազը, ով նշել է, որ 2006թ․ սկսել է աշխատել «C» ստորաբաժանումում՝ փոքրամասնությունների և ծայրահեղականների բաժանմունքում, և որ Դինքի սպանության ծրագրի մասին «F4» զեկույցն իր պաշտոնավարման ժամանակ գոյություն չի ունեցել։ «Նոր-նոր էի փորձում հասկանալ ստանձնածս պարտականությունները, երբ այդ դաժան դեպքը տեղի ունեցավ։ Դինքի անունն այդ դեպքից հետո եմ լսել։ «Ակոս»-ի մասին էլ չգիտեի։ Սպանությունից հետո եմ իմացել, որ «C» ստորաբաժանումն է հետաքրքրվում այդ հարցով»,- նշել է Փոյրազը։

Ալի Փոյրազը մեղադրվում է պաշտոնի չարաշահման և զինված հանցավոր խմբավորմանն անդամակցելու մեջ։ Հերքելով երկու մեղադրանքները՝ Փոյրազը նշում է․ «Ինչպե՞ս կարող էի պաշտոնս չարաշահել, եթե տեղեկություն չունեի։

Պատասխանատվության եմ ենթարկվում մի ժամանակաշրջանի համար, երբ չկայի»։

Փոյրազը նաև նշել է, որ մինչ ինքը ձերբակալված է, նույն շրջանում Տրապիզոնի հետախուզության բաժնի պետի տեղակալ և Ստամբուլի հետախուզության բաժնի պետի տեղակալի պաշտոնը զբաղեցնողներն ազատ են, ինչն էլ ապացույցն է նրա, որ իրենցից ոչ ոք զինված հանցախմբի մաս չի կազմում:

Աղբյուր` Փաստինֆո