Փաստ ինֆո

Խորհրդարանը քննարկում է «Ազգային ժողովի կանոնակարգ» ՀՀ օրենքի նախագիծն առաջին ընթերցմամբ ընդունելու հարցը:

Հիմնական զեկուցող, Ազգային ժողովի ՀՀԿ խմբակցության պատգամավոր Հովհաննես Սահակյանն ընդգծեց, որ այս տարվա հունվարից ձևավորվել է աշխատանքային խումբ, որը մշակել է ԱԺ նոր կանոնակարգ-օրենքը:

«Ազգային ժողովի կանոնակարգ-օրենքը մինչև հանձնաժողովում քննարկելը մենք քննարկել ենք մեր գործընկեր պատգամավորների հետ, ովքեր ներկայացրել են իրենց առաջարկները, որոնց մի մասն ընդունվել և ներառվել է նախագծում: Այս նախագծի մշակման համար որպես հայեցակարգ մենք ընդունել ենք նոր Սահմանադրության դրույթները»,- «Արմենպրես»-ի հաղորդմամբ՝ նշեց Սահակյանը:

Պատգամավորը ներկայացրեց մի քանի կարևոր դրույթներ, որոնք նշված են նախագծում: Հովհաննես Սահակյանն ընդգծեց, որ պատգամավորներին ամենաշատը հետաքրքրող դրույթը նստաշրջանների և հերթական նիստերի ժամանակացույցն է:

«Մենք պատկերացրել ենք, որ պետք է մեր նիստերը շարունակենք քառօրյա ձևաչափով, սակայն երկուշաբթի օրերը մենք սահմանել ենք Ազգային ժողովի խորհրդի նիստերի օր: Այդ օրը խորհուրդը սահմանում է հարցերի քննարկման ժամանակացույցը, որից հետո հաջորդ օրն առավոտյան ժամը 10:00-ից սկսվում են մեր աշխատանքները մինչև երեկոյան 18:00-ն: Նիստերը կարող են շարունակվել մինչև օրակարգի սպառումը: Մենք փորձում ենք կիրառել այս ճկուն համակարգը, որպեսզի նախագծերի կուտակումներ չունենանք, չլինեն չսպառված հարցեր, պատգամավորներին հնարավորություն տանք, որպեսզի իրացնեն իրենց օրենսդրական նախաձեռնությունները»,- նշեց Սահակյանը:

Հովհաննես Սահակյանը բացատրեց նաև, թե ինչ է իրենից ներկայացնելու Ազգային ժողովի խորհուրդը: Նա ընդգծեց, այդ կոլեգիալ մարﬕնը կազմված է լինելու հանձնաժողովների և խմբակցությունների ղեկավարներից, Ազգային ժողովի նախագահից և տեղակալներից:

«Հիմա այն հարցերը, որ մենք քննարկել ենք ուրբաթ օրերին՝ օրակարգը հաստատելու հետ կապված, թողնվել են միայն Ազգային ժողովի նախագահի հայեցողությանը, իսկ այս դեպքում որոշումները կընդունվեն կոլեգիալ եղանակով՝ խորհրդի որոշմամբ»,- պարզաբանեց Հովհաննես Սահակյանը:

Աղբյուր` Փաստինֆո