Փաստ ինֆո

Սյունիքի մարզի ընդհանուր իրավասության դատարանը՝ դատավոր Ա.Մնացականյանի նախագահությամբ, անպարտ է ճանաչել և արդարացրել Տիգրան Մովսիսյանին ՀՀ քրեական օրենսգրքի 243-րդ հոդվածով՝ տրանսպորտային միջոցը հարբած կամ 16 տարին չլրացած անձին հանձնելը, առաջադրված մեղադրանքում՝ արարքի մեջ հանցակազմի բացակայության հիմքով:

Տիգրան Մովսիսյանի նկատմամբ ընտրված խափանման միջոցը` չհեռանալու մասին ստորագրությունը, վերացվել է:

Մինչ դատաքննությունը սկսելն ամբաստանյալ Տիգրան Մովսիսյանը միջնորդել էր դատական քննությունն անցկացնել արագացված կարգով՝ հայտնելով, որ համաձայն է մեղադրանքի հետ:
Դատարանն որոշում է կայացրել արագացված կարգով դատական քննություն անցկացնելու մասին:

Դատարանը, հիմք ընդունելով մեղադրանքի հիմքում դրված ապացույցները, հաստատված է համարել, որ ամբաստանյալ Տիգրան Մովսիսյանը 2016 թվականի ապրիլի 21-ին` ժամը 21:00-ի սահմաններում, իր անձնական օգտագործման «NISSAN FUGA 2,5» մակնիշի ավտոմեքենան հանձնել է թեթև աստիճանի հարբած վիճակում գտնվող` Սյունիքի մարզի Լեռնաձոր գյուղի բնակիչ Ալյոշա Մարությանին, ով նույն օրը` ժամը 21:30-ի սահմաններում, Կապան քաղաքի Գետափնյա փողոցում` «ԿԱՊ-ՊԱՀԱԾՈ» ՍՊ ընկերության հարակից հատվածում թույլ է տվել ՃԵԿ-ի 65-րդ կետի, այն է`«վարորդը տրանսպորտային միջոցը պետք է վարի սահմանված արագությունը չգերազանցող արագությամբ` հաշվի առնելով երթևեկության ինտենսիվությունն ու տրանսպորտային միջոցի և բեռի վիճակն ու առանձնահատկությունները, ճանապարհային և օդերևութաբանական պայմանները, մասնավորապես, ճանապարհային ծածկույթի վիճակն ու տեսանելիությունը երթևեկության ուղղությամբ», ՃԵԿ-ի 66-րդ կետի այն է` «վարորդը պետք է ընտրի այնպիսի արագություն, որը հնարավորություն է տալիս նրան կանոնների պահանջներին համապատասխան ապահովելու տրանսպորտային միջոցի լիարժեք կառավարումը», «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի, այն է` «ճանապարհային երթևեկության մասնակիցը պարտավոր է պահպանել ՀՀ ՃԵԿ-ը», 24-րդ հոդվածի 7-րդ մասի` «վարորդին արգելվում է տրանսպորտային միջոցը վարել ոչ սթափ վիճակում, ու իր գործողություններով չստեղծել վթարային իրադրությունե պահանջները, իր գործողություններով ստեղծել է վթարային իրադրություն, դրանով իսկ պայմանավորվել տվյալ վթարի առաջացումը` ինքն իրեն զրկելով այն կանխելու տեխնիկական հնարավորությունից, ենթարկվել է վթարի, որի հետևանքով առաջացել է ՀՀ քրեական օրենսգրքի 242-րդ հոդվածի 1-ին մասով նախատեսված հետևանքներ, այն է` «NISSAN FUGA 2,5» մակնիշի ավտոմեքենայի ուղևոր Տիգրան Մովսիսյանի առողջությանը պատճառվել է միջին ծանրության վնաս` առողջության տևական քայքայումով և տեղափոխվել է «Կապան ԲԿ» ՓԲ ընկերություն:

Արձանագրելով, որ Տիգրան Մովսիսյանը տրանսպորտային միջոցը հանձնել է հարբած անձին, և որ դրա հետևանքով մարդու (տվյալ դեպքում` Տիգրան Մովսիսյանի) առողջությանն անզգուշությամբ պատճառվել է միջին ծանրության վնաս, նման պայմաններում Դատարանը փաստել է, որ Տիգրան Մովսիսյանի արարքը ձևականորեն պարունակում է ՀՀ քրեական օրենսգրքի 243-րդ հոդվածով նախատեսված հատկանիշները:

Միաժամանակ Դատարանը գտել է, որ Տիգրան Մովսիսյանի արարքն իր նվազ կարևորության պատճառով հասարակական վտանգավորություն չի ներկայացնում, այսինքն` ֆիզիկական կամ իրավաբանական անձին, հասարակությանը կամ պետությանը էական վնաս չի պատճառել և չէր կարող պատճառել:

Դատարանի եզրահանգման համաձայն, ՀՀ քրեական օրենսգրքի 243-րդ հոդվածով նախատեսված հանցակազմը նյութական է, այսինքն` հանրորեն վտանգավոր հետևանքները (խոշոր վնաս առաջանալը, մարդու առողջությանը միջին ծանրության վնաս պատճառվելը, մարդու առողջությանը ծանր վնաս պատճառվելը, մարդու մահ առաջանալը, երկու կամ ավելի մարդու մահ առաջանալը) հանդիսանում են հանցակազմի պարտադիր հատկանիշ, իսկ դրանց բացակայությունը բացառում է նշված հանցակազմի առկայությունը: Այլ կերպ ասած` տրանսպորտային միջոցը հարբած կամ տասնվեց տարին չլրացած անձին հանձնելը ինքնին (առանց հանրորեն վտանգավոր հետևանքներ առաջանալու) չի առաջացնում ՀՀ քրեական օրենսգրքի 243-րդ հոդվածով նախատեսված պատասխանատվություն:

ՀՀ քրեական օրենսգրքի 243-րդ հոդվածի իմաստով առաջացած միակ հանրորեն վտանգավոր հետևանքը ամբաստանյալ Տիգրան Մովսիսյանի առողջությանը պատճառված միջին ծանրության վնասն է: Այլ կերպ ասած` ամբաստանյալ Տիգրան Մովսիսյանին վերագրվող արարքի արդյունքում առաջացած հետևանքների (պատճառված վնասի) կրողը բացառապես Տիգրան Մովսիսյանն է:

ՀՀ քրեական օրենսգրքի 243-րդ հոդվածի իմաստով, բացի Տիգրան Մովսիսյանից, որևէ ֆիզիկական կամ իրավաբանական անձի, հասարակությանը կամ պետությանը վնաս չի պատճառվել: Ավելին` սույն գործով ՀՀ քրեական դատավարության օրենսգրքով սահմանված կարգով որևէ անձ չի ճանաչվել տուժող:

Ճանապարհային երթևեկության կանոնների խախտում թույլ տալու և Տիգրան Մովսիսյանի առողջությանը միջին ծանրության վնաս պատճառելու կապակցությամբ Ալյոշա Մարությանի նկատմամբ ՀՀ քրեական օրենսգրքի 242-րդ հոդվածի 1-ին մասով քրեական հետապնդում չի իրականացվել` բողոքի բացակայության հիմքով:

Այսպիսով, Դատարանը, նկատի ունենալով, որ Տիգրան Մովսիսյանի արարքն իր նվազ կարևորության պատճառով հասարակական վտանգավորություն չի ներկայացնում, գտել է, որ նրա արարքում բացակայում է ՀՀ քրեական օրենսգրքի 243-րդ հոդվածով նախատեսված հանցակազմը:

Աղբյուր` Փաստինֆո