Փաստ ինֆո

Զանգվածային անկարգությունների վերաբերյալ գործով ամբաստանյալ Արարատ Խանդոյանի պաշտպան, «Ընդդեմ իրավական կամայականության» ՀԿ փաստաբան  Արա Ղարագյոզյանը դիմել է իրավասու մարմնիններին՝ խնդրելով համապատասխան քայլեր ձեռնարկել Արարատ Խանդոյանի խախտված իրավունքները վերականգնելու ուղությամբ: Պաշտպանը խնդրել է նաև կատարել ծառայողական քննություն, թե ինչ հիմքով է կալանավորված անձը պահվում այդ անմխիթար պայմաններոմ, որը հանգեցնում է խոշտանգման:

Մարդու իրավունքների եվրոպական կոնվենցիայի 3-րդ հոդվածի՝ խոշտանգումների արգելում, խախտման հիմքով ՀՀ քրեակատարողական վարչության պետ Ա.Օսիկյանին, Մարդու իրավունքների պաշտպան Ա.Թաթոյանին և ՀՀ Արդարադատության նախարար Ա.Հովհաննիսյանին ուղղած բողոքում պաշտպանը նշում է, որ  «Նուբարաշեն» ՔԿՀ-ի կողմից 24.10.2016 Արարատ Խանդոյանի նկատմամբ կիրառվել է կարգապահական տույժ, որի արդյունքում տեղափոխել են պատժախուց 2, որը գտնվում է նկուղային հարկում՝ ցուրտ և խոնավ, որի պատուհանի ապակին կոտրված է, ցուրտը ներթափանցում է խուց:

Արարատ Խանդոյանը՝ լինելով Արցախյան ազատամարտի մասնակից, որի ընթացքում 12 անգամ վիրավորվել է, կորցրել առողջությունը, մասնավորապես՝ ձախ երիկամը, փայծաղը, լյարդի ձախ բիլթի մի մասը և հաստ աղիքի որոշակի հատվածը:
«Իմ պաշտպանյալի այս վիճակը հաշվի չառնելով՝ նրան տեղեփոխել են անմխիթար վիճակում գտնվող պատժախուց 2: Պատժախուցը չի ջեռուցվում և ամենասարսափելին այն է, որ պատժախցի պատուհանի ապակին կոտրված է, և ցուրտը ներթափանցում է ներս:

Արարատ Խանդոյանի նկատմամբ տեղի է ունենում անմարդկային դաժան վերաբերմունք, որը հանգեցնում է Մարդու իրավունքների եվրոպական կոնվենցիայի 3-րդ հոդվածի խախտման, ոչ ոք չպետք է ենթարկվի խոշտանգումների կամ անմարդկային կամ նվաստացնող վերաբերմունքի կամ պատժի»:

Փաստ է, նշում է փաստաբանը, որ Արարատ Խանդոյանին նման պայմաններով խուց տեղափոխել դա անմարդկային դաժան վերաբերմունք է, նման ձևով անձին ցանկանում են ցրտահարման ենթարկել:

Աղբյուր` Փաստինֆո