Փաստ ինֆո

Նոյեմբերի 23-ին տեղի ունեցավ աշխարհի չեմպիոնի կոչման համար մրցախաղի 10-րդ պարտիան, որում Մագնուս Կարլսենը խաղում էր սպիտակ խաղաքարերով: Աշխարհի չեմպիոնը հերթական անգամ պարտիան սկսեց e4 քայլով: Պարտիայում կիրառվեց իսպանական պաշտպանություն:

Սերգեյ Կարյակինը կարողացավ լուծել սկզբնախաղային խնդիրները և հավասարեցրեց դիրքը, իսկ խաղի 20-րդ քայլին Կարյակինը կարող էր հավերժական շախ հայտարարել մրցակցին` կատարելով փոքր տակտիկական հնարք` 20… Nf2 և սպիտակների 21 Kg2 Nh4! քայլը կտաներ հավերժական շախի, քանի որ Կարլսենը չէր կարող վերցնել Կարյակինի ձին 22 gh4 քայլով, որովհետև 22… Qg6 քայլից հետո սևերը մի քանի քայլում մատ կհայտարարեին սպիտակներին:

Մեկ քայլ անց` Կարլսենի 21 Qh5-ից հետո, Կարյակինը ստացավ հերթական հնարավորություն հասնելու ոչ-ոքի արդյունքի. ռուս գրոսմայստերը կարող էր խաղալ 21… Nf2 22 Kg2 Qf7 23 Kg1 Qf6 24 Kg2 Qf7 և ստիպել մրցակցին կրկնել դիրքը, սակայն հավակնորդը չնկատեց այս հնարավորությունը ևս: Խաղից հետո Կարլսենը նշեց, որ նկատել էր այս քայլերը և երբ Կարյակինը չկատարեց դրանք, հանգստություն զգաց:

Այս վրիպումից հետո նախաձեռնությունն անցավ Կարլսենին: Չնայած այն հանգամանքին, որ սևերը ունեին ամրության մեծ պաշար, Կարլսենը կարողանում էր ճնշում գործադրել Կարյակինի դիրքի վրա: Ստացված  դրությունում աշխարհի չեմպիոնը կարողացավ ստեղծել թուլություններ սևերի պաշտպանությունում, և խաղի 56-րդ քայլին 56… Rg8 քայլի փոխարեն հավակնորդը վրիպեց և խաղաց 56… Rhh7: Կարլսենը ակնթարթորեն օգտվեց այս վրիպումից և խաղի 75-րդ քայլին Կարյակինն անձնատուր եղավ:

Տաս պարտիայից հետո մրցախաղում հաշիվը հավասար է ` 5-5:

Մրցախաղաի 11-րդ պարտիան տեղի կունենա նոյեմբերի 26-ին, Երևանի ժամանակով 23:00-ին:

Աղբյուր` Փաստինֆո