Փաստ ինֆո

Վճռաբեկ դատարանը մերժել է վարույթ ընդունել իշխանության ներկայացուցչի նկատմամբ բռնության գործով մեղադրող դատախազի բողոքը:

Դատախազը խնդրել էր բեկանել ՀՀ վերաքննիչ քրեական դատարանի 2016 թվականի ապրիլի 19-ի որոշումը և օրինական ուժ տալ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2015 թվականի օգոստոսի 6-ի դատավճռին։

Վճռաբեկ դատարանը գտնել է, որ բողոքաբերի փաստարկները բավարար չեն եզրահանգելու, որ առերևույթ առկա է ՀՀ քրեական դատավարության օրենսգրքի 406-րդ հոդվածի 1-ին մասի 1-ին կետով նախատեսված դատական սխալ` նյութական կամ դատավարական իրավունքի այնպիսի խախտում, որը կարող էր ազդել գործի ելքի վրա։

Ըստ վճռաբեկ դատարանի՝ բերված բողոքում ՀՀ քրեական դատավարության օրենսգրքի 414.2-րդ հոդվածի 1-ին մասի 2-րդ կետով նախատեսված հիմքը նույնպես հիմնավորված չէ։

Վերաքննիչ քրեական դատարանը՝ դատավոր Ռուզաննա Բարսեղյանի նախագահությամբ, բավարարել է պաշտպանական կողմի բողոքը և բեկանել առաջին ատյանի դատարանի դատավճիռը՝ արդարացնելով ՀՀ քրեական օրենսգրքի 316-րդ հոդվածի 1-ին մասով մեղադրվող Նարեկին՝ հանցագործությանը նրա մասնակցությունն ապացուցված չլինելու հիմքով:

Ավելի վաղ «Փաստինֆո»-ն տեղեկացրել էր, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով Ա.Ալիխանյանի անվան ազգային գիտական լաբորատորիայի գիտաշխատող Նարեկը դատապարտվել էր 6 ամիս ժամկետով ազատազրկման, ինչպես միջնորդել էր մեղադրող դատախազը՝ իր մեղադրական ճառում:

Վերաքննիչ բողոքով պաշտպանական կողմը պահանջել էր ամբողջությամբ բեկանել Կենտրոն և Նորք-Մարաշ վարչական շրջանների ընդհանուր իրավասության դատարանի` 06.08.2015թ. դատավճիռը և Նարեկին արդարացնել՝ ճանաչելով և հռչակելով նրա անմեղությունը:

Ոստիկանին հարվածելու մեջ մեղադրվող Նարեկն առաջադրված մեղադրանքում իրեն մեղավոր չի ճանաչել և պնդել է, որ ինքնաբուխ և խաղաղ հավաքի բոլոր չափանիշներին համապատասխանող ցույցը խոչընդոտվել, ապա կոպիտ կերպով ցրվել է ի սկզբանե լավ չկազմակերպված, ցուցարարների հետ աշխատանք տանելու անընդունակ և սեփական մասնագիտական թերի պատրաստվածությունից շփոթված ոստիկանական ուժերի կողմից:

Գործը քննվել է Կենտրոն և Նորք-Մարաշ վարչական շրջանների քննչական բաժնում և ըստ մեղադրանքի՝ Նարեկը 2014թ. հունիսի 23-ին, ժամը 14:00-ի սահմաններում Երևան քաղաքի Սարյան փողոցի 22 շենքի մոտ տեղի ունեցած բողոքի ակցիայի ընթացքում ծառայողական պարտականությունները կատարելու կապակցությամբ կյանքի կամ առողջության համար ոչ վտանգավոր բռնություն է գործադրել իշխանության ներկայացուցիչ հանդիսացող, ՀՀ ոստիկանության Երևան քաղաքի վարչության ՊՊԾ գնդի երրորդ հատուկ գումարտակի ծառայող, ոստիկանության սերժանտ Կ. Սաղաթելյանի նկատմամբ՝ նրան պատճառելով առողջության թեթև վնասի հատկանիշներ չպարունակող մարմնական վնասվածքներ:

Նարեկի նկատմամբ որպես խափանման միջոց ընտրվել էր չհեռանալու մասին ստորագրությունը:

Աղբյուր` Փաստինֆո