Փաստ ինֆո

Գործարար Սիլվա Համբարձումյանն այսօր լրատվամիջոցներին հայտնել է, որ պատրաստվում է դիմել դատախազություն՝ Սյունիքի նախկին մարզպետ Սուրիկ Խաչատրյանից իր պարտքը ստանալու նպատակով:

«Փաստինֆո»-ի հարցին, թե արդյո՞ք Գլխավոր դատախազությունը ստացել է Սիլվա Համբարձումյանի դիմումը, թե ոչ, դատախազությունից խոստացան պատասխանել ավելի ուշ՝ խնդրելով ուղարկել գրավոր հարցում:

Հարցումն ուղարկել ենք եւ դատախազության պատասխանը կներկայացնենք այն ստանալուն պես։

Նշենք, որ Սիլվա Համբարձումյանը լրատվամիջոցներին հայտնել է, թե 2010թ. Սուրիկ Խաչատրյանին վաճառել է գույք՝ 450 հազար ԱՄՆ դոլար արժողությամբ, ու ներկայումս Խաչատրյանը Սիլվա Համբարձումյանին պարտք է 102 միլիոն դրամ:

Ըստ Համբարձումյանի՝ Սուրիկ Խաչատրյանը այդ գույքն անօրինական վաճառել է: «Բայց դա ինձ չի հետաքրքրում: Ինքն է ինձ պարտք: Շարունակ խոսել եմ այդ մասին: 2013 թվականին մամուլի ասուլիսի ընթացքում գող եմ անվանել Սուրիկ Խաչատրյանին: Երբ օրենքն ու իշխանությունն իրենց ձեռքին էր, ի՞նչ կարող էի անել: Դիմելու եմ դատախազություն: Ես տեղյակ եմ, որ Սուրիկ Խաչատրյանին բազմիցս ասել են, որ իմ գումարը վճարի, նա էլ միշտ ասել է՝ այո ու չի վճարել: Գիտե՞ք, ով ուրիշի փողն ուտում է, հանգիստ չի մարսում: Նույնը վերաբերում է նաև Սուրիկ Խաչատրյանին: Վերևում Աստված կա»,- ասել է Ս.Համբարձումյանը։

Ուստիև՝ Սիլվա Համբարձումյանը, որոշել է դիմել դատախազություն, որպեսզի իր պարտքը ետ ստանա Խաչատրյանից, քանի որ վերջինիս բազմիցս ասել են, որ իր գումարը վճարի, նա էլ միշտ ասել է՝ այո ու չի վճարել:

Նշենք, որ Սիլվա Համբարձումյանի եւ Սուրիկ Խաչատրյանի «ջերմ» հարաբերություններն ունեն հին պատմություն եւ անգամ սրճարանում Սյունիքի նախկին մարզպետը ոտքով հարվածել էր կնոջը։

Աղբյուր` Փաստինֆո