Փաստ ինֆո

Արեգ Սադոյանը և Ռաֆայել Կարագյոզյանն ազատվեցին դատական նիստերի դահլիճից Երևանի Կենտրոն և Նորք- արաշ վարչական շրջանների դատարանը, դատավոր Գագիկ Պողոսյանի նախագահությամբ, քիչ առաջ հրապարակեց զանգվածային անկարգությունների մեղադրանքով Արեգ Սադոյանի և Ռաֆայել Կարագյոզյանի վերաբերյալ գործով դատավճիռը:

Դատարանն ամբաստանյալներին մեղավոր ճանաչեց ՀՀ քրեական օրենսգրքի 225-րդ հոդվածի 2-րդ մասով և դատապարտեց նրանց 3-ական տարվա պայմանական ազատազրկման՝ 3-ական տարվա փորձաշրջանով:

Նշենք, որ ամբաստանյալներն ընդունել են առաջադրված մեղադրանքը և խնդրել  գործը քննել արագացված դատաքննության կարգով:

Մեղադրողը միջնորդել էր 3 տարվա պայմանական ազատազրկում նշանակել միայն Արեգ Սադոյանի նկատմամբ, իսկ Ռաֆայել Կարագյոզյանի նկատմամբ նշանակել 3 տարվա  ազատազրկում: Իսկ դատարանը Արեգ Սադոյանին և Ռաֆայել Կարագյոզյանին ազատ արձակեց հենց դատարանի դահլիճից:

Ըստ մեղադրանքի, Ռաֆայել Կարագոզյանը 2016թ. հուլիսի 20-ին Երևանում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով և վնասելով արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ`ոտքով բազմաթիվ հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշել և փորձել է խլել մեկ այլ ոստիկանության աշխատակցի վահանը:

Իսկ ըստ Արեգ Սադոյանին առաջադրված մեղադրանքի, 2016թ. հուլիսի 20-ին Երևան քաղաքում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով և վնասելով արտահայտված զանգվածային անկարգությունների ընթացքում, բռնություն է գործադրել ոստիկանության աշխատակիցների նկատմամբ՝ քաշել է ոստիկանական պատնեշում կանգնած, իր ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակցի պաշտպանիչ վահանից:

Ամբաստանյալները մեղադրվում են ՀՀ քրեական օրենսգրքի 225-րդ հոդվածի 2-րդ մասով:

Աղբյուր` Փաստինֆո