Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և փաստաբան Էլզա Զաքարյանին գործը մակագրվել է նույն վարչական շրջանի ընդհանուր իրավասության դատարանի դատավոր Կարեն Մարդանյանին:

Դատավոր Իշխան Բարսեղյանի պաշտպանությունը ստանձնել են 3 փաստաբաններ, նրանց թվում է թոշակի անցած Էրեբունի և Նուբարաշեն վարչական շրջանների ընդհանուր իրավասության դատարանի նախկին դատավոր Վլադիմիր Գրիգորյանը, Վարդուհի Էլբակյանը և Լիաննա Գրիգորյանը:

«Փաստինֆո»-ի թղթակցի հետ զրույցում նախկին դատավոր, ներկայումս փաստաբան Վլադիմիր Գրիգորյանը չշտապեց գործի վերաբերյալ որևէ մանրամասներ հայտնել՝ գտնելով, որ «իմաստ չունի», կմտնենք դատարան, դատական պրոցեսի ժամանակ հնարավորություն կլինի լսելու իրենց կարծիքն ու տեսակետը գործի քննության վերաբերյալ:

Ավելի վաղ «Փաստինֆո»-ի թղթակցի հետ զրույցում դատավորի մյուս պաշտպան Վարդուհի Էլբակյանը հայտնել էր, որ դատավորն առաջադրված մեղադրանքի վերաբերյալ դիրքորոշում հայտնելուց հրաժարվել է, հրաժարվել է նաև ցուցմունք տալուց:

Վարդուհի Էլբակյանի գտնում է, որ նախաքննական մարմինը օբյեկտիվ քննություն չի կատարել ուստի և միջնորդությամբ հանդես կգան, երբ գործն արդեն դատարանում կլինի:

Ինչ վերաբերում է գործով ամբաստանվող փաստաբան Էլզա Զաքարյանին, ապա նրա պաշտպան Գևորգ Շիրինյանը մեզ հետ զրույցում հայտնեց, որ փաստաբանն իրեն առաջադրված մեղադրանքն ընդունել է, և որ դատարանում կխնդրեն, որ պատիժը մեղմ լինի, ազատազրկման հետ կապ չունեցող, քանի որ փաստաբանը երկու մանկահասակ երեխան ունի խնամքին:

Ավելի վաղ տեղեկացրել էինք, որ հոկտեմբերի 27-ին` ժամը 19.35-ին Երևան քաղաքի Արշակունյաց պողոտայի և Գարեգին Նժդեհի փողոցի խաչմերուկի գետնանցումում դատավոր Իշխան Բարսեղյանը հանդիպել է քաղաքացուն և վերջինիցս անձամբ ստացել 1000 ԱՄՆ դոլարը:

Իսկ հոկտեմբերի 28-ին` ժամը 01.45-ին դատավոր Իշխան Բարսեղյանը ձերբակալվել է խոշոր չափերով կաշառք ստանալու կասկածանքով:

Այսպիսով, ԱԱԾ-ի կողմից օպերատիվ օպերատիվ-հետախուզական միջոցառման արդյունքում Հատուկ քննչական ծառայությունը հարուցել է քրեական գործ, որի շրջանակներում դատավոր Իշխան Բարսեղյանին մեղադրանք է առաջադրվելով ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Ելնելով դատավորի կարգավիճակից, որ նա կարող է որոշակի ազդեցություն ունենալ մինչդատական վարույթում գործի օբյեկտիվ քննության վրա նախաքննական մարմնի կողմից դատավորի նկատմամբ խափանման միջոց կալանավորումն ընտրելու վերաբերյալ միջնորդությունը բավարարվել է:

Քրեական գործով մեղադրանք է առաջադրվել նաև փաստաբան Էլզա Զաքարյանին՝ ՀՀ քրեական օրենսգրքի 313-րդ հոդվածի 1-ին մասով, և նրա նկատմամբ որպես խափանման միջոց կիրառվել՝ չհեռանալու մասին ստորագրությունը:

Աղբյուր` Փաստինֆո