Փաստ ինֆո

Երրորդմասցի Լյովիկի ու նրա ընկերների սպանության գործով այսօրվա դատական նիստում ամբաստանյալ Սարգիս Գրիգորյանի նույն ինքը՝ Ծգլի նյարդերը տեղի տվեցին:

Դատական նիստի ժամանակ Ծգլը իր վրդովմունքը հայտնեց հեռուստացույցով լսած ինչ-որ հայտարարության մասին, որ առնչվել է գործով մյուս ամբաստանյալ Սարգիս Հախանումյանի՝ Տլեի եղբորը. «Ծելեվիզրներով ինչ ասես ասեն, դոգմա դարձնեն, իմանան էդ մարդիկ հանցագործ են»:

Մատնանշելով գործով դատախազին` Ծգլն ասաց. «Թող շառ անեն իրա վրա ու տանեն մի 15 օր փակեն, տենամ կդիմանա կամ էլ թող զգան էտ ինչա…, բա որ էտ մարդկանց ընտանիքին ինֆարկտ խփեր: Հերիք չի մի հատ էս տղեն ստեղ ա զրպարտանքով, մի հատ էլ ախպերը, ով էր պատասխան տալու լրատավամիջոցնե՞րը, թե՞ դատախազը»:

Երկխոսություն սկսվեց նաև Ծգլի ու գործով սպանված տուժողներից մեկի հարազատի միջև, Ծգլը հայտարարեց. «էս մարդիկ պետք է իմանան, թե ովքեր է իրենց իրական թշնամիները, մարդ ենք, հո գազ չենք»:

Նշենք, որ այսօր դատարանը հետազոտում էր գործին կցված ապացույցներից տեսաձայնագրությունների սկավառակները: Մասնավորապես, պաշտպանական կողմը գտնում էր, որ դրանք որևէ ապացուցողական նշանակություն չունեն:

Ըստ զննության արձանագրության՝ տեսանյութերից մեկում Ավան-Առինջում գտնվող Նոր Զովք սուպերմարկետի դիմացով անցնում են 3 տղաներ, նրանցից միայն Ծգլի դեմքն է երևում:

Քննությամբ պարզվել են, որ այդ երեք անձինք գործով ամբաստանյալներ են, սակայն վերջիններիս պաշտպան Լուսինե Սահակյանն այդպես չի կարծում, ավելին՝ պաշտպանը հայտարարեց, որ ինքն այդ տեսանյութը դիտելիս ոչինչ չի տեսնում, դեմք չի տեսնում և քննիչի զննության արձանագրության մեջ նշել է, որ նրանք են:

Տուժողի իրավահաջորդների ներկայացուցիչ Երեմ Սարգսյանը, համակարծիք լինելով իր կոլեգայի այն մտքին, որ զննության ժամանակ քննիչը պետք է նշի, որ եթե դեմք չի տեսնում, կամ պետհամարանիշ չի տեսնում, նշի որ չի երևում, սակայն այդ ամենը համակցության մեջ պետք է դիտարկել, իսկ ապացույցից ապացուցողական նշանակությունն այն է, որ երեք անձինք են կոնկրետ հագուստի նկարագրով և համապատասխան մարմնակազմությամբ, թե ով ինչ է տեսնում, ում է նմանացնում նրանց, դրանով չպետք է շարժվեն:

Երեմ Սարգսյանը նաև հավելեց, որ քննիչը իրավունք չուներ զննության մեջ նշել այն, ինչը չի երևում, սակայն դա ամեն անգամ չպետք է պաշտպանական կողմը դնի ապացույցի անարժանահավատության կամ անթույլատրելիության հիմքում, այդ տեսանկյունից չի կարող դիտվել: Թե ի՞նչ է ապացուցում կամ չի ապացուցում, դրան ճառի ժամանակ կարող են կողմերը անդրադառնալ, և որ այդ ամենը անհրաժեշտ է համակցության մեջ դիտարկել:

Ըստ մեղադրական եզրակացության՝ Վահան Հակոբյանը, մի խումբ անձանց կողմից նախնական համաձայնությամբ, ապօրինի ձեռք է բերել և պահել մարտական ակոսափող հրազեն հանդիսացող, 1963թ. գործարանային արտադրության, 7,62 մմ տրամաչափի «ԱԿՄՍ» տեսակի ինքնաձիգ, 1976թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ և 1960թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ, որոնք ապահովված են եղել պահունակներով, ինչպես նաև՝ ռազմամթերք հանդիսացող փամփուշտներով:

Ըստ մեղադրանքի՝ 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նախաքննական մարմինը որպես սպանության դրդապատճառ նշել է այն, որ Վահան Հակոբյանը «լարված, անբարյացակամ, գժտված վիճակում» է եղել Լևոն Ղազարյանի ու նրա շրջապատի հետ և, ըստ մեղադրական եզրակացության, սպանությունը կատարվել է վրեժխնդրությունից դրդված:

Աղբյուր` Փաստինֆո