Փաստ ինֆո

ՀՀ ԱԺ պատգամավոր Գուրգեն Արսենյանի որդու մասնակցությամբ գործով նախաքննությունն ավարտվել է և գործն ուղարկվել դատարան: Այն կքննի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը:

Ըստ մեղադրանքի՝ պատգամավորի որդի Գուրգեն Արսենյանը իր ընկերներ Արմեն Ներսիսյանի, Գուրգեն Գրիգորյանի և գործով ինքնությունը չպարզված այլ անձանց հետ միասին 2016թ. ապրիլի 17-ին Երևան քաղաքի Աբովյան փողում գտնվող «Կրիստալ» գիշերային ակումբի դիմաց, կոպիտ կերպով խախտելով հասարակական կարգն ու բացահայտ անհարգալից վերաբերմունք դրսևորելով հասարակության նկատմամբ, խմբի կազմում, որպես զենք օգտագործվող առարկայի գործադրմամբ կատարել է խուլիգանություն:

Գուրգեն Գրիգորյանին ևս մեղադրանք է առաջադրվել նշված վայրում կոպիտ կերպով խախտելով հասարակական կարգն ու բացահայտ անհարգալից վերաբերմունք դրսևորելով հասարակության նկատմամբ խմբի կազմում խուլիգանություն կատարելու համար:

Ըստ մեղադրանքի՝ Արմեն Ներսիսյանը 2015թ. հունիսի 21-ին իր ընկեր Գուրգեն Արսենյանի և վերջինիս 3 այլ` գործով ինքնությունները չպարզված ընկերների հետ գտնվել է Երևան քաղաքում գտնվող «Հեմինգուեյ» ակումբում, որտեղ գինովցած լինելու պատճառով աղմկել է, ինչի պատճառով նրան դիտողություն է արել նշված ակումբի տնօրեն Գևորգ Պողոսյանը:

Արմեն Ներսիսյանը բացահայտ անհարգալից վերաբերմունք դրսևորելով ինչպես անցորդների այնպես էլ նշված ակումբին կից գործող սրճարանի այցելուների նկատմամբ, սարսափ տարածելով ներկաների շրջանում, խմբի կազմում` գործով չպարզված անձանց հետ, դիտավորյալ կոպիտ կերպով խախտելով հասարակական կարգը, բարձրաձայն սեռական բնույթի հայհոյանքներ է հնչեցրել և անկանոն հարվածներ է հասցրել ինչպես Գևորգ Պողոսյանին այնպես էլ ցանկացած պատահած անձի, որոնցով էականորեն խաթարել է հասարակական վայրում գտնվող անձանց ֆիզիկական և հոգեկան անձեռնմխելիությունը:

Գուրգեն Արսենյանին, մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով, Գուրգեն Գրիգորյանին՝ 258-րդ հոդվածի 3-րդ մասի 1-ին կետով, իսկ Արմեն Ներսիսյանին՝ 258-րդ հոդվածի 3-րդ 1-ին կետով և 258-դ հոդվածի 4-րդ մասով:

Հիշեցնենք, որ նախաքննության ընթացքում կալանքի տակ գտնվող Գուրգեն Արսենյանի նկատմամբ ընտրված խափանման միջոց կալանքը փոփոխվեց՝ չհեռանալու մասին ստորագրության, իսկ գործով մյուս երկու մեղադրյալները ովքեր մայիսի 16-ից գտնվում էին հետախուզման մեջ հայտնաբերվելուց հետո կալանավորվեցին:

Աղբյուր` Փաստինֆո