Փաստ ինֆո

ՀՀ մարդու իրավունքների պաշտպան Արման Թաթոյանի՝ նոյեմբերի 10-ին կայացված որոշումից հետո որևէ գործողություն չի կատարվել՝ ինչ-որ ձևով Վահան Շիրխանյանի առողջական վիճակը բարելավելու ուղղությամբ: Այս մասին «Հայելի» մամուլի ակումբում լրագրողների հետ հանդիպմանն այսօր հայտարարեց ՀՀ նախկին փոխվարչապետ ու պաշտպանության նախկին փոխնախարար Վահան Շիրխանյանի պաշտպան, փաստաբան Հայկ Ալումյանը:

Փաստաբանը հիշեցրեց, որ Մարդու իրավունքների պաշտպանն արձանագրել էր առողջության պահպանման իրավունքի խախտում և առաջարկել ՀՀ արդարադատության նախարարին Վ.Շիրխանյանին տեղափոխել մասնագիտացված հիվանդանոց ու այնտեղ պատշաճ բուժում իրականացնել, ինչպես նաև պատասխանատվության ենթարկել այն պաշտոնատար անձանց, ում գործողություններով կամ անգործությամբ խախտվել է Վահան Շիրխանյանի առողջության պահպանման իրավունքը և վնաս պատճառվել նրա առողջությանը:

Հ.Ալումյանը հայտնեց, որ իր պաշտպանյալի առողջական վիճակի հետ կապված ինքը զուգահեռաբար բողոքներ էր ներկայացրել նաև Քրեակատարողական վարչության պետին ու արդարադատության նախարարին:

«Մենք ունենք արդարադատության նախարարություն ու քրեակատարողական վարչություն, որոնք իրենց իրավունք են վերապահում ընդհանրապես չպատասխանել: Այսպիսի փնթի աշխատանք ու վերաբերմունք ես դեռ չեմ հանդիպել վերջին տարիների պրակտիկայում»,- ասաց Հայկ Ալումյանն՝ ընդգծելով, որ Մարդու իրավունքների պաշտպանն իր փայլուն աշխատանքով կոմպենսացրեց մնացած երկու սուբյեկտների փնթիությունը:

Հայկ Ալումյանը ասաց, որ Վահան Շիրխանյանի հետ կապված Մարդու իրավունքների եվրոպական դատարան ներկայացվել է գանգատ Մարդու իրավունքների եվրոպական կոնվենցիայի 3-րդ հոդվածի՝ խոշտանգումների արգելում, հիմքով: Ներկայումս այդ գանգատով Ստրասբուրգում զբաղվում է փաստաբանական խումբ: «Շատ մեծ շանսեր ենք տեսնում, որ դա կարող է քննվել արագացված ընթացակարգով և լուծումը ստանալ մոտ ամիսներին»,- ասաց Հայկ Ալումյանը: Նա հույս հայտնեց, որ ՄԻԵԴ-ում գործը կստանա մի այնպիսի ընթացք, որ իրենք ստիպված չեն լինի ներպետական ատյաններում աղերսել պատշաճ վերաբերմունք:

«Եվրոպական դատարանը իր լծակներով մեր կառավարությանը կստիպի անել այն, ինչ մեր կառավարությունը բոլոր դեպքերում պարտավոր էր անել: Եվ հարգարժան վարչապետը հերթական անգամ կզարմանա, թե ինչու է Հայաստանի Հանրապետությունը գումարներ կորցնում ՄԻԵԴ վճիռների արդյունքում, որովհետև, պրն. վարչապետ, ձեր արդարադատության նախարարը ոչ մի քայլ չի ձեռնարկում այն քայլերից, որ պարտավոր է ձեռնարկել նախ որպեսզի Վահան Շիրխանյանը չհասներ այդ վիճակին կամ գոնե այսօրվա վիճակից ելք գտնելու համար»:

Հայկ Ալումյանը նշեց, որ ներկայումս Վահան Շիրխանյանի առողջական վիճակը ստաբիլ վատթարանում է: Նախորդ ասուլիսից հետո, որի ժամանակ պաշտպանը տագնապի ազդանշան էր հնչեցրել, ներկայումս Վ.Շիրխանյանը շատ ավելի խորը ճգնաժամի մեջ է գտնվում՝ առողջական խնդիրների հետ կապված:

«Գնալով ավելի ու ավելի մեծ տագնապ է առաջացնում այս վիճակը, և մենք սկսում ենք մտածել, որ կա որոշակի միտում անել այնպես, որ ինքն այլևս երբեք իր կենդանության օրոք չկարողանա ազատություն դուրս գալ: Հենց այս պահին էլ ես ուղղակի ահազանգում եմ, որ նրա վիճակը ծայրահեղ ծանր է»,- ասաց Հայկ Ալումյանը՝ հավելելով, որ անազատության մեջ գտնվելու 11 ամսվա ընթացքում Վահան Շիրխանյանը մոտ 4000 դեղահաբ է ընդունել, ձերբակալվելիս առողջ մարդուց նա վերածվել է հաշմանդամի՝ ինքնուրույն չի կարողանում տեղաշարժվել: Ըստ պաշտպանի, իր պաշտպանյալը երեք ամիս է չի կարողացել լոգանք ընդունել, որովհետև դրա համար անհրաժեշտ է մի հարկ իջնել և ցնցուղի տակ կանգնել, որն ինքն ի վիճակի չէ անել:

Հայկ Ալումյանը հայտնեց, որ ՔԿՀ-ում մի քանի ամիս գտնվելուց հետո Վահան Շիրխանյանը թոքի ինֆարկտ է տարել, որից հետո նրան վիրահատել են և անոթի մեջ ֆիլտր տեղադրել, որպեսզի արյան մակարդուկները չխցանեն անոթները: Այժմ այդ ֆիլտրը տեղից շեղվել է, ոտիկներով խրվել արյունատար անոթի մեջ, ինչը ծայրահեղ վտանագավոր է նրա առողջության համար՝ եթե ոտիկները ծակեն անոթը, տեղի կունենա արյունահոսություն:
Հայկ Ալումյանն եկել է եզրակացության, որ ՔԿՀ-ի կողմից տգեղ հնարքներով լրագրողներին Վահան Շիրխանյանի հետ հանդիպելը թույլ չտալը ոչ թե Վահան Շիրխանյանի խոսքը տարածելը թույլ չտալն է, խոսքը՝ նամակի տեսքով, տարածվել է, այլ որպեսզի լրագրողները նրան այսպիսի վիճակով չտեսնեն ու նրանց համար պարզ չդառնա, որ «իրեն այնտեղ աստիճանաբար սպանում են»: Դա արվում է, ըստ պաշտպանի, ինչ-որ հրահանգով, դիտավորյալ կամ դա արվում է ծայրահեղ ոչ պրեֆոսիոնալ գործելու, իրենց պարտականությունները ոչ պատշաճ կատարելու հետևանքով:

«Եթե մենք հիմա բոլորի ուշադրությունը չհրավիրենք այս խնդրին, մի քանի ամիս հետո պրն. Շիրխանյանը կարող է արդեն մահացած լինել, ու այս ամեն ինչն արդեն ավելորդ լինի: Նա պարզապես կարող է իր դատի օրվան չհասնել, նա պարզապես կարող է չկարողանա գալ դատարան, որովհետև 15 րոպեից ավել չի կարողանում նստել ու զրուցել: Մենք պարզապես չենք պատկերացնում ոնց են իրեն բերելու դատարան, մի քանի ժամ սպասեցնելու ներքևում՝ դատարանի համապաստասխան խցերում, հետո ժամերով նա ինչպես է մասնակցելու դատավարությանը, դա այսօրվա իր առղջական վիճակից ելնելով՝ ուղղակի անհնարին է: Այդ պայմաններում ինքը մի օր չի կարող ապրել»,- ասաց Հայկ Ալումյանը՝ նշելով, որ գործն արդեն հասել է դատարան և ընդունվել դատավոր Արմեն Բեկթաշյանի վարույթ:

Աղբյուր` Փաստինֆո