Փաստ ինֆո

«Փաստինֆո»-ի տեղեկություններով, Մարդու իրավունքների եվրոպական դատարանն որոշել է առաջնահերթ կարգով քննել ՀՀ նախկին փոխվարչապետ ու պաշտպանության նախկին փոխնախարար Վահան Շիրխանյանի գանգատը:

Հանցավոր համագործակցությանը մասնակցելու մեջ մեղադրվող Վ.Շիրխանյանն ունի լուրջ առողջական խնդիրներ, որոնց «Փաստինֆո»-ն պարբերաբար անդրադարձել է:

Ավելի վաղ տեղի ունեցած մամուլի ասուլիսում նրա պաշտպան, փաստաբան Հայկ Ալումյանը տագնապի ազդանշան էր հնչեցրել՝ ուշադրություն հրավիրելով Վ.Շիրխանյանի առողջական վիճակի օր-օրի վատթարացման վրա: Վ.Շիրխանյանը դժվարությամբ է տեղաշարժվում, գտնվում է անկողնային հիվանդի կարգավիճակում՝ անգամ գործի նյութերին ծանոթանում է անկողնում:

«Մենք հասկանում ենք, որ շուտ թե ուշ կպարզվի, որ ինքը կապ չունի այդ հանցագործության հետ, բայց երբ որ դա պարզվի ու նրան ազատ արձակեն, նա կարող է լինել այնպիսի առողջական վիճակում, որը հնարավոր չլինի ինչ-որ ձևով այն շտկել: Չի կարելի մարդուն պահել փաստացի պատանդի կարգավիճակում»,- հայտարարել էր այն ժամանակ Հայկ Ալումյանը:

Պաշտպանն ասուլիսում նշել էր նաև, որ մոտ շաբաթների խնդիր է, և անօրինական գործողությունների դեմ առաջին գանգատը պետք է գնա ՄԻԵԴ՝ գանգատի վրա աշխատել են ոչ միայն Հայկ Ալումյանը, այլև արտերկրից փաստաբաններ:

Նշենք, որ ՀՀ մարդու իրավունքների պաշտպան Արման Թաթոյանն ևս իր կողմից ընդունված որոշմամբ հաստատված է համարել, որ տեղի է ունեցել ՀՀ ԱՆ «Երևան-Կենտրոն» ՔԿՀ-ում կալանավորված անձ Վահան Շիրխանյանի իրավունքների խախտում:

Որոշմամբ Մարդու իրավունքների պաշտպանը ՀՀ արդարադատության նախարարին առաջարկել է անհապաղ տեղափոխել Վահան Շիրխանյանին քաղաքացիական առողջապահական հաստատություն և կազմակերպել նրա անհրաժեշտ խնամքը, ինչպես նաև միջոցներ ձեռնարկել այն պաշտոնատար անձանց պատասխանատվության ենթարկելու ուղղությամբ, ում գործողություններով կամ անգործությամբ խախտվել է Վահան Շիրխանյանի առողջության պահպանման իրավունքը և վնաս է պատճառվել նրա առողջությանը:

Աղբյուր` Փաստինֆո