Փաստ ինֆո

ՀՀ վերաքննիչ քրեական դատարանի նախագահ Վազգեն Ռշտունու վերաբերյալ այսպես կոչված «կոմպրոմատ»-ը հակառակ էֆեկտն ունեցավ: Մասնավորապես, լայն քննարկումներ ծավալվեցին փաստաբանների շրջանում, նրանք համոզմունք հայտնեցին, տեղեկությունը կամ ավելի ճիշտ՝ ապատեղեկատվությունը տարածվել է շահագիգիռ անձանց կողմից՝ դատավորին վարկաբեկելու անազնիվ նպատակով:

Մասնավորապես, Ֆեյսբուք սոցիալական ցանցում թեմայի շուրջ գրառում է թողել փաստաբան Երեմ Սարգսյանը:

Ներկայացնում ենք գրառումն ամբողջությամբ.

«Վերաքննիչ քրեական դատարանի նախագահ Վազգեն Ռշտունուն ճանաչող կամ նրա հետ առնչված անձանց համար վստահ եմ, որ անիրական են թվում նրա վերաբերյալ տարածված այն տեղեկությունները, թե իբր նա, բավարար չէ, որ ալկոհոլի ազդեցության տակ ներկայացել է սեմինարին, դեռ մի բան էլ, այդ պատճառով չի կարողացել կառավարել իրեն:

Սակայն դա հարցի մի կողմ է: Առավել կարևոր է հասկանալ, թե ինչու են որոշ անձինք ցանկանում վարկաբեկել դատական համակարգի լավագույն ներկայացուցիչներից մեկին: Իսկ այն, որ այս ամենը պատվեր է` ուղղված Ռշտունու դեմ, ակնհայտ է թեկուզ այն հանգամանքից, որ ի սկզբանե այդ վիճաբանության մասին լուրը տարածվեց այն կերպ, որ վիճաբանություն է եղել Վերաքննիչ քրեական դատարանի նախագահ Վազգեն Ռշտունու և ինչ-որ դատավորի միջև, ընդ որում նշվեց, թե իբր Ռշտունին գտնվել է ալկոհոլի ազդեցության տակ, իսկ մյուս դատավորի նույնիսկ անունը չնշվեց: Այսինքն, եթե այդ տեղեկությունը տարածողն իրականում ականատես է եղել այդ վիճաբանությանը կամ ասենք, լավ իրազեկված աղբյուրից է այդ մասին իմացել, ապա գոնե պետք է հայտներ նաև այն դատավորի անունը, ով ըստ հրապարակման բաժակ է նետել Ռշտունու ուղղությամբ:

Եվ քանի որ մյուս դատավորի անունը չի նշվել, նշանակում է, որ տեղեկությունը տարածողը, մեղմ ասած, ինչ-որ հարցով շահագրգռված է և Ռշտունու դեմ նպատակաուղղված գործողություններ է կատարում:

Պարզից էլ պարզ է, որ սա Վազգեն Ռշտունու` օրեցօր աճող հեղինակությանը վնասելու փորձ է: Ռշտունին՝ նշանակվելով վերաքննիչ դատարանի նախագահ, ուղղակի վերակենդանացրեց այդ դատական ատյանը, ինչի մասին են վկայում այդ դատարանի կողմից կայացվող բազմաթիվ արդար և օբյեկտիվ դատական ակտերն այնպիսի գործերով, որոնցով նախկինում նմանատիպ որոշումներ ակնկալելը նույնիսկ երազանք էր:

Բազմիցս տեղեկություններ են տարածվում, որ Ռշտունին կարող է նշանակվել Վճռաբեկ դատարանի նախագահ, ուստի դա չի կարող չանհանգստացնել դատական համակարգի որոշ ներկայացուցիչների, քանզի նրանք լավ հասկանում են, որ դրանից հետո այլևս չեն կարողանալու կամ շատ դժարությամբ են հին գործելաոճով աշխատելու, ինչն այդ գործելաոճին տարիներով սովորած բազմաթիվ անձանց համար ուղղակի նման է մղձավանջի»:

Աղբյուր` Փաստինֆո