Փաստ ինֆո

Վերաքննիչ դատարանն այսօր սկսեց Գյումրիում Ավետիսյանների ընտանիքի անդամների դաժան սպանության գործով դատավճռի դեմ վերաքննիչ բողոքների քննությունը:

Տուժողների իրավահաջորդների ներկայացուցիչ, փաստաբան Արամազդ Կիվիրյանը ներկայացրեց իր վերաքննիչ բողոքը քրեական գործի հետ միասին ՌԴ-ի դեմ տուժող կողմի քաղհայցը քննության չառնելու դատարանի որոշման դեմ:

Արամազդ Կիվիրյանը նշեց, որ հակառակ նրան, որ Վալերի Պերմյակովը որոշակի առողջական խնդիրներ է ունեցել, նրան ծառայության են ուղարկել Հայաստանի Հանրապետությունում տեղակայված ռազմաբազա: Ավելին, հակառակ նրան, որ հոգեբույժները եզրահանգել են, որ Պերմյակովն իրավունք չունի զենք կրել, նրան զենք է ամրակցվել: Ըստ փաստաբանի, Ռուսաստանը ունի որոշակի պարտականություններ, որոնք չի կատարել, ուստի և ոչ նյութական վնասի փոխհատուցման պահանջով քաղհայցը Ռուսաստանի Դաշնության դեմ է:

Փաստաբանն անդրադարձավ քաղհայցի շուրջ արտառոց զարգացումներին: Մասնավորապես, առաջին ատյանի դատարանն արձանագրային որոշմամբ քաղհայցը վարույթ էր ընդունել, տուժողների իրավահաջորդներին ճանաչել քաղհայցվորներ, իսկ ՌԴ-ին՝ քաղպատասխանող, ապա մեկ ամսով հետաձգել է դատական նիստը, որպեսզի այդ ընթացքում հնարավոր լինի թարգմանել քաղհայցը, ուղարկել Ռուսաստան՝ հնարավորություն տալով վերջինիս դիրքորոշում հայտնել քաղհայցի վերաբերյալ: Սակայն մեկ ամիս անց դատարանը՝ քրեական դատավարության օրենքի էական խախտում թույլ տալով, կայացրել է իր իսկ առաջին որոշմանը հակասող որոշում՝ հրաժարվելով քաղհայցը վարույթ ընդունելուց:

Արամազդ Կիվիրյանը գտնում է, որ Վերաքննիչ դատարանը պետք է իրավական գնահատական տա առաջին որոշմանը տրամագծորեն հակասող բոլորովին այլ որոշում կայացնելուն՝ նման կարգավորում օրենքում պարզապես չկա, ասաց նա:
Փաստաբանը նշեց, որ դատարանը իր հիմնավորումներում հիշատակել է ՀՀ վճռաբեկ դատարանի 2007 և 2011թթ. կայացրած որոշումներն այն դեպքում, որ այդ ժամանակ Հայաստանում բարոյական վնասի ինստիտուտը դեռ չէր գործում: Քրեական գործի հետ միասին քաղհայցը քննության չառնելով՝ դատարանը խախտել է տուժողների իրավահաջորդների դատական պաշտպանության ու արդար դատաքննության իրավունքները: Ա.Կիվիրյանը միջնորդեց դատավճիռը բեկանել և ուղարկել ստորադաս դատարան նոր քննության՝ ոչ նյութական վնասի հատուցման պահանջով քաղհայցը քննելու համար:

Տուժողի իրավահաջորդի ներկայացուցիչներ Արթուր Սաքունցն ու Արայիկ Զալյանն իրենց բողոքում բարձրացնում են դատավճիռն ամբողջությամբ բեկանելու ու ստորադաս դատարան նոր քննության ուղարկելու հարցը: Արթուր Սաքունցը նշեց, որ ռուսական կողմը հայկական կողմին շուրջ 4 ժամ ուշացումով է հայտնել Պերմյակովի՝ զենքով դասալքության դիմելու մասին, ինչի հետևանքով վտանգը հնարավոր չի եղել կանխել:

Ըստ Ա.Սաքունցի, գործով ամբողջական քննություն չի կատարվել, չի պարզվել հանցագործության կատարման շարժառիթը, ինչպես նաև այլ անձանց հնարավոր մասնակցության հարցը:

Տուժողի իրավահաջորդի ներկայացուցիչ փաստաբան Լուսինե Սահակյանը նշեց, որ Արթուր Սաքունցի ու Արայիկ Զալյանի բողոքը դատարանը պետք է մերժի, իսկ Արամազդ Կիվիրյանի բողոքը՝ բավարարի:

Լուսինե Սահակյանն ևս անդրադարձավ դատարանի վիճարկվող՝ քաղհայցը վարույթ ընդունելուց հրաժարվելու որոշմանը՝ «որտե՞ղ, ո՞ր դատական նիստում, ո՞ր խորհրդակցական սենյակում է որոշումը կայացվել»: Լ.Սահակյանը նշեց նաև, որ իրենք չեն կարող ոչ նյութական վնասի պահանջ ներկայացնել քաղաքացիաիրավական կարգով՝ Հայաստանի դատարանը չի կարող քննել հայց Ռուսաստանի դեմ, իսկ Մարդու իրավունքների եվրոպական դատարան չեն կարող դիմել, որովհետև Ավետիսյանների իրավահաջորդների իրավունքը խախտել է Ռուսաստանը:

Գործով մեղադրող Գևորգ Գևորգյանը նշեց, որ Ա.Սաքունցի բողոքն անհիմն է: Ըստ նրա, գործի քննությամբ շարժառիթը պարզվել է՝ դա ավազակությունն է, իսկ հանցագործություն կատարած անձի՝ Պերմյակովի, վերաբերյալ ապացույցներն առավել քան բավարար են: Մեղադրողը Արամազդ Կիվիրյանի բողոքի վերաբերյալ նշեց, որ դատարանը չի կարող քննել քաղհայցը գործի հետ միասին: Ըստ Գ.Գևորգյանի, առաջին ատյանի դատարանի դատավճիռը օրինական, հիմնավոր ու պատճառաբանված է, ուստի նա միջնորդեց դատավճիռը թողնել օրինական ուժի մեջ և բողոքներն էլ մերժել:

Պերմյակովի պաշտպան, փաստաբան Էդուարդ Աղաջանյանը վերաքննիչ բողոքների վերաբերյալ նշեց, որ մեղադրական դատավճռի բեկանումը բխում է իր պաշտպանյալի շահերից:

Նշենք, որ Է.Աղաջանյանը նոյեմբերի 16-ին տեսակցել է իր պաշտպանյալի հետ՝ վերջինս հայտարարել է, որ պաշտպանի վերաքննիչ բողոքը ինքը հետ է վերցրել կամավոր, իր նկատմամբ որևէ ճնշում չի եղել: Պերմյակովը հայտնել է նաև, որ ինքն իրեն մեղավոր է ճանաչում, իսկ դատարանին ուղարկված գրության մեջ նա նշել է, որ իր նկատմամբ կայացված դատավճիռն օրինական է ու արդարացի: Նա հայտնել է նաև, որ չի ցանկանում մասնակցել բողոքների քննությանը՝ որտեղ էլ որ դրանք անցկացվեն: Պերմյակովը չի առարկել նաև, որ իր պաշտպանությունը շարունակի իրականացնել Է.Աղաջանյանը, ում ինքը լիովին վստահում է:

Հաջորդ դատական նիստում կշարունակվի բողոքների քննությունը:

Աղբյուր` Փաստինֆո