Փաստ ինֆո

ՀՀ Վերաքննիչ քրեական դատարանը՝ նախագահությամբ Մանուշակ Պետրոսյանի, մասնակի արդարացրել է 21-ամյա ժամկետային զինծառայող Ալեքսանդր Պողոսյանին՝ բեկանելով Տավուշի մարզի ընդհանուր իրավասության դատարանի դատավճիռը:

Ինչպես տեղեկանում ենք Ալեքսանդր Պողոսյանի պաշտպան Թամարա Բաղդասարյանից՝ Պողոսյանը անմեղ է ճանաչվել և արդարացվել ՀՀ քրեական օրենսգրքի 371-րդ հոդվածի 2-րդ մասով՝ արարքում հանցակազմի բացակայության պատճառաբանությամբ:

Միևնույն ժամանակ Ալեքսանդր Պողոսյանը մեղավոր է ճանաչվել 235-րդ հոդվածի 1-ին մասը և 238-րդ հոդվածի 1-ին մասով և պատիժների համակցությամբ նրա նկատմամբ վերջնական պատիժ է նշանակվել 3 տարի 3 ամիս ժամկետով ազատազրկում:

Առաջին ատյանի դատարանի դատավճռով Ալեքսանդր Պողոսյանը մեղավոր էր ճանաչվել առաջադրված մեղադրանքում դատապարտվելով 5 տարի ժամկետով ազատազրկման:

Նշենք, որ առաջին ատյանում Պողոսյանի պաշտպանությունն իրականացրել է փաստաբան Արմեն Ադամյանը, ով նա վերաքննիչ բողոքն է բերել, սակայն վերաքննիչ դատարանում Պողոսյանի պաշտպանությունն իրականացվել է Թամար Բաղդասարյանի կողմից:

Ըստ մեղադրանքի՝ Ալեքսանդր Պողոսյանը հանդիսանալով ՀՀ ՊՆ թիվ N զորամասի ժամկետային զինծառայող, 2015թ. ապրիլից հուլիս ամիսն ընկած ժամանակահատվածում զորամասի պաշտպանական շրջանում տեղակայված թիվ 18 մարտական հենակետում մաքրություն կատարելու ժամանակ, զինաբուրգի մոտից հափշտակել է ռազմամթերք հանդիսացող մեկ հատ Ֆ1 տեսակի նռնակի պայթուցիչ: Այնուհետև նույն մարտական հենակետում մաքրություն կատարելու ժամանակ խրամուղու վերին հատվածից գտնելու միջոցով ապօրինի կերպով ձեռք է բերել թվով 80 հատ 7.62մմ տրամաչափի ռազմամթերք հանդիսացող փամփուշտ:

Բացի այդ, նույն ժամանակահատվածում ծառայություն իրականացնելու ժամանակ յուրացրել է ծառայության կրման համար իրեն հատկացված ռազմամթերք հանդիսացող թվով 80 հատ 7.62 մմ տրամաչափի փամփուշտ:

Ալեքսանդր Պողոսյանին մեղադրանք է առաջադրվել ՀՀ քրեական օրենսգրքի 371-րդ հոդվածի 2-րդ մասով, 3 դրվագով՝ 235-րդ հոդվածի 1-ին մասով, 3 դրվագով էլ 238-րդ հոդվածի 1-ին մասով:

Նրա նկատմամբ որպես խափանման միջոց է ընտրվել չհեռանալու մասին ստորագրությունը:

Աղբյուր` Փաստինֆո