Փաստ ինֆո

«Փաստինֆո»-ն արդեն տեղեկացրել է, որ «Լիա» գեղեցկության սրահի սեփականատեր Պետրոս Իսրայելյանը և Ռուբեն Խաչատրյանը, ով, մեր տեղեկություններով, ոստիկանության բարձրաստիճան պաշտոնյայի փեսան է, ձերբակալվել են։

Շենգավիթում երկու անձի սպանության գործով գեղեցկության սրահի սեփականատերը ձերբակալվել է

Քիչ առաջ Քննչական կոմիտեն այս կապակցությամբ հանդես եկավ պաշտոնական հաղորդագրությամբ, որում մասնավորապես ասվում է.

Շենգավիթ վարչական շրջանում  նոյեմբերի 13-ին տեղի ունեցած սպանության դեպքի առթիվ ՀՀ քննչական կոմիտեի Երևանի քննչական վարչությունում քննվող քրեական գործով ձեռնարկված միջոցառումների արդյունքում այսօր ձերբակալվել է ևս երկու անձ՝ դիտավորյալ սպանության կասկածանքով։

Ավելի վաղ տեղեկացրել ենք, որ 2016 թվականի նոյեմբերի 13-ին  Շենգավիթ վարչական շրջանում գործող գեղեցկության սրահներից մեկում հնչած կրակոցների հետևանքով ստացած հրազենային վնասվածքներից մահացել է երկու անձ՝ Երևան քաղաքի բնակիչներ Գևորգ Ավետիսյանը և Մուշեղ Մուշեղյանը, ևս մեկ անձ՝ Արամ Պետրոսյանը, հրազենային վնասվածք է ստացել կրծքավանդակի աջ հատվածում, և նրա վիճակը գնահատվում է ծանր:

Դեպքի առթիվ Շենգավիթ վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի, 34-104-րդ հոդվածի 2-րդ մասի 1-ին կետի և 235-րդ հոդվածի 1-ին մասի հատկանիշներով, որի նախաքննությունը, ՀՀ քննչական կոմիտեի նախագահի հանձնարարությամբ, նոյեմբերի 14-ից շարունակվում է ՀՀ քննչական կոմիտեի Երևան քաղաքի քննչական վարչությունում:

Քրեական գործով ձեռնարկված միջոցառումների արդյունքում այսօր ներկայացել են դեպքի վայր հանդիսացող գեղեցկության սրահի սեփականատեր Պ.Իսրայելյանը և քաղաքացի Ռ.Խաչատրյանը, ովքեր վարույթն իրականացնող մարմնի կողմից ձերբակալվել են սպանության կասկածանքով։ Վերջիններս, օգտվելով դատավարական իրենց իրավունքներից, հրաժարվել են ցուցմունք տալ։

Հիշեցնենք, որ քրեական գործով ավելի վաղ ձերբակալվել էր նաև մեկ այլ անձ՝ ծանր հանցագործությունը պարտակելու կասկածանքով։

Նախաքննությունը շարունակվում է, իրականացվում են մեծածավալ քննչական գործողություններ՝ դեպքի բոլոր հանգամանքները, մեղսակից անձանց շրջանակը պարզելու ուղղությամբ։

Քննության արդյունքների մասին տեղեկույթ կտրամադրվի պարբերաբար։

Աղբյուր` Փաստինֆո