Փաստ ինֆո

«Սասնա ծռեր» խմբի անդամ Արայիկ Խանդոյանի, ով հայտնի է որպես «Միայնակ գայլ», խափանման միջոց կալանքի ժամկետը երկարացվել է երկու ամսով՝ մինչև 2017թ. հունվարի 30-ը: Այս մասին «Փաստինֆո»-ի լրագրողին հայտնեց Ա.Խանդոյանի պաշտպան, փաստաբան Արա Ղարագյոզյանը՝ հավելելով, որ իրենց միջնորդությունը գրավ կիրառելու մասին մերժվել է:

Ավելի վաղ, նոյեմբերի 10-ին որոշում է կայացվել նրա մեղադրանքը լրացնելու մասին: Ըստ այդմ, Արայիկ Խանդոյանին մեղադրանք է առաջադրվել ՀՀ քրեական օրենսգրքի 235-րդ հոդվածի 3-րդ մասով՝ կազմակերպված խմբի կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, 218-րդ հոդվածի 3-րդ մասի 1-ին կետով՝ կազմակերպված խմբի կողմից պատանդ վերցնելր, և 238-րդ հոդվածի 4-րդ մասի 1-ին և 2-րդ կետերով՝ կազմակերպված խմբի կողմից կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը:

Այսօր երկու ամսով երկարացվել է նաև «Սասնա Ծռեր»-ին օժանդակելու մեջ մեղադրվող Մանվել Աթոյանի կալանքի ժամկետը՝ մինչև հաջորդ տարվա հունվարի 20-ը:

Աղբյուր` Փաստինֆո