Փաստ ինֆո

Ազգային ժողովի ՀՅԴ խմբակցության ղեկավար Արմեն Ռուստամյանը ճիշտ է համարում Հայաստանի Հանրապետության պաշտպանության ժամանակ զոհված և հաշմանդամ դարձած զինծառայողների հատուցման համար հատուկ հիմնադրամ ուստեղծել գաղափարը:

Ազգային ժողովում լրագրողների հետ զրույցում Ռուստամյանն ընդգծեց, որ պետք էր մի քիչ ավելի լավ հանրությանը ներկայացնել գաղափարը, որ այսպիսի դժգոհություն չառաջանար հանրության որոշ հատվածի մոտ: Ռուստամյանը նշեց, որ նպատակը, գաղափարը շատ ճիշտ է:

«Մեր ռեսուրսը նկատի ունենալով՝ պետք է նոր կոնցեպցիայի վրա կառուցենք մեր բանակաշինարարությունը և ազգ-բանակ հասկացությունը, որ պետք է ազգովի պաշտպանական խնդիրներին լուծում տանք»,- «Արմենպրես»-ի հաղորդմամբ՝ ասաց պատգամավորը: Ըստ պատգամավորի՝ սա ազգային տուրքի գաղափար է, սիմվոլիկ գումար է, որով մասնակից է դարձնում ցանկացած մեկին պաշտպանական հարցերի մեջ:

«Պետք է իսկապես ցույց տանք, որ մենք ազգ-բանակ ենք: Այլ տարբերակ չունենք, որովհետև երբ դու չես կերակրում քո բանակը, դու ստիպված կլինես կերակրել օտարի բանակը»,- շեշտեց Ռուստամյանը: Ռուստամյանը նշեց, որ իրենք ընդունում են բոլոր այն հարցադրումները, որոնք միտված են գաղափարը ավելի լավն ու ճիշտը դարձնելուն:

«Գաղափարը չպիտի կործանվի, գաղափարը պիտի պահպանել և ովքեր որ մտածում են` գաղափարը պետք է պահպանել նրանց հետ ունենք խնդիր նստենք, քննարկենք արդյո՞ք համաչափությունը, համամասնությունը ճիշտ է: Պետք է մարդկանց եկամուտներին համապատասխանեցվի իրենց ներդրումը, բայց որ այդ ներդրումը պիտի լինի, կլինի մեկ դրամ, տաս դրամ,
թե հազար դրամ, ես կասկած չունեմ, որովհետև դա պարտադիր է, անհրաժեշտ է»,- ընդգծեց նա:

Հարցին՝ ճի՞շտ է համարում այն մոտեցումը, որ պետք է հունվարի 28-ից հետո վիրավորված կամ զոհված զինծառայողներին միայն հիմնադրամը հատկացումներ անի, Ռուստամյանն արձագանքեց. «Դա ուրիշ բան է: Նրանք, ովքեր գաղափարը ընդունում են, նրանց առաջարկները մեզ համար հասկանալի են: Այո,՛ կարծում եմ, որ պետք է նաև հետադարձ ուժ ունենալու հարցերը լուծվի: Այսինքն` հարցեր կան, որոնք հղկման կարիք ունեն, դրա անհրաժեշտություն կա: Որոշակի խնդիրներ կան, որոնք հղկելու կարիք ունեն, ավելի արդար միջավայր ձևավորելու կարիք ունեն, այդ բոլոր առաջարկները մենք կողջունենք: ՀՅԴ-ն էլ է մշակում իր առաջարկները, շուտով կհրապարակենք»:

Ռուստամյանի խոսքով այս հիմնադրամի ստեղծումը չի փոխարինում պետության ֆունկցիաներին, գործունեությանը:

«Պետությունը պիտի շարունակի անել իր գործը, բայց մենք պետք է հասկանանք, որ ազգ ենք մեկ բանակ ունենք և այդ «մեկ ազգ մեկ բանակ» հասկացությունը մենք չենք հորինել: Բոլոր մեր պայմաններում գտնվող պետությունները այս քայլով են իրենց պաշտպանությունը ձևավորել և ամրապնդել: Սրանով հասկացնում ենք մեր թշնամուն, որ այստեղ միասնություն կա»,- ասաց պատգամավորը: Ռուստամյանը ընդունում է բոլոր քննադատությունները, որոնք հիմնավոր են, բայց, դրանով հանդերձ, ճիշտ չի համարում այն, որ ամեն լավ գաղափար պետք է քարկոծել:

Լուսանկարը՝ Ֆոտոլուրի

Աղբյուր` Փաստինֆո