Փաստ ինֆո

«Սասնա ծռեր» խմբի անդամ Սմբատ Բարսեղյանին առաջադրված մեղադրանքը լրացվել է սպանության հոդվածով: Այդ մասին «Փաստինֆո»-ի հարցմանն« ի պատասխան հայտնեցին Գլխավոր դատախազության հանրային կապերի բաժնից:

«Կազմակերպված խմբի կողմից, զենքի գործադրմամբ 2016 թվականի հուլիսի 17-ին ՀՀ ոստիկանության Երևան քաղաքի վարչության պարեկապահակետային ծառայության գնդի տարածք մուտք գործելու, նշված ստորաբաժանման վարչական շենքը, հարակից տարածքը զավթելու և պահելու դեպքի առթիվ հարուցված, ՀՀ հատուկ քննչական ծառայությունում քննվող քրեական գործի նախաքննության ընթացքում ձեռք բերված բավարար ապացույցների համակցության հիման վրա՝ մինչդատական վարույթն իրականացնող մարմնի 2016 թվականի նոյեմբերի 10-ի որոշմամբ Սմբատ Բարսեղյանին առաջադրված մեղադրանքը լրացվել է:

Այսպիսով, 2016 թվականի նոյեմբերի 11-ին Սմբատ Բարսեղյանին մեղադրանք է առաջադրվել ՀՀ քրեական օրենսգրքի 218-րդ հոդվածի 3-րդ մասի 1-ին կետով, 235-րդ հոդվածի 3-րդ մասով, 238-րդ հոդվածի 4-րդ մասի 1-ին ու 2-րդ կետերով և 104-րդ հոդվածի 2-րդ մասի 1-ին, 2-րդ, 3-րդ և 11-րդ կետերով:

Մասնավորապես, Սմբատ Բարսեղյանին մեղադրանք է առաջադրվել նաև այն բանի համար, որ հուլիսի 30-ին ՊՊԾ գնդի տարածքից զինյալ դիպուկահարի կողմից կրակ է բացվել, ինչի հետևանքով սպանվել է ՊՊԾ գնդից 350-400 մետր հեռավորության վրա, ավտոմեքենայի մեջ գտնվող, 1986 թ. ծնված Յուրի Տեփանոսյանը», - նշեցին դատախազությունից:

Աղբյուր` Փաստինֆո