Փաստ ինֆո

ԼՂՀ ազգային ժողովի պատգամավոր Հայկ Խանումյանին առևանգելու ու ծեծի ենթարկելու գործի հետ կապված պատգամավորի ու նրա ներկայացուցիչ Հայկ Ալումյանի բոլոր հինգ բողոքները մերժվել են ԼՂՀ առաջին ատյանի դատարանի կողմից: Այս մասին «Փաստինֆո»-ի լրագրողին հայտնեց փաստաբան Հայկ Ալումյանը՝ հավելելով, որ անպայման դատարանի որոշումների դեմ բողոքներ կներկայացվեն Վերաքննիչ դատարան:

Հայկ Խանումյանն ու նրա ներկայացուցիչ Հայկ Ալումյանը բողոքարկել են քննիչի հինգ որոշումները: Մասնավորապես, բողոքներ են ներկայացվել Հայկ Խանումյանին առևանգելու ու ծեծի ենթարկելու գործը խուլիգանության վերարորակելու, չորս մեղադրյալների նկատմամբ քրեական հետապնդումը դադարեցնելու, Հայկ Խանումյանի քաղաքացիական հայցն ընդունելուց հրաժարվելու, ոստիկանների նկատմամբ քրեական հետապնդում չիրականացնելու (ըստ տուժող կողմի, ոստիկաններն անգործություն են դրսևորել՝ չգրանցելով դեպքի մասին ահազանգող հեռախոսազանգերը) և նախաքննությունը լրացնելու իրենց միջնորդությունը մերժելու մասին քննիչի որոշումների դեմ:

Ավելի վաղ Հայկ Ալումյանը մեզ հայտնել էր, որ «մենք պատրաստվում ենք սպառել ներպետական պաշտպանության միջոցները»:

Հիշեցնենք, որ չորս անձանց նկատմամբ պատգամավորին առևանգելու ու ծեծի ենթարկելու մեղադրանքը վերաորակվել էր խուլիգանության մեղադրանքի, ապա համաներման հիմքով քրեական գործի վարույթը կարճվել էր ու չորս մեղադրյալների նկատմամբ քրեական հետապնդումը դադարեցվել:

Լուսանկարը՝ Ֆոտոլուրի

Աղբյուր` Փաստինֆո