Փաստ ինֆո

Ծննդկան Մերի Մարգարյանի և նրա դստեր մահվան գործով այսօրվա դատական նիստում հարցաքննվեց նաև «Շենգավիթ» ԲԿ-ի անեսթեզիոլոգ-ռեանիմատոլոգ Արամ Գրիգորյանը։

Բացի այն, որ վկան ճանաչում էր ամբաստանվող բժիշկներին, նա ճանաչում էր նաև Մերի Մարգարյանին, նրա հետ աշխատել է դեռևս 2014թ հունվարից:

Վկան նշեց, որ 2015թ հուլիսի 27-ի գիշերը, երբ իրեն ծնարան են կանչել մեկ այլ հղիի ցավազրկելու համար, այդ ժամանակ ծնարան է եկել նաև Մերի Մարգարյանը` պտղի բաբախը լսելու նպատակով և այդ ժամանակ, Արամ Գրիգորյանի խոսքով, ինքը ապարատի միջոցով ստուգել է Մերիի ճնշումը, ապա կարճ ժամանակ անց նաև զննել է Մերիին պաթոլոգիայի բաժնում:

Նրա վստահեցմամբ՝ Մերիի թոքերում ոչ մի պաթոլոգիական փոփոխություն չի նկատվել, գիտակցությունը պարզ է եղել, ցավեր չի ունեցել, հևոցներ ևս չեն եղել, իսկ մինչ այդ եղել է մեկ անգամ փսխում, սակայն այս ամենը միասին կրկնակի հետազոտության համար պատճառ չի կարող հանդիսանալ:

Ինչ վերաբերում է նրան, որ Մերիի ջերմությունը 35,8 է եղել, որի մասին Արամ Գրիգորյանին ևս տեղյակ են պահել, հղիին խորհուրդ է տվել տաքացնող միջոցներ, ինչպե նաև՝ տաք թեյ, որը կարող է նաև ձեռքերի ափերում պահել, որպեսզի արյան շրջանառությունը լավանա:

Ժամեր անց՝ առավոտյան ժամը 08-ի սահմաններում, Արամ Գրիգորյանի խոսքով, ինքը կրկին գնացել է Մերիի մոտ որտեղ նաև եղել է Շուշանիկ Բախշյանը և վերջինս խորհուրդ է տվել գինեկոլոգիական հետազոտության ենթարկել նրան:

Գրիգորյանը Մերիի վիճակը բավարար է գնահատել, հիվանդանոց ընդունելուց հետո, նրա խոսքով, միակ փոփոխությունը եղել է ջերմության իջեցումն ու փսխումը:

Իսկ երբ իր հերթապահությունը տվյալ օր ժամը 09.00-ին ավարտվել է, հիվանդանոցից գնալուց ժամեր անց, Գրիգորյանն առողջական խնդիրների պատճառով գտնվել է «Էրեբունի» ԲԿ-ում, այնտեղ հանդիպել է Մերիի հայրիկին և տեղեկացել, որ Մերիի վիճակը վատացել է ու նրան տեղափոխել են «էրեբունի» ԲԿ:

Այնտեղ Գրիգորյանն իր կոլեգաներից հետաքրքրվել է, թե ինչպես է Մերին, և իրեն հայտնել են, որ Մերիի վիճակը ծանր է և հետազոտություններ են կատարում:

«HELLP» սինդրոմի վերաբերյալ էլ Գրիգորյանը նշեց, որ 15 տարվա իր մասնագիտական գործունեություն մեջ «HELLP» հիվանդության հետ չի առնչվել և այդ մասին միայն ծանոթ է կարդալու միջոցով:

Միևնույն ժամանակ Գրիգորյանը չբացառեց, որ այդ ընթացքում Մերիի մոտ «HELLP» հիվանդությունն է զարգացել:

Ինչ վերաբերում է նրան, որ ինքն է Մերի Մարգարյանին խորհուրդ տվել Շուշանիկ Բախշյանի մոտ հաշվառվել, վկան ասաց, որ Մերին արդեն հաշվառված է եղել Շուշանիկ Բախշյանի մոտ: Երբ իրեն այդ մասին տեղեկացրել է ու հարցրել, թե ինչ կարող է ասել բժշկուհու մասին, ի պատասխան Գրիգորյանն ասել, որ իր երրորդ երեխայի ծնունդը վստահել է Բախշյանին:

Վկաների հարցաքննությունը կշարունակվի դեկտեմբերի 6-ին կայանալիք դատական նիստում:

Աղբյուր` Փաստինֆո