Փաստ ինֆո

ԼՂՀ նախագահին առընթեր սահմանադրական բարեփոխումների մասնագիտական հանձնաժողովի անդամներն այսօրվանից հանրային քննարկումներն սկսել են հանրապետության շրջաններում:

«Արցախպրես»-ի թղթակցի հաղորդմամբ, Հադրութում ներկայացրելով Սահմանադրության փոփոխությունների նախագիծը, ԼՂՀ նախագահին առընթեր սահմանադրական բարեփոխումների մասնագիտական հանձնաժողովի անդամ, ԼՂՀ գլխավոր դատախազ Արթուր Մոսիյանը, ներկաներին բացատրել է սահմանադրական բարեփոխումների նշանակությունը, ընդգծել է հասարակության տարբեր խավերի հետ նախագծի քննարկման անհրաժեշտությունը` մանրամասն անդրադառնալով նոր Սահմանադրության նախագծի գլուխներին և հոդվածներին:

Անդրադառնալով Սահմանադրության 8-րդ գլխին, որը վերաբերում է տեղական ինքնակառավարման մարմինների ընտրության կարգին, Արթուր Մոսիյանն առանցներել է համայնքների խոշորացուման հարցը:

 «Ընդհանուր առմամբ, փիլիսոփայությունն այն է, որ մենք գնալու ենք համայնքների խոշորացման: Կխնդրեի, որ ճիշտ հասկանաք ասվածի իմաստը: Սա այն խոշորացումը չէ, որ մի քանի համայքը միանում ու դառնում են մեկ համայնք: Առաջարկվող տարբերակն Սահմանադրությունում չկա: Մինչև 2022 թվականը մենք դեռ ժամանակ ունենք այդ ուղղությամբ աշխատելու: Մեր պետության մեջ այսօր ամենաչկայացած համակարգը ՏԻՄ ինստիտուտն է համարվում, որովհետև մի կողմից մենք շատ պահանջներ ենք դնում տեղական ինքնակառավարման մարմինների մասով, մյուս կողմից էլ դրանք ֆինանսավորվում են պետական բյուջեով և նրանք շատ բան անել չեն կարող: Առաջարկված համակարգում ցանկանում ենք այնպես անել, որ համայքն ունենա սեփական բյուջե և ավելանան օրենքով նախատեսված լիազորությունների շրջանակը:

Ամենայն հավանականությամբ որոշակի հարկեր համայնքն է հավաքելու, որպեսզի կարողանա իր խնդիրներն իրականացնել: Համայնքային կառավարում ասվածը շատ դեպքերում մնում է թղթի վրա, երբեմն էլ համայնքի ղեկավարները չեն կարողանում իրենց համայնքներում իրականացնել այն լիազորությունները, որոնք անհրաժեշտ է: Այս տարբերակն ամենաքննարկվելին է: Դիցուք, եթե Հադրութի շրջանը դառնա մեկ համայք և ընտրվի Հադրութի շրջանի համայնքի ղեկավար, այն իր մեջ ներգրավվելու է Հադրութի շրջանի բոլոր բնակավայրերը: Ընտրված համայնքի ղեկավարն էլ ընտրելու է բնակավայրերի, վարչական շրջանների ղեկավարներ: Սա ամենաշատ քննարկվող տարբերակն է: Համայնքն կունենա իր բյուջեն, բնակավայրերը` նույնպես: Այդ դեպքում համայնքները կկարողանան ինքնուրույն գործել: Սա, կարծում եմ, դեռևս երկար քննարկումների կարիք ունի և Սահմանադրությունում չկա. Դրա լուծումը թողնում ենք օրենքին»,- տեսակետը մանրամասնել է Ա. Մոսիյանը:

 «Արցախպրես»-ի թղթակցի հետ զրույցում Հադրութի շրջանի վարչակազմի ղեկավարի տեղակալ Արմեն Օհանյանն էլ ընդգծել է, որ սահմանադրական բարեփոխումներն անհրաժեշտ են:

Հատկապես համայնքների խոշորացման հարցը, ըստ իս, շատ կարևոր է, որովհետև նման կերպ ավելի արդյունավետ կիրականացվի տեղական ինքնակառավարման մարմինների ղեկավարումը»,- ըստ էության ասել է Արմեն Օհանյանը:«Իրականում կառավարման համակարգում շատ խնդիրներ կան, որոնք կարծում եմ լուծում կստանան սահմանադրական փոփոխություններով:

Քննարկման ընթացքում ԼՂՀ նախագահին առընթեր սահմանադրական բարեփոխումների մասնագիտական հանձնաժողովի անդամները պատասխանել են նաև մասնակիցների հուզող հարցերին:

Լուսանկարը՝ «Արցախպրես»-ի

Աղբյուր` Փաստինֆո