Փաստ ինֆո

«Սուրբ Աստվածամայր» բժշկական կենտրոնի բժիշկներ Դավիթ Նիկոլայի Դալլաքյանը և Նիկոլայ Դալլաքյանը ծնվելուց 4 ժամ անց բարդ վիրահատության են ենթարկել մի փոքրիկի, ով ծնել էր լուրջ խնդիրներով՝ արդյունքում ոչ միայն հնարավոր է եղել փրկել երեխայի կյանքն այլև նա ապրում է լիարժեք կյանքով: Այս մասին ֆեյսբուքում գրառել է օգտատեր Էմիլ Մարկոսյանը: 

Գրառման մեջ մասնավորապես ասվում է.
Արդեն բավական ժամանակ է, ինչ մեր ԶԼՄ-ների ուշադրության կենտրոնում միայն նեգատիվ երևույթներն են և դա հասկանալի է։ Սակայն մենք ուզում ենք, որ ուշադրության կենտրոնում լինեն նաև այն մարդիկ, ովքեր հեքիաթի բարի կախարդների նման ուղղակի հրաշքներ են գործում։

Տվյալ դեպքում խոսքը «Սուրբ Աստվածամայր» բժշկական կենտրոնի և դրա անձնակազմի՝ Դավիթ Նիկոլայի Դալլաքյանի և Նիկոլայ Դալլաքյանի մասին է։

Նրանք հիրավի մարդկային ու մասնագիտական հրաշք գործեցին։ Ծնվելուց ընդամենը չորս ժամ անց նրանք ուղղակի երկրորդ ծնունդը պարգևեցին մեր նորածին բալիկին՝ Սոնա Շահինյանին, և երկու ժամ տևած բարդ վիրահատության ենթարկելով՝ փրկեցին նրա մատղաշ կյանքը։

Բժշկական բարդ տերմինաբանությունից խուսափելու նպատակով ուղղակի ասենք, որ երեխայի ներքին օրգանները տեղախախտված են եղել. աղիները բարձրացած են եղել ու սեղմվել են ստամոքսին ու թոքին։ Հարկավոր էր շտապ վիրահատել։

Դեռևս կարգին լույս աշխարհ չտեսած բալիկին պիտի վիրահատեին, բացվածքով։ Հաջող ընթացքի 30-40 տոկոս հավանականություն կար։ Վիրահատությունից հետո չորս օր երեխան միացված էր արհեստական շնչառության սարքին, իսկ հինգերորդ օրը ինքնուրույն շնչեց, կերակրվեց ու աղիները գործեցին։ Դա իսկական հրաշք էր...

Վիրահատությունից երկու շաբաթ անց մեր բալիկն արդեն տանն էր ու ապրում է լիարժեք կյանքով,- գրառել է Էմիլ Մարկոսյանը իր խորին երախտագիտությունը հայտնելով մարդկային ու մասնագիտական հրաշքներ գործած բժիշկներին՝ Դավիթ Նիկոլայի Դալլաքյանին, Նիկոլայ Դալլաքյանին և «Սուրբ Աստվածամայր» բժշկական կենտրոնի ողջ անձնակազմին սրտացավ ու հոգատար վերաբերմունքի համար։

«Նման մարդկանց ու նման վերաբերմունքի հանդիպելիս ամրանում է հավատը, որ մեր երկիրն իրոք ապագա ունի»,- ասվում է գրառման մեջ։

Աղբյուր` Փաստինֆո