Փաստ ինֆո

Հայաստանում 2017 թվականին տնտեսական աճի ռիսկերը կարող են շարժվել և նվազման և աճի ուղղություններով: «Արմենպրես»-ի հաղորդմամբ, այս մասին լրագրողների հետ հանդիպման
ժամանակ նշեց ՀՀ ֆինանսների նախարար Վարդան Արամյանը: Նրա խոսքով` ռիսկերը գնահատված են ներքին և արտաքին մակարդակներով:

Նախարարի ներկայացմամբ, արտաքին ռիսկերի պարագայում Հայաստանի տնտեսական աճի 3,2 տոկոսի ապահովման վրա մեծ ազդեցություն ունեն հումքային արտադրանքների միջազգային գները, գլոբալ միջազգային տնտեսական համակարգի ցնցումները ու միջազգային տնտեսական աճի նվազումները և այլ գործոններ: Նախարարի խոսքով` եթե գլոբալ տնտեսական աճն ամբողջ աշխարհում ավելի թույլ լինի, բնականաբար այն կազդի նաև Հայաստանի վրա:

«Տնտեսական աճը պայմանավորված է նաև ՌԴ տնտեսության աճով: Որոշ մասնագետներ ասում են, որ Ռուսաստանի տնտեսությունը սանկցիաների կիրառման հետևանքով հասել էր հատակին, սակայն 2016 թվականը կայունացման տարի է և թևակոխելու է վերելքի ժամանակահատված, հաջորդ տարի կանխատեսվում է նավթի համաշխարհային գների շուրջ տասը տոկոս աճ, սակայն եթե այնպես ստացվի, որ դրանք նվազեն, ապա կարող են բացասական հետևանքներ ունենալ նաև մեր տնտեսության վրա: Դա նշանակում է, որ շատ կդժվարանա 3,2 տոկոս տնտեսական աճի ապահովումը»,- ասաց նախարարը:

Անդրադառնալով ներքին ռիսկերին նախարարը նշեց, որ այդ պարագայում շատ կարևոր է տնտեսավարողների և հանրության վարքագիծը: Նրա խոսքով` եթե որոշակի օբյեկտիվ պատճառներով որևէ գործողություններ իրենք չկարողանան իրականացնել, որը կազդի տնտեսավարողների գործառույթների վրա, ապա այն նույնպես կազդի 3,2 տոկոս տնտեսական աճի վրա:

Լուսանկարը՝ Armenpress-ի

Աղբյուր` Փաստինֆո