Փաստ ինֆո

Երևանի Կենտրոն և Նորք-Մարաշ վարչական շրջանների դատարանը՝ դատավոր Մնացական Մարտիրոսյանի նախագահությամբ, Նալբանդյանների նկատմամբ խոշտանգումների մասով բողոքն այսօր ըստ ընդդատության ուղարկեց ՀՀ Գեղարքունիքի մարզի ընդհանուր իրավասության դատարան:

Նալբանդյանների պաշտպան, փաստաբան Սեդա Սաֆարյանի բողոքն առնչվում է Գեղարքունիքի մարզում անչափահաս աղջկա սպանության գործի նախաքննության շրջանակներում Նալբանդյաններին ծեծի ենթարկելու, խոշտանգելու փաստին:

Սեդա Սաֆարյանը վիճարկում է Գեղարքունիքի մարզի դատախազի օգնական Յուրի Իսկոյանի 2004թ. որոշումը (ներկայումս Յու. Իսկոյանը դատավոր է), որով, ըստ Ս.Սաֆարյանի, իբրև հիմնավորվել է, որ Նալբանդյաններին ծեծի չեն ենթարկել:

Մինչդեռ Մարդու իրավունքների եվրոպական դատարանը դիրքորոշում է արտահայտել, որ դա չի եղել անկաշկանդ մարմին, ուստի այն չէր կարող արդյունավետ հետաքննություն իրականացնել, առավել ևս մի տարածքում, որտեղ դեպքերը տեղի են ունեցել, առավել ևս այն աշխատողների նկատմամբ, որոնց հետ ունեն ծառայողական կախվածություն: Մասնավորապես, դատախազի մի տեղակալին այսպես ասած հարցաքննել է դատախազի մյուս տեղակալը, այսինքն՝ ստացվում է, որ քննությունը կատարվել է ոչ անկախ ու ոչ անկողմնակալ մարմնի կողմից: Դրա արդյունքում կատարված հետևությունները հավատ չեն ներշնչում, ասաց փաստաբանը:

Լրագրողների հետ զրույցում Սեդա Սաֆարյանը նշեց, որ դատարանը փորձեց ընդդատության կանոնները չխախտել, մանավանդ որ Նալբանդյանների գործը խնդիրներով գործ է:

Փաստաբանը գտնում է, որ Վճռաբեկ դատարանը մայր գործն ու խոշտանգումների վերաբերյալ գործը դատարաններ ուղարկելու որոշումներ կայացնելիս պետք է հիմնավորված պատճառաբանություններ ներկայացներ, թե ինչու է նպատակահարմար դրանք այս կամ այն դատարան ուղարկել: Դա չի արվել, և գործերն՝ երկուսն էլ, Գեղարքունիքի մարզ ուղարկելով պաշտպանական կողմի համար նորից մեծ դժվարություններ են ստեղծվում: «Նրանք գնում են այն տարածք, որտեղ մենք լուրջ խնդիրներ ունենք և՛ դատական ու դատախազական համակարգերի, և՛ նախաքննական մարմինների հետ», - ասաց Սեդա Սաֆարյանը:

Իրավիճակն այնպիսին է, նշեց Ս.Սաֆարյանը, որ Գեղարքունիքում պաշտպանական կողմն անհատապես բոլոր դատավորներին, ովքեր առնչվել են այս պատմության հետ, ինքնաբացարկի միջնորդություն պետք է ներկայացնի:

«Գեղարքունիքում և՛ մայր գործով, և միջանկյալ որոշման գործով հնարավոր չէ արդարացի քննություն ապահովել, որովհետև արդեն իսկ կանխատեսելի է, որ այնտեղ կան շահագրգիռ ուժեր և արդեն իսկ դժվար է խոսել գործի օբյեկտիվ քննության մասին: Ավանդական կապերը թույլ չեն տա, որ գործով քննությունն օբյեկտիվ տարվի: Կրկին պաշտպանության կողմն արհեստական, լուրջ խոչընդոտների է հանդիպելու այս գործի քննության ընթացքում»,- ասաց պաշտպանը:

Սեդա Սաֆարյանը տեսակետ հայտնեց, որ Վճռաբեկ դատարանը կարող էր գործով այլ որոշում կայացնել և գործերն անկաշկանդ վայրեր քննության ուղարկել: Մեծ ջանքեր կպահանջվեն մարդկանց իրավունքների օբյեկտիվ պաշտպանությունը ապահովելու համար, կսկսվի քաշքշուկ, ինչը նպատակահարմար չէ այդ գործի պարագայում, հաշվի առնելով, որ արդեն տասներեք տարի չի հաջողվում գործով ճշմարտությունը բացահայտել:

Աղբյուր` Փաստինֆո