Փաստ ինֆո

Սյունիքի նախկին մարզպետ Սուրիկ Խաչատրյանի ազգականուհին՝ Գայանե Շալունցը, բաց նամակ է հղել ՀՀ վարչապետ Կարեն Կարապետյանին՝ խնդրելով, որպեսզի Հայաստանում իրական քայլեր արվեն՝ անօրինական և պարտադրված դատական ակտերի կայացմանը վերջ դնելու ուղղությամբ: Դրանցով, ըստ Գայանե Շալունցի, խախտվում են, տվյալ դեպքում` բազմազավակ մոր աշխատանքային իրավունքները, իսկ ընդհանրապես` ՀՀ բնակչության հավատը` Հայաստանում արդարության հասնելու նկատմամբ, ինչն էլ պատճառ է դառնում խոր հիասթափության ու արտագաղթի:

Ստորև ներկայացնում ենք բաց նամակն ամբողջությամբ:

«ՄԵԾԱՐԳՈ ՎԱՐՉԱՊԵՏ:

Ես` Գայանե Շալունցս, 22.05.2007թ-ից մինչ 2014թ. հոկտեմբեր ամիսը աշխատել եմ ՀՀ ԱՍՀՆ Սոցիալական ապահովության պետական ծառայության աշխատակազմի Գորիսի սոցիալական ապահովության տարածքային բաժնի պետ:

2014 թվականի հոկտեմբերին ինձ ազատել են աշխատանքից և շուրջ երկու տարի է գտնվում եմ տարբեր դատական գործընթացների մեջ:

Ինձ աշխատանքից հեռացնելու պատճառն այն էր, որ առանց Սյունիքի նախկին մարզպետ Սուրիկ Խաչատրյանի՝ իմ հարազատ մորեղբոր, գիտության և իմացության, Սյունիքի այդ ժամանակվա մարզպետ Վահե Հակոբյանի հրավերով 2013 թ. դեկտեմբերի 28-ին մասնակցել եմ Գորիսում կազմակերպված Ամանորյա երեկույթին:

Միջոցառումից հետո մայրս, ով Սյունիքի մարզպետ Սուրեն Խաչատրյանի հարազատ քույրն է, այցելել էր նրան: Խոսակցության ընթացքում Սուրիկ Խաչատրյանը հայտնել է, որ այդ ամանորյա միջոցառմանը մասնակցելու համար ինձ վրա բարկացած է և բարոյական ապտակ է հասցնելու:

Որոշ ժամանակ անց քաղաքում սկսեցին լուրեր շրջանառվել, որ Սուրիկ Խաչատրյանը կրկին մարզպետ է նշանակվելու և մինչ նշանակումը ցանկանում է ինձ հեռացնել աշխատանքից: Եվ իսկապես այդ լուրերից հետո Գորիսի սոցապ բաժնում, որտեղ ես աշխատում էի որպես պետ, սկսեցին իրականացվել ստուգումներ:

Առաջին ստուգումը իրականացվել է 12.07.2014 թ.-ին, ՀՀ աշխատանքի և սոցիալական հարցերի նախարարության կողմից: Ստուգման արդյունքում, ոչ մի խախտում չի հայտնաբերվել, ինչի վերաբերյալ կազմվել է տեղեկանք:

Այս ստուգումից հետո անձամբ մեր տուն է գալիս Սուրիկ Խաչատրյանի կողմից հրահանգված Արայիկ Պարոնյանը, ով Սոցիալական ապահովության պետական ծառայության պետի տեղակալներից է և ինձանից պահանջում է, որպեսզի իմ դիմումի համաձայն ազատվեմ աշխատանքից, պարզաբանելով, որ այսպես թե այնպես հնարավոր չի լինելու հետագա աշխատանքը, քանի որ դրան դեմ է Սուրիկ Խաչատրյանը: Ես հայտնեցի, որ աշխատանքից ազատվելու մտադրություն չունեմ և ազատման դիմում չեմ գրի:
Այս խոսակցությունից հետո ես 31.07.2014 թ.-ին դիմել եմ ՀՀ Նախագահ Սերժ Սարգսյանին, հայտնելով վերը ներկայացվածը և կից ուղարկել եմ ԱՍՀՆ-ի կազմած տեղեկանքը, համաձայն որի իմ կատարված աշխատանքում որևէ խախտում կամ թերացում չի հայտնաբերվել, սակայն ինձնից պահանջում են, որպեսզի իմ կամքով ազատվեմ աշխատանքից:

Այս խոսակցություններից հետո 07.08.2014թ.-ին կրկին ստուգումներ են սկսվել ՍԱՊԾ մոնիթորինգի բաժնի կողմից՝ խմբի ղեկավար Նահապետ Դավթյան: Ընդ որում, ստուգման հիմքն այն է եղել, որ իբրև թե նախկին ստուգումը, որը իրականացվել է, բավարար չէ և պետք է իրականացվեն լրացուցիչ ուսումնասիրություններ:

Նոր ուսումնասիրության արդյունքում կազմվել է 20.08.2014 թ. տեղեկանք, որում իբրև թե հայտնաբերվել են նոր խախտումներ: ՀՀ քաղաքացիական ծառայության խորհուրդը 02.09.2014թ.-ին ծառայողական քննություն է սկսել և ինձ աշխատանքից ազատելու վերաբերյալ տվել համաձայնություն, որի հիման վրա ինձ զբաղեցրած պաշտոնից ազատել են և զրկել դասային աստիճանից: Արդեն 2 տարի է գտնվում եմ դատական գործընթացների մեջ՝ փորձելով վերականգնել իմ աշխատանքային իրավունքները:

Այն, որ նախկին մարզպետ Ս. Խաչատրյանի դերը և ազդեցությունը մեծ է նաև ՀՀ դատարանների նկատմամբ, հաստատվում է երկու տարվա ընթացքում կայացված ապօրինի դատական ակտերով: Սուրիկ Խաչատրյանը՝ կրելով Մայրության երախտիքի շքանշան, անուղղակիորեն խոչընդոտում է վերականգնել բազմազավակ մոր աշխատանքային իրավունքները:

Վարչական դատարանը թեև գտնում է, որ ինձ աշխատանքից ազատելու հիմքում ընկած երկու ենթադրյալ խախտումներից մեկը կեղծ է՝ իրականությանը չհամապատասխանող, այդուհանդերձ գտնում է, որ մյուս ենթադրյալ խախտումը հանդիսանում է բավարար հիմք ամենախիստ կարգապահական տույժ` աշխատանքից ազատում, նշանակելու վերաբերյալ: Այն, որ երկրորդ ենթադրյալ խախտումն էլ տեղի չէր ունեցել, պարզ էր նաև դատարանների համար, սակայն այլ արդյունք իմ պարագայում չէր էլ կարող լինել: Նշվածի վերաբերյալ մանրամասն նշված է ՙՍուրիկ Խաչատրյանի ազգականուհին` Գայանե Շալունցը, զրկված է դատական պաշտպանության իրավունքից.փաստաբան՚ հոդվածում:

Սուրիկ Խաչատրյանի ազգականուհին՝ Գայանե Շալունցը, զրկված է դատական պաշտպանության իրավունքից. փաստաբան

Փաստ է, որ ՀՀ-ի դատարանները անում են ամեն ինչ և ստեղծում են բոլոր նախադրյալները, որպեսզի քաղաքացիները դիմեն Եվրոպական դատարան, քանի որ ներպետական դատարաններում իշխում է ոչ թե իրավունքի ուժը, այլ ուժի իրավունքը:

Հարգելի պարոն Կարապետյան, սույնով հայցում և խնդրում եմ, որպեսզի իրական քայլեր կատարվեն ու Հայաստանում վերջ դրվի նման անօրինական և պարտադրված դատական ակտերի կայացմանը, քանի որ դրանցով խախտվում են, տվյալ դեպքում` բազմազավակ մոր աշխատանքային իրավունքները, իսկ ընդհանրապես` ՀՀ բնակչության հավատը` Հայաստանում արդարության հասնելու նկատմամբ, ինչն էլ պատճառ է դառնում խոր հիասթափության ու արտագաղթի»:

Լուսանկարը՝ Ֆոտոլուրի

Աղբյուր` Փաստինֆո