Փաստ ինֆո

Գեղարքունիքի մարզում անչափահասի սպանության 12 տարվա վաղեմության գործով արդեն երկրորդ դատաքննության ընթացքում սպասվում է լուրջ պայքար: Այս մասին «Փաստինֆո»-ի լրագրողին հայտնեց ՄԻԵԴ վճռի հիման վրա վերաբացված և արդեն Գեղարքունիքի մարզի ընդհանուր իրավասության դատարան ուղարկված գործով ամբաստանյալների պաշտպան, փաստաբան Սեդա Սաֆարյանը:

«Կարծում եմ, որ տասը տարի առաջ ինչ որ եղել է, կկրկնվի և մի փոքր էլ պասիվ ուժով, բայց նույն ձևի դժվարությամբ մենք դատաքննություն կմտնենք»,- ասաց Սեդա Սաֆարյանը: Ի պատասխան մեր հարցի՝ պաշտպանը նշեց նաև. «Ակնկալիքներ ունեմ, ինչու չունեմ որ, պարզապես գտնում եմ, որ իմ համար հեշտ չի լինելու կոտրելու համակարգի ուժը»:

Ըստ Նալբանդյան ամուսիններին առաջադրված մեղադրանքի, Նարինե Նալբանդյանն իր տան խոհանոցում իր դստեր ու տուժող, նրա համադասարանցի աղջկա անբարյացկամ փոխհարաբերությունների պատճառով վիճաբանել է վերջինիս հետ, որի ընթացքում սեղանի վրայից վերցնելով «Ջերմուկ» հանքային ջրի շիշը դիտավորությամբ հարվածել է նրա քթի շրջանին՝ պատճառելով քթոսկրի բեկորային կոտրվածք, այնուհետև նույն շշով երկու- երեք անգամ հարվածել է աղջկա գլխի տարբեր մասերինՙ պատճառելով փակ, բութ գանգուղեղային տրավմա:

Ստացած վնասվածքների հետևանքով աղջիկը գիտակցությունը կորցրել է և անգիտակից վիճակով ընկել է հատակին: Ստեղծված իրավիճակից մի պահ գիտակցության կորուստ է ունեցել նաև Ն.Նալբանդյանը, այդ պահին խոհանոց է մտել նրա ամուսին Բագրատ Նալբանդյանը, ով տեսնելով կատարվածը՝ ջուր է ցանել կնոջ դեմքին, ուշքի է բերել նրան և իմացել, որ կինն է շշով հարվածներ հասցրել աղջկա դեմքին և գլխին:

Բագրատ Նալբանդյանը Ն.Նալբանդյանի հորդորով մետաղյա հաղորդալար է բերել և դրանով մարմնի հետևում կապել աղջկա ձեռքերը, որպեսզի ավելորդ շարժումներ և փախչելու փորձ չանի, իսկ այդ ընթացքում շորի կտորով կապել է աղջկա բերանը, որպեսզի վերջինս չգոռա, չաղմկի և չկարողանա օգնություն կանչել:

Նշված գործողությունները կատարելու պահին աղջիկն անգիտակից վիճակում է գտնվել, բայց ողջ է եղել, այդ վիճակում Ն.Նալբանդյանը և Բ.Նալբանդյանը աղջկան թողել են խոհանոցում, իրենք դուրս են եկել այնտեղից՝ մտածելով, որ վերջինս ստացած վնասվածքներից կմահանա: Դրանից 5-6 ժամ հետո Նարինեն և Բագրատը մտածելով, որ աղջիկը մահացել է, երկուսով միասին նրա մարմինը դուրս են բերել խոհանոցից,այնուհետև իրենց հողամասի միջով տարել են փողոց և գցել իրենց պարիսպից 15-20 մ հեռավորության վրա գտնվող մազութի բետոնապատ հորը, որը 1,5 մ խորությամբ լցված է եղել ջրով, որտեղ էլ վերջինս մահացել է:

Տարիներ անց անչափահասի սպանության գործը կքննվի նորից. ՄԻԵԴ որոշմամբ Նալբանդյանների նկատմամբ անմարդկային վերաբերմունք է ցուցաբերվել

Ամուսիններին մեղադրանք է առաջադրվել ՀՀ քրեական օրեսնգրքի 104-րդ հոդվածի 2-րդ մասին 5-րդ և 7-րդ կետերով՝ մի խումբ անձանց կամ կազմակերպված խմբի կողմից առանձին դաժանությամբ կատարված սպանություն:

2004 թվականի հունիսին Նալբանդյաններին Գեղարքունիքի մարզի ոստիկանությունը ձերբակալել է անչափահաս աղջկա սպանության կասկածանքով, նրանց նկատմամբ բռնություններ են գործադրվել` ինքնախոստովանական ցուցմունքներ կորզելու նպատակով:

Հայաստանյան դատարանը Բագրատ Նալբանդյանին դատապարտել է 9 տարվա, նրա կնոջը` Նարինե Նալբանդյանին` 14 տարվա ազատազրկման, իսկ դստեր` Արևիկ Նալբանդյանի, նկատմամբ քրեական հետապնդումը դադարեցվել է:

Եվրադատարանը ճանաչել է, որ Նալբանդյանների հանդեպ խախտվել են արդար դատաքննության, դատական պաշտպանության մատչելիության իրավունքները, անմարդկային վերաբերմունք է ցուցաբերվել նրանց նկատմամբ: Որպես խախտված իրավունքների փոխհատուցում ՄԻԵԴ-ը սահմանել է, որ Բագրատ Նալբանդյանին Հայաստանի Հանրապետությունը պետք է վճարի 10 հազար, Նարինե Նալբանդյանին` 27 հազար և Արևիկ Նալբանդյանին՝ 25 հազար եվրո գումար:

Նալբանդյանն ընդդեմ Հայաստանի գանգատի գործով ՄԻԵԴ-ի կայացրած վճռի հիման վրա, գործի վերաբացման վարույթի շրջանակում ՀՀ վճռաբեկ դատարանը բեկանել է հայաստանյան դատական ակտերը և որոշել գործն ուղարկել Գեղարքունիքի մարզի առաջին ատյանի դատարան՝ նոր քննության:

Արդեն իսկ գործը մակագրված է Գեղարքունիքի մարզի ընդհանուր իրավասության դատարանի դատավոր Մնացական Հարությունյանին:

Աղբյուր` Փաստինֆո