Փաստ ինֆո

Ուրբաթ օրը Նյու Յորքում տեղի ունեցավ աշխարհի չեմպիոնի կոչման մրցախաղի առաջին պարտիան: Աշխարհի չեմպիոնը խաղում էր սպիտակ խաղաքարերով:

Մեկնարկային պարտիայում Կարլսենը ընտրել էր քիչ հանդիպող Տրամպովսկու սկզբնախաղը: Այնուամենայնիվ, նշենք, որ սա առաջին անգամը չէ, որ Կարլսենը ընտրում է այս սկզբնախաղը, և Կարյակինը պատրաստ էր իրադարձությունների նման ընթացքին:

Առաջին մի քանի քայլերը հանրահայտ Կարլսեն-Կրամնիկ պարտիայի կրկնությունն էին, որում Կարլսենը հաղթանակ էր տոնել, սակայն Կարյակինը 5-րդ քայլում այլ շարունակություն ընտրեց: Պարտիայում բավականին շուտ տեղի ունեցան բազմաթիվ փոխանակումներ և ստացվեց վերջնախաղ, որտեղ սպիտակները ունեին նավակ և ձի, սևերի նավակ և փղի դիմաց:

Ավելի լավ զինվորային կառուցվածքի շնորհիվ սպիտակները ունեին մինիմալ առավելություն, սակայն շատ դժվար կլիներ այն  զարգացնել: Համաձայն իր մարտական բնավորության՝  Կարլսենը ամեն դեպքում փորձեց գտնել թուլություններ սևերի պաշտպանությունում, սակայն Կարյակինը բավականին հաջող վերախմբավորեց իր ֆիգուրաները և պաշտպանեց բոլոր խոցելի կետերը:

Աշխարհի չեմպիոնը փոխանակեց նաև նավակաները՝ հուսալով ստանալ առավելություն «ձին փղի դեմ» վերջնախաղում, սակայն այստեղ ևս առավելության չկարողացավ հասնել: Սպառելով պայքարը շարունակելու բոլոր ռեսուրսները՝ խաղի 42-րդ քայլին կողմերը համաձայնվեցին ոչ-ոքիի: Նոյեմբերի 12-ին, Երևանի ժամանակով 23:00-ին կմեկնարկի մրցախաղի երկրորդ պարտիան:

Աղբյուր` Փաստինֆո