Փաստ ինֆո

ԱԱ-2018-ի ընտրական փուլի Հայաստան - Չեռնոգորիա հանդիպման նախօրեին կայացավ մեր ազգային հավաքականի գլխավոր մարզիչ Արթուր Պետրոսյանի մամուլի ասուլիսը: Մանրամասները ներկայացնում է armsport.am-ը:

- Առաջին հավաքն անցկացրիք. ինչպիսի՞ն է տպավորությունը:

- Կազմի հիմնական մասին ծանոթ եմ Շալանդի հետ աշխատելիս: Մեծ պատասխանատվություն է: Կարծում եմ` տղաները պատրաստ են:

- Հենրիխ Մխիթարյանն ինչպիսի՞ մարզավիճակում է:

- Նա հիանալի մարզավիճակում է, փայլուն է տրամադրված, ամեն ինչ կարգին է:

- Դավիթ Մանոյանը վնասվածք ստացավ և հեռացավ հավաքականից: Լավ չէր լինի՞, որ Արթուր Եդիգարյանը հրավիրվեր, ով լավ մարզավիճակում է:

- Եդիգարյանի խաղը տեսել եմ, իր հետ խոսել եմ: Այս խաղի համար կտրուկ բան անել պետք չէր, նա մեր տեսադաշտում է:

- Մրցակցի մասին ի՞նչ կասեք:

- Ուժեղ մրցակից է: Բնական է, հիմա չեմ ասի, թե ինչպես ենք խաղալու: Շանսերը 50/50 են. ամեն ինչ կտեսնենք վաղը: Պետք է նվիրվել:

- Ոչ ոքի արդյունքը գոհացնո՞ղ կլինի:

- Ցանկանում ենք հաղթել: Ամեն դեպքում, պարտություններից հետո դրական արդյունքը քայլ առաջ կլինի:

- Հոգեբանական խնդիրը լուծել հաջողվե՞լ է:

- Ինձ թվում է` այո: Տղաները լավ վիճակում են, ժպտում են: Մթնոլորտը շատ լավ է, վաղվա խաղում կտեսնեք:

- Պաշտպանությունում փոփոխություններ լինելո՞ւ են:

- Անպայման: Այդ ուղղությամբ 4 օրերի ընթացքում մեծ աշխատանք ենք կատարել:

- Տղաներին ճնշո՞ւմ է, որ երկար ժամանակ հաղթանակ չեն տարել:

- Չի ճնշում, բայց մտահոգում է: Ինչ-որ տեղ իրավունք ունեն, բայց մեր խաղով պետք է փորձենք երկրպագուներին վերադարձնել ստադիոն:

- Վերջին խաղերում հավաքականը գործում էր առանց կենտրոնական հարձակվողի. վաղվա խաղում կունենա՞նք ընդգծված հարձակվող ո՞վ կլինի:

- Կլինի հարձակվող, մնացածը չեմ ասի: Հաստատ է, որ խաղը լինելու է վաղը` ժամը 21-ին (ծիծաղում է,- խմբ.):

Աղբյուր` Փաստինֆո