Փաստ ինֆո

ՀՀ աշխատանքի և սոցիալական հարցերի նախարար Արտեմ Ասատրյանի կարծիքով՝ հասարակության կողմից ընդունելի կլինի մարտական գործողությունների հետևանքով զոհվածների ընտանիքների և հաշմանդամ դարձած անձանց համար հիմնադրամի ու ձևավորումն ամսական 1000 դրամ այնտեղ ուղղելը: Անդրադառնալով կառավարության հաստատած «ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» օրինագծին՝ Ասատրյանը նշեց, որ դա կնպաստի նշված անձանց լիարժեք և ամբողջական սոցիալական երաշխիքների կարգավորմանը:

«Կարծում եմ, որ ցանկացած ապահովագրական համակարգ ենթադրում է համապատասխան վճարումներ, իսկ ներկայացված նախագծով առաջարկվող ամենակարևոր սկզբունքն է՝ հնարավորինս ներդնել գումարներ, կառավարման միջոցով ավելացնել դրանք», - «Արմենպրես»-ի փոխանցմամբ, ասաց Արտեմ Ասատրյանը:

Հարցին՝ դա սոցիալական բեռ չէ՞, օրինակ, 55 000 դրամ աշխատավարձ ստացողի համար, Արտեմ Ասատրյանն ասաց, որ նվազագույն աշխատավարձ ստացողների մասով նման բեռ նախատեսված չէ, իսկ մնացած աշխատավարձերի միջակայքերում նախատեսված է 1000 դրամի վճար:

Դիտարկմանը՝ ինչու պետք է ցածր աշխատավարձ ստացողից էլ, մեկ միլիոն դրամ աշխատավարձ ստացողից էլ նույն գումարը գանձվի, կամ ինչու որոշում չի կայացվել պաշտոնյաների աշխատավարձից ավելի շատ պահումներ կատարել՝ հիմնադրամին փոխանցելու համար, Արտեմ Ասատրյանը պատասխանեց. «Դրանք մոտեցումներ են, որոնք կարող են քննարկումների փուլ անցնել»:

2017 թ. հունվարի 1-ից յուրաքանչյուր աշխատող ֆիզիկական անձ ամսական 1000 դրամ է վճարելու հիմնադրամին, որը կառավարելու են Կառավարությունը, Կենտրոնական բանկն ու Հոգաբարձուների խորհուրդը:

Լուսանկարը՝ Armenpress-ի

Աղբյուր` Փաստինֆո