Փաստ ինֆո

Անչափահասի սպանության համար դատապարտված Նալբանդյան ամուսինների գործը կրկին դատարանում է:

Ավելի վաղ տեղեկացրել ենք, որ Մարդու իրավունքների եվրոպական դատարանի կայացրած վճռի հիման վրա, գործի վերաբացման վարույթի շրջանակում ՀՀ վճռաբեկ դատարանը բեկանել է հայաստանյան դատական ակտերը և որոշել գործն ուղարկել Գեղարքունիքի մարզի առաջին ատյանի դատարան՝ նոր քննության:

Դեռևս  2004 թվականի հունիսին Նալբանդյան ամուսիններին Գեղարքունիքի մարզի ոստիկանությունը ձերբակալել էր անչափահաս աղջկա սպանության կասկածանքով: Նրանց նկատմամբ բռնություններ են գործադրվել` ինքնախոստովանական ցուցմունքներ կորզելու համար:

Հայաստանյան դատարանը Նարինե Նալբանդյանին դատապարտել է 14 տարվա ազատազրկման,  ամուսնուն՝ Բագրատ Նալբանդյանին, 9 տարվա, իսկ  նրանց այն ժամանակ անչափահաս դստեր` Արևիկ Նալբանդյանի նկատմամբ քրեական հետապնդումը դադարեցվել էր:

Այսպիսով, եվրադատարանը ճանաչել է, որ Նալբանդյանների հանդեպ խախտվել են արդար դատաքննության, դատական պաշտպանության մատչելիության իրավունքները, անմարդկային վերաբերմունք է ցուցաբերվել նրանց նկատմամբ: Որպես խախտված իրավունքների փոխհատուցում ՄԻԵԴ-ը սահմանել է, որ Բագրատ Նալբանդյանին Հայաստանի Հանրապետությունը պետք է վճարի 10 հազար, Նարինե Նալբանդյանին` 27 հազար և Արևիկ Նալբանդյանին՝ 25 հազար եվրո գումար:

Իսկ մինչ այդ, գործը կրկին դատարանում է այն կքննվի Գեղարքունիքի մարզի ընդհանուր իրավասության դատարանում:

Ըստ մեղադրանքի՝ Նարինե Նալբանդյանը իրենց տան  խոհանոցում, իր դուստր՝ Արևիկ Նալբանդյանի համադասարանցի Սյուզաննա Սարգսյանի միջև անբարյացկամ փոխհարաբերությունների պատճառով,  վիճաբանել է Սյուզաննա Սարգսյանի հետ, որի ընթացքում սեղանի վրայից վերցնելով «Ջերմուկ»  հանքային ջրի շիշը դիտավորությամբ հարվածել է Սյուզաննա Սարգսյանի քթի շրջանին պատճառելով քթոսկրի բեկորային կոտրվածք, այնուհետև նույն շշով երկու- երեք անգամ հարվածել է Ս.Սարգսյանի գլխի տարբեր մասերին պատճառելով փակ, բութ գանգուղեղային տրավմա:

Ստացած վնասվածքների հետևանքով Ս.Սարգսյանը գիտկցությունը կորցրել է և անգիտակից վիճակով ընկել է հատակին: Ստեղծված իրավիճակից մի պահ գիտակցության կորուստ է ունեցել նաև Ն.Նալբանդյանը, այդ պահին խոհանոց է մտել վերջինիս ամուսին Բագրատ Նալբանդյանը, տեսնելով կատարվածը ջուր է ցանել կնոջ դեմքին, ուշքի է բերել նրան և իմացել, որ կինն է շշով հարվածներ հասցրել Ս.Սարգսյանի դեմքին և գլխին:

Բագրատ Նալբանդյանը կնոջ՝ Ն.Նալբանդյանի հորդորով մետաղյա հաղորդալար է բերել և դրանով մարմնի հետևում կապել Սյուզաննայի ձեռքերը, որպեսզի ավելորդ շարժումներ և փախչելու փորձ չանի, իսկ այդ ընթացքում շորի կտորով կապել է Ս.Սարգսյանի բերանը, որպեսզի վերջինս չգոռա, չաղմկի և չկարողանա օգնություն կանչել:

Նշված գործողությունները կատարելու պահին Ս.Սարգսյանը անգիտակից վիճակում է գտնվել, բայց կենդանի է եղել, այդ վիճակում Նալբանդյան ամուսինները Սյուզաննային թողել են խոհանոցում, իրենք դուրս են եկել այնտեղից, մտածելով որ վերջինս ստացած վնասվածքներից կմահանա:

Դրանից 5-6 ժամ հետո, Նարինեն և Բագրատը մտածելով, որ Ս.Սարգսյաննան մահացել է, երկուսով միասին նրա մարմինը դուրս են բերել խոհանոցից, այնուհետև իրենց հողամասի միջով տարել են փողոց և գցել իրենց պարսպից 15-20 մ հեռավորության վրա գտնվող մազութի բետոնապատ հորը, որը 1,5 մ խորությամբ լցված է եղել ջրով, որտեղ էլ վերջինս մահացել է:

Նարինե Նալբանդյանին և Բագրատ Նալբանդյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 5-րդ և 7-դ կետերով, նրանց նկատմամբ որպես խափանման միջոց է ընտրվել կալանավորումը:

Աղբյուր` Փաստինֆո