Փաստ ինֆո

Շիրակի մարզի ընդհանուր իրավասության դատարանի դատավճռով`քրոջ բջջային հեռախոսահամարին զանգեր կատարելու համար երիտասարդի ականջը դանակով կտրած Արմենը դատապարտվել է 3 տարի ժամկետով ազատազրկման:

Ըստ մեղադրանքի՝ Արմենը 2016թ. փետրվարի 16-ին՝ ժ.11:30-ի սահմաններում, Շիրակի մարզի Առափի գյուղի տարածքում չգործող «Թաք ծառ» ռեստորանի բակում Արթուր Տոնապետյանի կողմից իր քրոջ բջջային հեռախոսահամարին զանգեր կատարելու աննշան պատճառով վիճաբանել է նրա հետ, որի ընթացքում խուլիգանական դրդումներով սանձարձակ դրսևորելով իր նեղ անձնական ձգտումները և հետաքրքրությունները, ինչպես նաև անզուսպ եսասիրություն և արհամարհական վերաբերմունք ցուցաբերելով վերջինիս նկատմամբ, սեփական անձի առավելություններն ընդգծելու մոլուցքով մղված, հաշվի չառնելով վերջինիս կողմից կատարածի համար իրենից բազմաթիվ անգամ ներողություն խնդրելու հանգամանքը՝ նրան ծնկի է բերել և գրպանից հանելով դանակ՝ այն շեղբի մասով մոտեցրել է Արթուր Տոնապետյանի կզակին, առանձին դաժանությամբ, առանձնակի ֆիզիկական և հոգեկան տառապանքներ պատճառելով վերջինիս, նրա առողջությանը վնաս պատճառելու դիտավորությամբ՝ դանակով կտրել է Արթուր Տոնապետյանի աջ ականջը՝ պատճառելով աջ ականջախեցու տրավմատիկ անդամահատման և պարանոցի կտրած վերքի ձևով առողջության տևական քայքայումով միջին ծանրության վնաս:

Քննչական կոմիտեն՝ 22-ամյա երիտասարդի ականջը կտրելու դեպքի մասին

Արմենին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 5,6-րդ կետերով՝ նրա նկատմամբ որպես խափանման միջոց ընտրելով կալանավորումը:

Առաջադրված մեղադրանքում Արմենը դատաքննության ընթացքում իրեն մասնակի մեղավոր է ճանաչել, սակայն հրաժարվել է ցուցմունք տալ և հարցերին պատասխանել: Նախաքննության ընթացքում Արմենը, ցուցմունք տալով, հայտնել է, որ այդ քայլին գնացել է, քանի որ Արթուրն իր քրոջն անհանգստացրել է, նրա պատվի ու արժանապատվության հարցն է շոշափվել ու բացի այդ էլ, ըստ Արմենի, Արթուր Տոնապետյանն իրենից որևէ ներողություն չի խնդրել կատարածի համար:

Արմենը նախաքննության ընթացքում հայտնել է նաև, որ Արթուրին հոգեպես չի ճնշել, ծնկի չի իջեցրել, վեճի ընթացքում իրար չեն հասկացել և ինքը, առանց որևէ դաժանության և հոգեկան ճնշում կիրառելու, գրպանից հանել է դանակը, միանգամից կտրել է Արթուր Տոնապետյանի ականջը, վերջինս այդ պահին կանգնած է եղել:

Նա նաև հայտնել է, որ Արթուր Տոնապետյանի պարանոցը դիտավորյալ չի վնասել, դա երևի առաջացել է ականջը կտրելու ընթացքում՝ դանակը ներքև սահելու ժամանակ:

Ըստ Արմենի` մոտ 10 տարի առաջ քույրն ամուսնացել է, ունեցել են մեկ տղա, ով ի ծնե հիվանդ է եղել, երեխայի ծնվելուց հետո քույրն առողջական խնդիրներ է ունեցել, որի պատճառով 2013 թվականին ամուսնալուծվել է: Երեխան մնացել է հոր մոտ, իսկ քույրը տեղափոխվել է իրենց տուն և մինչև օրս բնակվում է իրենց հետ:

Արմենը հայտնել է նաև, թե տեղյակ է, որ քույրն օգտվել է համացանցի «Ֆեյսբուք», «Համադասարանցիներ» կայքերից, որով շփվել է իրենց հարազատների ու բարեկամների հետ: Դեպքից մոտ մեկ ամիս առաջ քրոջ պլանշետն իր մոտ է եղել, որի մեջ տեղադրված է եղել քրոջ հեռախոսահամարը: Նրա համարին զանգ է եկել, և ինքը պատասխանել է ու խոսացողը տղամարդ է եղել, ով իր հեռախոսին պատասխանելուց հետո ասել է՝ «Վայ, կներեք, սխալվել եմ» ու հեռախոսն անջատել է: Դրանից հետո Արմենը քրոջը հարցրել է, թե ով է եղել այդ համարով զանգահարողը, նա էլ պատասխանել է, որ չգիտի:

2016 թվականի փետրվարի 15-ին՝ ժամը 23-ի սահմաններում, կրկին քրոջ պլանշետը նրա հեռախոսահամարով իր մոտ է եղել: Այդ ժամին քրոջ համարին զանգ է եկել: Քույրը եղբորն ասել է, որ այդ տղան իրեն գրել և զանգահարել է, նա էլ բազմիցս ասել է, որ չգրի ու չզանգահարի, բայց նա ժամանակ առ ժամանակ նորից զանգահարել է:

Ի վերջո, Արմենն ու Արթուրը պայմանավորվել ու հանդիպել են: Արմենը Արթուրին հարցրել է, թե ինչու է զանգել ու գրել քրոջը, նա էլ պատասխանել է, որ իբր նախկինում քրոջ հետ խոսել է մի քանի անգամ և զանգի միջոցով շփվել են նրա հետ ու դրանից հետո ուղղակի երբեմն զանգահարել է իմանալու, թե ինչպես է նա:  Նա ասել է, որ իր քույրն իրեն ասել է, որ չզանգահարի ու չգրի իրեն:

«Որ քույրս ասել է մի զանգի, ինչու՞ ես նորից զանգում, ա՛յ հարիֆ»: Ի պատասխան նա իրեն ասել է՝ «Հարիֆը դու ես»: Եվ հենց այստեղ էլ ծագել է վիճաբանությունը. ըստ Արմենի` Արթուրն իրեն վիրավորական խոսք է ասել, որից հետո միանգամից նյարդայնացել ու բաճկոնի աջ գրպանից դանակը հանել ու փականքը բացել է:

Արթուրը երևի մտածել է, որ ինքը ցանկացել է հարվածել նրան դանակով և ձեռքերն առաջ է բերել՝ իր ձեռքը պահելու համար, ինքն էլ դանակը միանգամից բարձրացրել ու աջ ձեռքով խփել է նրա աջ ականջին: Ականջը միանգամից կտրվել ու ընկել է նրա ուսին ու ինքը, այն վերցնելով, շպրտել է մի կողմ՝ ձյան մեջ:

Տեսնելով, որ Արթուրն սկսել է բղավել ցավից, ու ականջն արյունահոսել է, և վազվզել է տարածքում, ինքը նստել է ավտոմեքենան ու շարժվել դեպքի վայրից դեպի գլխավոր ճանապարհ, որտեղից էլ գնացել է իրենց գյուղ:

Երբ գնացել է տուն, ծնողներին ասել է, որ գնացել է քրոջը զանգահարողի ականջը կտրել ու եկել է, բայց չի մանրամասնել, թե ինչպես և որտեղ է տեղի ունեցել դեպքը:

Կատարածի համար Արմենը զղջացել է, հասկացել, որ սխալ է արել, սակայն այդ քայլին գնացել է քրոջ պատիվը բարձր պահելու և Արթուրի կողմից իր հասցեին վիրավորական խոսք ասելուց հետո:

Արթուրին դանակով վնասելու դիտավորություն ի սկզբանե չի ունեցել, ցանկացել է նրան բացատրել, որ քրոջը չզանգի, չգրի ու չանհանգստացնի, բայց քանի որ զրույցի ընթացքում մեկմեկու չեն հասկացել ու իրենց միջև լարված վիճակ է ստեղծվել, ջղայնացած վիճակում, Արթուրի վիրավորական խոսքից հետո, որոշել է նրա ականջը կտրել, որ հասկանա իրեն պատճառած ցավն ու նման քայլի չդիմի:

Դատարանը, վերլուծելով Արմենին առաջադրված մեղադրանքը, համակցության մեջ գնահատելով դատաքննությամբ հետազոտված ապացույցները, գործի հանգամանքների բազմակողմանի, լրիվ և օբյեկտիվ հետազոտման վրա ձևավորված ներքին համոզմամբ հանգում է հետևության՝ Արմենի կողմից Արթուր Տոնապետյանի աջ ականջախեցու տրավմատիկ անդամահատման և պարանոցի կտրած վերքի ձևով, առողջության տևական քայքայումով միջին ծանրության վնաս պատճառելը խուլիգանական դրդումներով և առանձնակի դաժանությամբ ապացուցված է:

Ինչ վերաբերում է արարքի առանձնակի դաժանությանը, ապա դատարանը փաստել է, որ այն կատարելը դրսևորվում է տուժողի մարմնական վնասվածք պատճառելու ընթացքում կամ դրանից առաջ վերջինիս ֆիզիկական և հոգեկան տառապանքներ պատճառելու մեջ, երբ կիրառվում է մարմնական վնասվածք պատճառելու այնպիսի եղանակ, որը հանցավորի համար ակնհայտորեն կապված է իր զոհին առաձին տանջանքներ պատճառելու մեջ:

Աղբյուր` Փաստինֆո