Փաստ ինֆո

Ծննդկան Մերի Մարգարյանի և նրա դստեր մահվան գործով շարունակվում է «Շենգավիթ» ԲԿ-ի բժիշկների հարցաքննությունը:

«Շենգավիթ» ԲԿ-ի սրտաբան Անուշ Թադևոսյանն իր ցուցմունքում նշեց, որ Շուշանիկ Բախշյանի պահանջով 2015թ. հուլիսի 27-ին հետազոտել է Մերի Մարգարյանին. սրտագրություն է կատարել, թոքերն է լսել, հետազոտության արդյունքներով՝ Մերիի մոտ հաճախասրտություն է եղել, սակայն թոքերը լրիվ մաքուր են եղել:

Ըստ վկայի՝ հաճախասրտությունը բնորոշ է հղիությանը, ինչպես նաև՝ վիրուսային հիվանդություններին:

Նախագահող դատավոր Դավիթ Բալայանը, վկայի ցուցմունքներում առկա էական հակասությամբ պայմանավորված, հրապարակեց նրա նախաքննական ցուցմունքները, ըստ որի՝ Մերիի մոտ, բացի հաճախասրտությունից, թոքերը լսելու հետևանքով նկատվել է ձախ կողմի մի փոքր կոշտացում:

Հաջորդիվ հարցաքննվեց «Սուրբ Աստվածամայր» ԲԿ-ի նյարդաբան Գայանե Խաչատրյանը, ով 2015թ. հուլիսի 27-ին «Շենգավիթ» ԲԿ-ի կողմից հրավիրվել է, որպեսզի հետազոտության ենթարկի Մերի Մարգարյանին:

Ըստ նյարդաբանի՝ Մերիի գիտակցականը խանգարված է եղել, հարցերին պատասխանել է ուշացումով ու դժվարությամբ, խոսքը ևս խանգարված է եղել՝ դժվար է արտահայտվել:

Նյարդաբանը նաև նշեց, որ զննելու արդյունքում Մերիի մոտ ներգանգային ճնշման բարձրացում է նկատվել և քանի որ ինքը կասկածել է սուբարախնոիդալ արյունազեղում, գտել է, որ անհրաժեշտ է, որպեսզի Մերիին բազմապրոֆիլային հիվանդանոց տեղափոխեն և կատարեն համակարգչային տոմոգրաֆիա:

Վկան պնդեց, որ ախտորոշումը տվել է հարցականով, ուստիև՝ գտել է, որ անհրաժեշտ է տեղափոխումը, իսկ թե ինչու՞ չի հիմնավորվել իր ախտորոշումը և չի կատարվել ԿՏ հետազոտությունը, ինքը չգիտի:

Միևնույն ժամանակ պարզ դարձավ, որ նյարդաբանը, նախաքննության ընթացքում ցուցմունք տալով, հայտնել է, որ խորհուրդ է տվել Մերիին ՄՌՏ հետազոտության ենթարկել, սակայն դատարանում ասաց, որ ԿՏ հետազոտություն պետք է կատարեին:

Ի վերջո, նման պայմաններում Մերիի վիճակը նյարդաբանը գնահատել է միջին ծանրության:

Այսօր հարցաքննվեց նաև, «Շենգավիթ» բժշկական կենտրոնի փոխտնօրեն Դավիթ Մխիթարյանը, ով դեպքի ժամանակ եղել է նույն ԲԿ-ի տնօրենի բուժական գծով տեղակալ:

Դավիթ Մխիթարյանի խոսքով՝ 2015թ. հուլիսի 27-ին իրենց ԲԿ-ում հրավիրված կոնսիլիումին ինքն անձամբ չի մասնակցել, իրեն ներկայացվել են այդ կոնսիլիումի արդյունքները, և որ անհրաժեշտ է Մերիին տեղափոխել բազմապրոֆիլային հիվանդանոց, իսկ ինքն աջակցել է տեղափոխմանը:

Ինչ վերաբերում է Մերի Մարգարյանի հոսպիտալացման մերժմանը, ապա Մխիթարյանը նշեց, որ մեկ անգամ է մերժվել՝ Անի Բաբելյանի հերթապահության օրը:

Երբ պատրաստ են եղել հետազոտության արդյունքները, Մերին տուն է գնացել. «Որպես էդպիսին՝ մերժում չի եղել, Անի Բաբելյանը հարցրել է, թե ինչ անի, իսկ ես պատասխանել եմ, որ մերժման մատյանում լրացնի ու կցի հետազոտության արդյունքները»:

Ամբաստանյալ Շուշանիկ Բախշյանի պաշտպան Ալեքսանդր Սիրունյանի հարցին, թե ինչու կեսարյան հատում չեն կատարել, Մխիթարյանը պատասխանեց. «Իմանային սենց էր լինելու, շառից հեռու կվիրահատեին, սակայն կեսարյան հատման ցուցում չի եղել»:

Պաշտպան Սիրունյանը հարցը կրկնեց. «Ձեզ ներկայացրել էին, որ կան խնդիրներ, որոնք արագ են զարգանում, ինչո՞ւ կեսարյան հատում չարեցիք, լյարդի խնդիր ուներ, թոքի խնդիր, ջերմություն, փորը բացեիք պրծնեիք»։

Ի պատասխան՝ վկան ասաց. «Դա հո հարևանի գրպանը չի, որ բացենք պրծնենք։ Ցուցում չկար, հետո էլ ասելու էին ի՞նչ ցուցումի հիման վրա եք կեսարյան հատում կատարել»:

Աղբյուր` Փաստինֆո